За правните процедури вели дека веќе се изјасниле надлежните тела кои учествуваат во процесот на помилување, а за осуденикот кој крена најмногу прашина, Акиф Равмановски, водачот на кланот Барон, премиерот кажа дека тој веќе не е на слобода и покрај помилувањето кое го доби претходно.
-Тој случај е кукавичко јајце снесено од претходната влада кој требало да имплодира во овој период. Знам лицето дека е повторно приоведено и дознав дека има уште неколку дела кои се поврзани со ова лице. Нема да одам чекор понатаму да коментирам и да прејудицирам судски одлуки, јас сум човек легалист, верувам во презумпција на невиност.. Веќе доби истото лице 30-дневен притвор, па оставам на правосудните органи да одлучат како да постапуваат за други случаи кадешто постои основано сомениние за сторен криминал.- Христијан Мицкоски – претседател на Влада
Членот на комисијата за помилување, професорот Гордан Калајџиев, вели дека тие одлучувале според документите од судот и од министерството за правда, во кои стојат деталите за поведението и затворската историја на осуденикот, а не дека е шеф на криминална банда. Во синоќешниот поткаст „На кавга со Иван“ тој потврди дека листата за помилување е селекција од претходно доставен список од над 100 предлози за помилување од поранешниот министер за правда Кренар Лога.
-Човекот за кој се води дека е шеф на банда по судските списи е осуден за еден пиштол дома и пет куршуми. При тоа првостепениот суд, исто како и комисијата, му дал условна осуда. Апелација пак, што сум се зачудел како ги менува казните со многу построги, ги менува условните и паричните со казна затвор. - Гордан Калајџиев – член на Комисија за помилување
По низата реакции, за процедурата вчера се изјасни и министерот за правда Игор Филков, кој изјави дека правда не помилува туку дава само препорака за намалување на казна од 1 до 6 месеци.
Инаку, освен водачот на кланот Барон, меѓу осудениците со позвучни имиња се и братот на Шенки Версаче, Шенол Маслани, поранешниот градоначалник на Битола, Владимир Талески, и Марјан Ефремов, кој беше првообвинет во предметот „Шпион“.