Здравје

Изедов 720 јајца за еден месец – Никој не очекуваше вакво нешто со холестеролот

Доктор извел експеримент – резултатите изненадиле.

Многу луѓе кои вежбаат и здравствени гуруа јајцата ги сметаат за суперхрана. Сепак, советите на лекарите често се спротивни - тие јајцата ги сметаат за извор на холестерол кој може да го зголеми ризикот од срцеви заболувања. Јајцата со децении се демонизирани бидејќи изобилуваат со холестерол, особено во жолчката, а многу експерти предупредуваат на потенцијалните здравствени ризици.

Сепак, новите истражувања покажуваат дека овој страв можеби не е целосно оправдан.

Експериментот на еден доктор го шокираше светот

Една неодамнешна студија на д-р Ник Норвиц, докторант на Универзитетот Харвард, предизвика внимание. Тој одлучил да консумира 720 јајца за еден месец - во просек 24 јајца дневно - за да го испита нивното влијание врз нивото на холестерол. Резултатите беа изненадувачки: неговото ниво на липопротеини со ниска густина (ЛДЛ), познат како „лош“ холестерол, паднало за 18 проценти.

Д-р Норвиц, кој докторирал за метаболизмот на човечкиот мозок на Универзитетот во Оксфорд, истакнал дека неговиот експеримент имал за цел да покаже дека јадењето јајца не мора нужно да го зголемува нивото на холестерол.

„Претпоставував дека консумирањето 720 јајца во еден месец, што е околу 133.200 мг холестерол, всушност ќе го намали мојот ЛДЛ холестерол, и тоа се покажа како точно“, изјавил тој.

Во својот експеримент, кој предизвика големо внимание на социјалните мрежи, д-р Норвиц покажа како јајцата влијаат на неговиот метаболизам.

– Иако значително го зголемив внесувањето холестерол, ЛДЛ холестеролот всушност ми се намали, додаде тој.

Во овој контекст, важно е да се забележи разликата помеѓу лошиот холестерол (LDL) и липопротеините со висока густина (HDL), односно „добриот“ холестерол кој помага во отстранувањето на вишок холестерол од крвотокот.

Зошто јајцата не го зголемуваат нивото на холестерол?

Истражувачите понудија хипотеза зошто јајцата не го зголемуваат нивото на холестерол. Имено, во цревата холестеролот се врзува за рецепторите кои го поттикнуваат ослободувањето на хормонот холесин, кој му сигнализира на црниот дроб да го намали производството на ЛДЛ.

Покрај тоа, Норвиц за време на експериментот, го прилагодил консумирањето јаглехидрати, и се фокусирал на овошјето, што дополнително придонело за намалување на нивото на ЛДЛ.

- Кога се зголемува внесот на јаглехидрати, нивото на ЛДЛ се намалува бидејќи телото добива повеќе енергија од тие намирници, објаснил тој.

Коментарите на гледачите на неговото видео го нагласуваат интересот за оваа тема. Еден корисник истакнал дека знаел оти неговиот LDL нема да се зголеми, додека друг го споделил своето искуство од долгогодишното консумирање јајца без никакви здравствени проблеми.

Овие студии отвораат нови прашања за традиционалниот пристап кон исхраната и холестеролот и бараат понатамошно истражување за вистинската улога на јајцата во исхраната на луѓето. Докажано е дека перцепцијата за јајцата како нездрави може да се промени, а со новото знаење, можеби е време да се преиспита стариот мит.

Свет

Авион итно слета поради чуден мирис во кабината, стјуардеса заврши во болница

Стјуардеса на австралискиот Qantas била итно пренесена во болница откако „необичен мирис“ вчера довел до неочекувано пренасочување на летот.

Боингот 737 бил во воздух повеќе од два часа пред да слета на пистата на аеродромот Кингсфорд Смит во Сиднеј, нешто по 21 часот, според податоците објавени на веб-страницата Flight Aware.

Компанијата „Квантас“, која е национална авиокомпанија на Австралија, одговорила за Фокс Бизнис дека чудниот мирис во авионот предизвикал пренасочување на летот.

„Авионот од Сиднеј до Велингтон се врати во Сиднеј откако беа примени извештаи за необичен мирис во кабината“, рече портпаролот.

„Авионот безбедно слета и ќе биде прегледан од инженери пред да се врати во употреба“.

Портпаролот додаде дека стјуардеса била пренесена во болница на лекарски преглед, но не ги откриле нејзините симптоми или здравствената состојба. Патниците и пилотите не биле загрозени.

Наводно, немало чад во кабината и пренасочувањето не било третирано како итно слетување.

Претставник на компанијата додаде дека Qantas работи на обезбедување сместување и алтернативи за патниците погодени од пренасочувањето.

„На патниците ќе им биде обезбедено сместување и ќе бидат пренасочени на следниот достапен лет“, се вели во соопштението.

„Се извинуваме што им го прекинавме патувањето и им благодариме за разбирањето.“

Qantas активно го истражува инцидентот. Засега нема дополнителни информации.

Регион

Жител од поплавената Јабланица: Синот одеше зад мене, кога го однесе бран од три метри (ВИДЕО)

Мухамед Беговиќ од Јабланица го загубил синот во поплавите што рано утринава го зафатија овој град.

Тој за порталот „Аваз“ изјави дека сѐ се случило во рок од 15 минути.

„Во куќата беа син ми, невестата, сопругата, внукот и внуката. Почнавме да излегуваме од дома. Синот одеше зад мене, малку се сврте и дојде голем бран. Веројатно беше три метри. Синот само исчезна. Каде да одам сега? Освен мојот син, другите преживеаја, сите сме згрижени, има каде да спиеме.“

Автомобилизам

Cybertruck е повторно повлечен- Тесла се соочува со нови проблеми

Tesla се соочува со нов проблем на својот футуристички Cybertruck, овој пат поврзан со задната камера, што бара итна поправка.

Овој проблем влијае на 27.000 возила произведени помеѓу ноември 2023 и септември 2024 година, што значи дека практично сите модели на Cybertruck на патиштата ја бараат оваа поправка.

Според извештајот доставен до американската Национална управа за безбедност на сообраќајот на патиштата (NHTSA), проблемот е поврзан со доцнењето во прикажувањето на сликата од задната камера, која може да се појави дури по 8 секунди кога се префрла во рикверц. Ова доцнење може да влијае на способноста на возачот јасно да ја види ситуацијата зад возилото, зголемувајќи го ризикот од судар. Од Тесла наведуваат дека досега немало несреќи, повредени или смртни случаи поврзани со овој проблем.

Tesla најави дека ќе го поправи овој дефект со бесплатно ажурирање на софтверот, но додека тоа не биде достапно, ги советува возачите да ги користат своите ретровизори и да извршат визуелна проверка при возење наназад.

Ова е петто повлекување по ред што влијае на Cybertruck од неговото лансирање во ноември 2023 година, а исто така е најголемо до сега. Претходните повлекувања вклучуваат проблем со капакот на педалот за гас, што може да предизвика несакано забрзување на возилото, како и проблем со преголемиот бришач на шофершајбната што може да откаже.

Иако Tesla се обидува да ги реши овие проблеми со ажурирања на софтверот, оваа серија на повлекувања покренува прашања за доверливоста и квалитетот на Cybertruck. Сепак, компанијата покажа брзина и ефикасност во решавањето на проблемот без потреба од носење на возилото до сервисен центар.