Македонија

Ѓорѓиевски и Премиерот Мицкоски на почетокот на реконструкција на патот Драчево-Пеленица

Градоначалникот Ѓорѓиевски и Премиерот Мицкоски на почетокот на градежните работи за реконструкција на патот Драчево-Пеленица.

Градоначалникот Орце Ѓорѓиевски и Претседателот на Владата на Република Македонија Христијан Мицкоски, денес заедно го означија почетокот на градежните работи за реконструкција и проширување на патот Пеленица-Драчево, односно реконструкција на коловозот на патот кој води кон манастирот „Пеленица“ во општина Кисела Вода.

-Денес сме сведоци на уште еден значаен чекор во насока на подобрување на квалитетот на животот на жителите од Кисела Вода, Драчево и околните населени места. Со почетокот на реконструкцијата на патната делница Пеленица-Драчево, на потегот од Јустинијан Први до границата со Општина Студеничани, ја демонстрираме заедничката посветеност на локалната и централната власт за решавање на инфраструктурните проблеми кои со децении чекаа решение. Станува збор за реконструкција и проширување на фреквентна сообраќајница со должина од 3.400 метри, со изградба на тротоар од едната страна, што досега никогаш досега го немало, односно изградба на пешачка патека за рекреирање на жителите на овој дел од градот. Тука ќе се изведува и третирање на атмосферските води со ф 1000 цевки и поставување на каналетки за одведување на водите. Оваа делница, која не е обновена цели 30 години, конечно ќе добие нов лик и нов квалитет, обезбедувајќи подобри услови за жителите на Кисела Вода и Студеничани, како и за сите што ја користат оваа сообраќајница за пристап до селата.

Проектот, со вредност од околу 25 милиони денари, е реализиран благодарение на средствата добиени од Владата на Република Македонија за капитални инвестиции. Сакам да изразам искрена благодарност до Премиерот Христијан Мицкоски и до Владата за оваа значајна поддршка. Горд сум што за еден месец, Премиерот трет пат е присутен во нашата општина за почеток на голем капитален проект. Неодамна заедно го одбележавме почетокот на изградба на нова детска градинка во Кисела Вода. Потоа ја започнавме реконструкцијата на спортската сала Расадник, симбол на општината, а денес го објавуваме и почетокот на оваа витална патна делница.

Ова е доказ дека во Кисела Вода се случува инфраструктурен бум, и дека ги споделуваме заедничките вредности со Владата и се обединуваме околу клучни проекти кои се во интерес на народот. Заедно, преку конструктивна соработка, создаваме подобри услови за живот, развој и напредок на сите жители. Убеден сум дека оваа реконструкција, ќе придонесе за подобрување на безбедноста, ефикасноста и функционалноста на сообраќајот, и дека ќе ги постави основите за понатамошен развој на регионот-изјави градоначалникот Орце Ѓорѓиевски.

Премиерот Христијан Мицкоски ја поздрави посветената работа на градоначалникот Орце Ѓорѓиевски и добрите проекти како денешниот кој е финансиран од владините средства за поддршка на општините.

-Ова е еден од оние проекти финансирани од Владата, односно со средствата кои се реалоцирани од централниот буџет кон општините. Во Кисела Вода во наредниот период ќе имаме уште неколку такви, се подготвуваат и други проекти за периодот што следи, односно за следниот повик. Јас сум сигурен дека со проекти како овој проект ќе додадеме вредност во квалитетот на животите на граѓаните од ова населено место , но и од соседната општина Студеничани. Му честитам на градоначалникот, на администрацијата на општината, на пратениците, на луѓето кои помогнаа сето ова да се реализира, бидејќи како што знаете треба да се подготви техничка документација, соодветни одобренија и така натаму. . . Ние продолжуваме со иста динамика, продолжуваме да го испорачуваме тоа што сме им го ветиле на граѓаните, бидејќи за тоа сме ја добиле и довербата од нив-изјави Премиерот Мицкоски.

Свет

Мигрант запали жена среде метрото во Њујорк- гледа како гори и ја снима (Вознемирувачко видео)

Себастијан Запета-Калил (33), мигрант од Гватемала, е осомничен дека ја запалил жената и ја убил, а наводно ја гледал како гори додека полицајците ја поминувале платформата за да ја спасат.

Осомничениот наводно седел на клупа на платформа на метрото во Бруклин пред вагонот додека пожарот беснеел внатре. Трагичниот настан се случил во неделата наутро, а полицајците кои биле на местото на настанот не го уапсиле веднаш Себастијан.

„Не знаејќи за полицајците што реагираа, осомничениот остана на местото на настанот и седеше на клупа на платформата веднаш надвор од вагонот, а камерите на телото на полицајците што реагираа обезбедија многу јасен детален поглед на убиецот“, рече комесарот на НЈПД, Џесика Тиш.

Осомничениот ѝ пришол на жената која била „неподвижна“ во вагонот додека се приближувал до станицата на авенијата Стилвел околу 7.30 часот, соопшти полицијата. Властите првично рекоа дека жената спиела. На видеото од внатрешноста на возот се гледа како осомничениот става ќебе врз жената, а жртвата е таму веќе вивната во пламен, според Си-Ен-Ен.

Запета-Калил е уапсен околу осум часа подоцна во воз на станицата Хералд Сквер во Мидтаун Менхетен, изјави началникот на транзитната полиција на Њујорк Џозеф Гулота. Во џебот имал запалка.

Жртвата се уште не е идентификувана. Надлежните не веруваат дека таа и осомничениот се познавале, пишува Метро.

Главниот службеник за безбедност на Метрополитенската транспортна управа, Мајкл Кемпер, тоа го нарече „брутално убиство“. Окружниот обвинител во Бруклин, Ерик Гонзалес, рече дека „изопаченоста на ова ужасно злосторство е надвор од разбирање“.

„Мојата канцеларија е посветена да ги изведе сторителите пред лицето на правдата. Овој ужасен и бесмислен чин на насилство врз ранлива жена ќе има најсериозни последици. Секој њујорчанец заслужува да се чувствува безбеден во нашата подземна железница, а ние ќе направиме сѐ што е во наша моќ да обезбеди одговорност во овој случај“, рече тој.

Инцидентот се случи само три дена откако гувернерката Кети Хочул објави дека 250 членови на Националната гарда ќе бидат распоредени низ системот на метрото на градот за да се зголеми безбедноста за време на празникот.

Запета-Калил влегол во САД илегално и бил обвинет за убиство од прв степен и подметнување пожар. Неговата адреса била засолниште за бездомници за мажи со проблеми со злоупотреба на супстанции во источен Њујорк.

Свет

Мајка од Германија си ги убила двете мали деца на Божик, па се обидела да си пресуди

Страшна трагедија се случила на Божиќ кога мајка (39) од Германија со непознат алат ги убила двете малолетни деца на возраст од шест и седум години.

Откако ги убила децата, жената се обидела да се самоубие.

Хоророт се случил околу 3 часот и 30 минути на Божиќ, а полицијата за трагедијата ја известил сведок. Подоцна ја пронашол повредената жена во семејната куќа во областа Розенхајм во Баварија.

Неколку патролни возила веднаш се упатиле кон куќата на Краинштрасе. Полицијата потоа ја открила Германката и безживотните тела на децата во куќата.

За жал, медицинските служби не успеале да ги оживеат децата, па можеле само да прогласат смрт, пишува Билд.

Оружјето што го користела за време на убиствата засега не е детално опишано, а мајката е префрлена во болница каде што се лекува под полициска придружба.

Според лекарите, состојбата на жената е стабилна, а нема индиции дека во делото е вмешано уште некое лице.

На местото на злосторството, во семејниот дом, има кризни екипи на Црвениот крст кои се грижат за членовите на семејството и полицијата која врши увид.

Засега не е познат мотивот зошто мајката ги убила нејзините две деца.

Свет

Патниците едвај преживеале, откако машиновозач се фрлил од воз во полна брзина

Француската национална железничка компанија (SNCF) денеска го потврди самоубиството на машиновозач во брз воз (TGV), што во текот на претходната ноќ беше причина за големи прекини кои ги зафатија линиите на брзите возови во Југоисточна Европа.

СНЦФ соопшти дека вчера, на Бадник, кој се слави според Грегоријанскиот календар, машиновозачот „си го одзел животот додека возот се движел“, а дека „автоматските уреди за запирање на возот биле активирани и возот автоматски запрел“, објави Монд.

Компанијата објави и дека „никогаш не била загрозена безбедноста на патниците во возот, ниту безбедноста на сообраќајот“.

Според извор близок до истрагата, машиновозачот вчера вечер скокнал од возот што се движел во полна брзина, што предизвикало доцнење од десет воза, а неговото безживотно тело било откриено нешто подоцна.

Обвинителството соопшти дека е отворена судска истрага за утврдување на причините за смртта на машиновозачот, која ја спроведува жандармеријата во градот Мелун.

„Првите наоди се чини дека укажуваат на тоа дека машиновозачот на брзиот воз извршил самоубиство. Автоматските безбедносни процедури на железницата обезбедија возот да запре“, се вели во соопштението на јавното обвинителство во Мелун претходно денеска, еден ден по големите нарушувања на јужната линија на брзата пруга.

притисни ентер