Според него тоа што исчезнал овој документ од архивата на правда, ќе значи предизвик во реализација на реформите во судскиот совет за кој оценската мисија даде конкретни забелешки. Филков најави дека од поранешниот министер ќе бара одговорност за овој случај.
-Иако документот е класифициран, истиот е земен од мојот претходник и Министерството за правда не располага со него. Затоа, се потпираме на електронски верзии на дел од документите кои ги содржат препораките, без официјално образложение и без допис од ЕК. Тоа е прашање за мојот претходник – што правел и каде го однел документот. Кај нас постапката е во тек, се утврдува одговорност и ќе бараме одговорност. Игор Филков – министер за правда.
Освен исчезнатите документи, Филков вели дека наследил и празен буџет, неплатени фактури, нефункционален возен парк, додека во подрачните одделенија затекнал несразмерен број на вработени во однос на нивниот обем на работа.
-Целосно испразнет кабинет од потребна документација. Но преполн со тукушто набавени чадори, маици, торби, чаши и други предмети, секое во количина од над 200 парчиња и неплатена фактура од 956 илјади денари за добавувачот на истите. Непостоење на евиденција за добивање и користење на мобилни уреди, лаптопи и електрични скутери.. Игор Филков – министер за правда.
Поранешниот министер Лога ги негира сите обвинувања- вели дека довеливиот дел од писмото од оценската мисија стои архивирано во правда, а истото тогаш било испратено и до претседателот на работната група, академик Камбовски. Тој тврди и дека не оставил долгови, набавките биле за кампањи на министерството, а уредите за највредните вработени.
-Писмото од Оценската мисија е добиено по електронски пат, исто како што го добија и вицепремиерот Маричиќ, претседателот на Судскиот совет Сашко Горгиев и други. Еден дел од писмото беше наменет за јавноста, додека другиот беше класифициран само за министерот. Тоа писмо е архивирано од службено лице во Министерството кое ракува со доверливи материјали. Министерството нема долгови, бидејќи на време беа подмирени сите фактури. Наместо да бидете среќни што го имате материјалот со кој јас не располагав, вие неосновано критикувате зошто сите тие матерјали се двојазични односно и на албански јазик. – стои во писмениот одговор од Кренар Лога.
Обвинувањата до претходникот, министерот Филков ги упати од прес конференцијата по повод 100 дена влада. Во отчетот кажа дека поставиле темел за подлабоки промени во правосудството, а за следниот период најави и формирање на нова работна група за судски совет, како и јавни дебати за законите за судскиот совет и советот на јавни обвинители.