Првопријавениот во својство на службено лице во Министерството за земјоделство, шумарство и водостопанство согласно Решение несовесно постапувал при вршење на своите овластувања, на начин што во текот на 2021 и 2022 година не изготвил записник за одземање на владението на правниот субјект ДЗС Илинден АД Скопје иако на 07.10.2021 година уредно му била доставена Изјава за раскинување на договорот за закуп на правниот субјект ДЗС Илинден АД Скопје бр. 39-7689/1 од 28.09.2021 година, спротивно на член 37 од Законот за земјоделско земјиште, дополнително првопријавениот несовесно постапувал во вршењето на своите овластувања и должности и како службено лице во Подрачна единица при МЗШВ во период од 16.09.2020 година до 15.04.2022 година на начин што не ја доставил Изјавата за еднострано раскинување до надлежните служби на МЗШВ - Гази Баба за истата да биде евидентирана во ФАРМ системот и правниот субјект ДЗС Илинден АД Скопје да биде избришан од Единствениот регистар на земјоделски стопанства, со што првопријавениот му овозможил на ДЗС Илинден АД Скопје да прибави корист за себе и тоа незаконско владение и плодоуживање на државно земјоделско земјиште, како и незаконско користење на финансиски средства од Агенцијата за финансиска поддршка во земјоделството и рурален развој за период од 2021 до 2024 година во вкупен износ од 15.052.001,00 денари.

Второпријавената во својство на службено лице во Министерството за земјоделство, шумарство и водостопанство во период од 15.04.2022 до 24.08.2022 година, како и во период од 16.09.2020 година до 15.04.2022 година, во својство на службено лице во Министерството за земјоделство, шумарство и водостопанство, ги повредила законските прописи за совесно постапување при вршење на своите овластувања на начин што во текот на 2021 и 2022 година Изјавата за раскинување на договорот за закуп на правниот субјект ДЗС Илинден АД Скопје не ја доставила до надлежните служби на МЗШВ-Гази Баба за истата да биде евидентирана во ФАРМ системот и правниот субјект ДЗС Илинден АД Скопје да биде избришан од Единствениот регистар на земјоделски стопанства, со што второпријавената му овозможила на ДЗС Илинден АД Скопје да прибави корист за себе и тоа незаконско владение и плодоуживање на државно земјоделско земјиште, како и незаконско користење на финансиски средства од Агенцијата за финансиска поддршка во земјоделството и рурален развој за период од 2021 до 2024 година во вкупен износ од 15.052.001,00 денари.

Третопријавениот во својство на функционер во Министерството за земјоделство, шумарство и водостопанство во период од јануари 2022 до ноември 2023 година ги повредил законските прописи за совесно постапување при вршењето на своите овластувања со пропуштање на должен надзор над комисијата за одземање на владение врз основа на престанок на склучени договори за закуп, формирана од страна на Министерот, во однос на одземањето на владение на државното земјоделско земјиште на правното лице ДЗС Илинден спротивно на чл.49 од Законот за организација и работа на органите на државната управа. Оваа одговорност вклучува имплементација и одржување на внатрешни контроли кои се релевантни за процесот на одземање на владение на државно земјоделско земјиште врз основа на донесена Изјава за еднострано раскинување на договорот поради неподмирени обврски за закуп, во согласност со одредбите од релевантната законска и подзаконска регулатива, стратешките документи и воспоставени политики. Третопријавениот иако бил задолжен да организира и обезбедува законито и ефикасно вршење на работите и задачите, со пропуштање на должен надзор несовесно постапувал во вршење на своите овластувања, односно не преземал дејствија за утврдување на фактичката состојба во однос на одземање на владението на ДЗС Илинден АД Скопје, со што третопријавениот му овозможил на ДЗС Илинден АД Скопје да прибави корист за себе и тоа незаконско владение и плодоуживање на државно земјоделско земјиште, како и незаконско користење на финансиски средства од Агенцијата за финансиска поддршка во земјоделството и рурален развој за период од 2021 до 2024 година во вкупен износ од 15.052.001,00 денари.

Управа за финансиска полиција

Министерството за јавна администрација ги отфрла тенденциозните и манипулативни тврдења изнесени од страна на СДСМ и ги потсетува дека е потребно да направат разлика помеѓу реформа на јавна администрација и законските решенија кои произлегуваат од уставна категорија.

Министерството за јавна администрација јасно и недвосмислено ги следи и спроведува сите одлуки на Владата на Република Македонија, како и Уставниот суд, со заложби кои се насочени кон долгорочен развој на јавната администрација преку професионални, транспарентни и инклузивни реформи кои ќе обезбедат ефикасна и одговорна јавна служба за сите граѓани, за разлика од претходниот затворен пристап на Владата на СДСМ.

Потсетуваме, решенијата од уставна категорија, како што е случајот со „балансерот,” бараат одговорен и експертски пристап, ослободен од политички влијанија.

Дневната политиката мора да биде надвор од процесот на создавање закони од уставна категорија.

Работната група што работи на новото законско решение за ова прашање е составена од експерти, и истото треба да се испрати на увид до Венецијанската комисија, со цел да се осигура усогласеност со европските стандарди и правната рамка на државата.

Исто така, истакнуваме дека Стратегијата за реформа на јавната администрација и Акцискиот план, не е сопственост на ниту една политичка партија, туку е план усогласен со потребите на државата и приоритетите за напредок на Република Македонија на патот кон Европската Унија.

Секој обид за манипулација на јавноста со неосновани обвинувања е контрапродуктивен и на штета на граѓаните.

Министерството за јавна администрација останува посветено на својата мисија и продолжува да работи на конструктивен, професионален и транспарентен начин, со цел да ја модернизира и реформира јавната администрација на начини кои се во корист на сите граѓани.

Министерот за јавна администрација, Горан Минчев, ја извршува својата функција исклучиво во служба на граѓаните, посветен на реформите кои ќе придонесат кон современа, ефикасна и транспарентна администрација.

Политички обвинувања и манипулации нема да го одвратат Министерството од стратешкиот правец кој води кон квалитетна јавна администрација, насочена кон доброто на граѓаните и во согласност со европските вредности.

Кабинет на Министер за Јавна Администрација

Мрежата за соработка во заштита на потрошувачите (ЦПЦ) и Европската комисија по спроведената координираната истрага на европско ниво, заклучија дека сајтот за онлајн трговија „Тему“ користи голем број на практики со кои ги прекршува правата на потрошувачите на ЕУ.

До „Тему“, кој веќе е под истрага на Европската комисија поради продажба на нелегални производи, е испратено барање за усогласување на своите практики со законите за заштита на потрошувачи на Европската Унија.

Истрагата заклучи дека „Тему“ користи широк опсег на практики кои може да ги доведат потрошувачите во заблуда или несоодветно да влијаат на нивните одлуки за купување на стоки преку оваа е-продавница.

Како конкретни практики со кои се кршат законите на ЕУ се посочени наведувањата да се добие впечаток за намалени цени на одредени производи иако тие всушност не се на попуст, ставањето на потрошувачите под притисок купат одреден производ со лажни тврдења за ограничени количини или рокови, присилувањето на корисниците да играат игра на среќа, изнесување нецелосни и неточни информации за враќање на стоките и добивањето поврат на платените средства, како и оневозможувањето на лесно контактирање со „Тему“ за прашања или поплаки.

Дополнително, од „Тему“ се побарани информации околу исполнувањето на обврската за информирање на потрошувачите дали продавачот на одреден стока е трговец, за обезбедување на точна пресметка на наведените попусти, како и за утврдување на веродостојноста на наведените прегледи и оценки и на тврдењата за почитување на еколошките стандарди.

Со истрагата против „Тему“ раководеа белгискиот Генерален директорат за економска инспекција, германската Федерална агенција за животна средина и ирската Комисија за конкуренција и заштита на потрошувачите во координација на Европската комисија.

„Тему“ има еден месец да одговори на наодите од истрагата, по што врз основа на добиените одговори ќе се донесе одлука за следните чекори, кои може да вклучат и казни.

Мрежата ЦПЦ ја сочинуваат институциите за заштита на потрошувачите во 27-те земји членки на ЕУ, Норвешка и Исланд и нејзина задача е да го следи почитувањето на законите на Унијата за заштита на потрошувачите и таа има можност во координација со Еврокомисијата да иницира заеднички истражни и извршни постапки./МИА