Македонија

Муцунски од Монтреал: Неопходно е да се изградат механизми за безбедно враќање на Украинците

Неопходно е да се изградат механизми за безбедно враќање на украинските цивили и депортираните деца и да се потврдат заеднички вредности на сочувство, солидарност и издржливост.

Министерот за надворешни работи и надворешна трговија, Тимчо Муцунски, изминатите два дена учествуваше на Министерската конференција за хуманата димензија на Формулата за мир на претседателот Зеленски од Украина, што се одржа во Монтреал, Канада. Во фокусот на конференцијата беше третманот кон политичките и воените заробеници, незаконски притворените цивили и присилно депортираните деца.

Покрај обраќањето на воведната сесија, министерот за надворешни работи и надворешна трговија говореше на сесијата на тема : „Механизми за безбедно враќање дома на заробените украински цивили и депортираните деца.“

Во говорот пред присутните тој ja нагласи неопходноста од почитување на принципите на безбедност, соработка и, пред сè, човечко достоинство, потенцирајќи ја итната потреба да се обезбедат безбедни, достоинствени и одржливи патишта за враќање на Украинците раселени од конфликтот, притоа нагласувајќи дека одговорот не смее да биде рамнодушен или со двоумење, туку јасна посветеност на акција.

Муцунски додаде и дека со заедничка работа и посветеност може да се изградат механизми кои не само што ќе го олеснат безбедното враќање, туку и ќе ги потврдат нашите заеднички вредности на сочувство, солидарност и издржливост

„Нашето учество и посветеност денеска ќе испратат силна порака за тоа како можеме да работиме заедно не само за заштита на човековите права, туку и за да се осигураме дека секое патување кон безбедност и достоинство е почитувано и олеснето“, додаде Муцунски.

На маргините на конференцијата, министерот Муцунски оствари билатерални средби сo косовската министерка за надворешни работи и дијаспора, Доника Гервала, српската министерка за евроинтеграции, Тања Мишевиќ, и потпретседателот на Европскиот парламент, Николае Штефанута. Фокусот на средбите беше ставен на актуелните меѓународни прашања, процесот на евроинтеграција и регионалните теми, вклучително и надворешно-политичките приоритети и состојбите во непосредното опкружување, стои во соопштението од министерство за надворешни работи и надворешна трговија.

Свет

Анкета: Мнозинството Германци бараат предвремени избори

 Според социолошка анкета спроведена во Германија, мнозинството граѓани го изгубиле трпението со нестабилната влада на тројната коалиција, пренесува ДПА.

Последната анкета на „Дојчланд Тренд“ за јавната телевизија АРД открива дека 54 отсто од анкетираните би сакале предвремени парламентарни избори.

Во исто време, 41 процент од испитаниците се согласни дека коалицијата на канцеларот Олаф Шолц, составена од Социјалдемократската партија на Германија, Зелените и Слободната демократска партија (ФДП), треба да продолжи до редовните избори, закажани за 28 септември 2025 година.

Предвремени избори поддржуваат 93 отсто од приврзаниците на крајно десничарската Алтернатива за Германија (АфД) и 75 отсто од поддржувачите на левичарската „Алијанса на Сара Вагенкнехт“.

Поддршката за предвремени избори изразиле и 69 отсто од поддржувачите на опозицискиот конзервативен блок – Демохристијаните (ЦДУ/ЦСУ).

Истражувањето, спроведено од „Инфратест Димап“ меѓу 1.333 испитаници од понеделникот до средата, покажува дека вкупното задоволство од федералната влада опаѓа. Само 14 отсто од анкетираните изјавиле дека се многу задоволни или задоволни од нејзината работа, што е за пет процентни поени помалку во споредба со почетокот на октомври.

Незадоволството е зголемено за шест процентни поени, достигнувајќи 85 отсто

Поддршката за ЦДУ/ЦСУ моментално изнесува 34 отсто – три процентни поени повеќе отколку на претходната анкета. Тоа ја прави најсилна партија според актуелните резултати.

Социјалдемократската партија останува на ниво од 16 отсто, исто како и АфД со 17 отсто. Зелените изгубиле два процентни поени, а „Алијансата на Сара Вагенкнехт“ изгубил исто така два процентни поени, достигнувајќи поддршка од 6 проценти.

Регион

Во Словенија нови одредби за постојан и за продолжување на привремениот престој

 Во Словенија од денеска важат нови одредби од Законот за странци кои предвидуваат познавање на словенечкиот јазик на основно и на егзистенцијално ниво.

Според Законот услов за добивање дозвола за постојан престој, во Словенија ќе биде потребно основно познавање на словенечкиот јазик, додека за продолжување на привремениот престој поради обединување на семејството, условот ќе да биде познавање на јазикот на егзистенцијално ниво.

Основно знаење значи ниво А2 на заедничката европска јазична рамка. Егзистенцијалното ниво подразбира темелна комуникација на словенечки јазик, ограничена на едноставни, предвидливи, секојдневни ситуации, во кои изразот е рутински и се повторува.

Технологија

Закерберг потврди: „Meta AI“ има повеќе од 500 милиони корисници

Сопственикот на компанијата „Meta“ ја потврди статистиката за дел од услугите кои се дел од овој гигант.

Минатиот месец, Марк Закерберг истакна дека „Meta AI“ е на пат да стане најкористениот генеративен асистент за вештачка интелигенција во светот.

Услугата сега означи значајно достигнување, бидејќи „Meta AI“ има повеќе од 500 милиони корисници, како што Закерберг откри за време на последниот состанок со инвеститорите.

Половина милијарда корисници достигнаа само една година откако „Meta“ ја лансираше својата вештачка интелигенција есента минатата година. Закерберг вели дека компанијата сè уште очекува „Meta AI“ да стане најкористениот асистент до крајот на 2024 година, иако тој не кажа како се одредува таа метрика.

„Meta“ вештачката интелигенција не е единствената алатка која го подобрува работењето на компанијата. Закерберг истакна дека подобрувањата на вештачката интелигенција во препораките за храна и видео доведоа до зголемување од 8% во времето што корисниците го поминуваат на „Facebook“ и 5% на „Instagram“ оваа година.

Исто така, апликацијата „Threads“ на „Meta“ продолжува да расте. Услугата сега има речиси 275 милиони месечни активни корисници, со раст од повеќе од милион регистрации дневно.

Извор: Б92

притисни ентер