Здравје

Дознавте дека имате псоријаза? Воведете шест промени во начинот на живот и исхраната

Псоријазата е хронично воспалително заболување на кожата кое се карактеризира со црвенило и задебелување на кожата покриена со сребрено-бели и суви лушпи.

Промените најчесто се јавуваат на лактите, колената и скалпот, но може да се појават и на кој било друг дел од телото. Не постои лек за псоријаза, но преземањето соодветни чекори навреме може значително да помогне да се контролираат симптомите и да се намали создавањето на лушпи на кожата.

Во одредени случаи, неопходно е значително да се прилагодат животните промени и исхраната доколку имате псоријаза. Дерматолозите и диететичарите за „Eating Well“ идентификуваа кои промени во исхраната и во начинот на живот луѓето со псоријаза треба да ги земат во предвид.

„Псоријазата не е само состојба на кожата. Тоа е болест со потенцијални внатрешни манифестации како што се артритис, метаболички синдром, депресија, па дури и зголемен ризик од рак. Терапијата треба да вклучува третман на воспалението на кожата, како и третман на внатрешната состојба“, објаснува дерматологот Гери Голденберг за „Eating Well“.

Јадете урамнотежена исхрана

Хроничното воспаление е клучно во псоријазата, а изборот на исхрана може да помогне да се намали или да се влоши тоа воспаление. Како што известува Eating Well, една студија од 2022 година објавена во списанието Nutrients сугерира дека исхраната богата со овошје, зеленчук, интегрални житарки и омега-3 масни киселини, истовремено избегнувајќи алкохол, црвено месо и преработена храна, може да помогне во справувањето со псоријазата.

„Урамнотежената исхрана може да помогне да се намали воспалението во третманот на псоријазата, балансираната исхрана исто така го зајакнува имунолошкиот систем и го подобрува здравјето на кожата. Покрај тоа, индексот на телесна маса (БМИ) што укажува на прекумерна тежина или дебелина, е поврзан со потешките форми на псоријаза. Одржувањето на здрава тежина преку урамнотежена исхрана може значително да ја намали сериозноста на симптомите“, вели диететичарот Триста Бест.

Линдзи Бордоне, асистент професор на Одделот за дерматологија на Универзитетот Колумбија, за порталот истакнала: „Кај пациентите кои развиваат псоријаза откако ќе се здебелат, губењето на тежината може значително да ги намали симптомите. Во некои случаи, губењето на тежината може да доведе до значително помала псоријаза или враќање на кожата во почетната состојба."

Фокусирајте се на противвоспалителни намирници

Вклучувањето на противвоспалителни намирници во секојдневна исхрана е клучно за справување со псоријазата. Овошјето, зеленчукот, мешунките, рибата и интегралните житарки, го намалуваат воспалението и обезбедуваат клучни хранливи материи за регенерација на кожата и поддршка на имунолошкиот систем.

„Најдобро е да вклучите лиснат зеленчук, бобинки, домати и разнобоен зеленчук поради нивната содржина на антиоксиданси. Внесете масна риба во исхраната, како лосос, скуша и сардини или растителни извори на омега-3 масни киселини како ленено семе, чиа, ореви за да го намалите воспалението“. – тврди жената диететичар Триста Бест.

Голденберг додава дека диетата без глутен може да им помогне на некои луѓе. „Студиите сугерираат дека диетата без глутен може да ги намали симптомите на псоријаза дури и кај луѓе кои немаат алергија на глутен. Водењето дневник за исхраната со цел да се идентификуваат предизвикувачите исто така може да биде корисно“, објаснува тој.

Избегнувајте да јадете храна што ја влошува состојбата

Одредени намирници може да го влошат воспалението и да предизвикаат избивање на псоријазата. Бордоне тврди дека „алкохолот и стресот се двата најголеми предизвикувачи на псоријаза. Иако стресот е тешко да се контролира, избегнувањето алкохол е едноставна, но и значајна промена што можете да ја направите“.

Вообичаени предизвикувачи се преработената храна, шеќерот, црвеното месо и глутенот. „Следењето на внесената храна и симптомите може да ви помогне да разберете како одредена храна влијае на вашата состојба“, истакнува диететичарот Бест.

Бидете физички активни со редовно вежбање

Како што известува Eating Well, според прегледот од 2022 година, редовното вежбање има бројни придобивки за луѓето со псоријаза, тоа придонесува во одржувањето на здрава тежина, во намалувањето на стресот и подобрувањето на расположението. Имајте предвид барем 150 минути умерена физичка активност неделно или 75 минути интензивни физички вежби неделно.

„Вежбањето е клучно во справувањето со стресот и во зајакнувањето на имунолошкиот систем. Стресот е познат предизвикувач на псоријаза, а редовната физичка активност може да помогне да се намали“, вели Бордоне.

Ефикасно справување со стресот

Голденберг истакнува дека „намалувањето на стресот е клучно. Едноставните практики како медитација, јога или длабоко дишење можат да помогнат во регулирањето на нивото на кортизол и намалување на воспалението“.

Обезбедете доволно квалитетен сон

Не е тајна дека квалитетниот сон е клучен за здрав имунолошки систем и поздрава кожа. „Спиењето е еден од најважните фактори во справувањето со автоимуните состојби како што е псоријазата“, истакнува Бордоне. Националниот институт за здравје препорачува спиење од седум до девет часа ноќе за оптимално здравје.

Стратегиите за подобар сон вклучуваат доследно време на заспивање и будење, рутина пред спиењето, избегнување екрани пред да спиете и ограничување на консумацијата на алкохол во доцните часови, известува Eating Well.

Автомобилизам

Лоеб: Нема издржани аргументи за нашето исклучување

Деветкратниот светски шампион во рели, Себастиен Лоеб, објасни дека одлуката на ФИА да го дисквалификува од релито Дакар страдала од „недостаток на цврсти аргументи“ и призна дека е разочаран од неговото предвремено отпаѓање.

Вчера, Лоеб и неговиот совозач Фабијан Луркин имаа тешка несреќа на самиот старт на третата етапа од релито, но успеаја да продолжат и да го доведат својот прототип „Дачија Сандрајдер“ до целта и покрај тоа што загубија повеќе од еден час.

Сепак, последователната проверка на автомобилот откри дека дел од ролната на автомобилот е свиткана и затоа екипажот е исклучен, а „Дачија“ изјави дека ќе се жали на одлуката.

-Навистина е разочарувачки што мораме да се вратиме во Џеда наместо да ја продолжиме борбата. Видовте што се случува со болидите. Еден час и 15 минути од лидерот ништо не е загубено. Да, ќе почневме поназад, но ќе имавме шанса да постигнеме нешто, изјави Лоеб.

Легендарниот возач вчера потроши време и на самата несреќа - превртувањето со голема брзина.

-Немам зборови да објаснам што се случи. Не притискав многу, но беше многу непријатна компресија и задникот отскокна, едноставно е. Во овој момент не можев многу да направам. Се случуваат такви работи, но тоа не ја прави ситуацијата помалку непријатна, призна Французинот.

Тој даде мислење и за одлуката на ФИА по проверката на неговиот болид.

-Вчерашната одлука е многу тешко да се прифати. За мене ова е непријатно и разочарувачко, бидејќи според мене на оваа одлука и недостасуваат цврсти аргументи. Се разбира, безбедноста е супер важна, тоа го разбирам. Но, лимитот поставен од ФИА се чини дека не е многу погоден за нашата дисциплина бидејќи се натпреваруваме во екстремни услови. Нашиот тим обезбеди докази за да докаже дека ролната останува цврста и силна, имам целосна доверба во тимот. Дури и со голо око, можете да видите дека нема компромис за безбедноста. Да, ова е тешко да се прифати, изјави уште Лоеб. /МИА

Живот

Невработеноста во САД останува 4,2 отсто, помал број Американци пријавиле невработеност

Бројот на Американци кои примаат надоместок за невработеност неочекувано се намалил минатата недела, а тоа укажува на стабилност на пазарот на трудот на почетокот од годината, додека стапката на невработеност се предвидува да остане 4,2 отсто.

Иако на почетокот од годината бројот на барања за надоместок за невработеност обично е нестабилен, годинава овој показател можеби е поврзан со ниското ниво на отпуштања. Стабилноста на пазарот на трудот е потврдена со податоците објавени во синоќа што кои покажуваат раст на бројот на работни места во ноември: на секој невработен имало 1,13 отворени работни места, споредено со 1.12 во октомври.

Се очекува дека состојбата на пазарот на трудот во САД да овозможи Федералните резерви (американската Централна банка) во јануари да не вршат интервенција со каматните стапки.

Во САД во ноември биле отворени 227.000 нови работни места. Се прогнозира дека стапката на невработеност ќе остане непроменета и ќе изнесува 4,2 отсто.

Сепак, иако нивото на отпуштања останува ниско споредено со историските податоци, вработувањето во САД е забавено. Некои од оние што останале без работа бараат нова работа со месеци./МИА

Свет

Шејнбаум: „Мексикански залив“ е меѓународно признато име

Трамп вчера најави дека ќе го смени името на Мексиканскиот залив во Американски залив

По вчерашната изјава на новоизбраниот американски претседател Доналд Трамп за неговата идеја за преименување на Мексиканскиот Залив во „Американски Залив на Америка“, претседателката на Мексико Клаудија Шејнбаум денеска посочи дека „Мексиканскиот залив“ е меѓународно признато име и дека Трамп „живее во минатото““.

-Мислам дека на претседателот Трамп погрешно му кажале, му кажале дека Фелипе Калдерон сè уште е претседател. Но, не, во Мексико луѓето се одговорни, рече Шејнбаум на прес-конференција, пренесуваат британските медиуми.

Калдерон го водеше Мексико од 2006 до 2012 година.

Шенјбаум покажа карта на поранешно Мексико, која ги вклучува териториите кои сега се дел од Соединетите Американски Држави.

-Мексиканска Америка, тоа звучи убаво, рече Шејнбаум.

Трамп вчера најави дека ќе го смени името на Мексиканскиот залив во Американски залив./МИА

притисни ентер