Македонија

Заврши Форумот за млади од Западен Балкан во Берлин

Алберт Хани изјавил дека преку Берлинскиот процес како платформа за соработка се постигнало многу во изминатите десет години, но, дека младите всушност се вистинската движечка сила на овој процес.

Покрај стремежите кон европска интеграција и поголема демократизација на регионот, младите луѓе од Западен Балкан ги обединуваат заеднички предизвици, а зголемената соработка меѓу млаадите е клучен чекор кон помирување и надминување на денешните проблеми. Оваа порака беше пренесена на Форумот за млади од Западен Балкан, одржан вчера и денеска во главниот град на Германија, Берлин, се наведува во денешното соопштение.

- Организиран од Регионалната канцеларија за соработка на младите (RYCO), Германско-француската младинска мрежа (OFAJ DFJW) и непрофитната организација „Бургер Европеас“, под покровителство на Самитот на Берлинскиот процес, Форумот за млади од Западен Балкан собра повеќе од 100 учесници, меѓу кои претставници на владите од регионот, претставници од земјите на Европската Унија и институциите на ЕУ, како и млади луѓе од Западен Балкан и европските држави. Оваа година, Форумот беше фокусиран на одбележувањето на десетгодишнината од Берлинскиот процес, што беше можност за учесниците да се осврнат на постигнатите резултати и да ги разгледаат идните чекори за унапредување на соработката меѓу младите во регионот, пишува во соопштението до јавноста.

Во своето обраќање на отворањето на Форумот, генералниот секретар на RYCO, Алберт Хани изјавил дека преку Берлинскиот процес како платформа за соработка се постигнало многу во изминатите десет години, но, дека младите всушност се вистинската движечка сила на овој процес.

- Вие сте архитекти на иднината и гласот на промената. Вашата енергија, креативност и решителност нè инспирираат сите нас да се стремиме кон подобар и поуспешен регион, се наведува во писмената изјава на Хани, кој ги повикал регионалните и европските институции да обезбедат уште посилна поддршка за поактивно вклучување на младите во процесите на одлучување, поттикнување на соработката и надминување на предизвиците од минатото.

Тој нагласил дека основањето на RYCO во рамките на Берлинскиот процес, испраќа силна политичка порака дека владите од регионот се подготвени за соработка, но, дека постоењето на RYCO се темели не на интереси, туку на вредности.

- Нашата мисија е да ги разбиеме стереотипите, да ги надминеме поделбите и да ги охрабриме младите да преземат одговорност за својата иднина и за иднината на регионот. Ставајќи ги младите во центарот на вниманието, ние работиме на создавање услови за напредок на регионот и создавање средина, каде младите од Балканот ќе бидат рамо до рамо со своите врсници од земјите на ЕУ, се додава во соопштението.

Генералниот секретар Хани додал дека преку програмите и иницијативите на RYCO се организирани повеќе од 400 активности, директно вклучени или оспособени се околу 60.000 млади, а поддржани се над 240 организации од граѓанското општество. Тој кажал дека во следниот период, RYCO ќе продолжи да ги поддржува младите преку нови проекти и иницијативи за понатамошно зајакнување.

Говорејќи на Форумот за млади од Западен Балкан, директорот за Западен Балкан во германското сојузно Министерство за надворешни работи, Мајкл Рајфенштеул, ја истакнал важноста на Берлинскиот процес, особено во делот на приближување на Западен Балкан кон Европската Унија.

- Соработката се одвива како внатре во самиот регион, така и во делот на поврзување со европските земји, и тоа го гледаме на полето на трговијата, размената и интеракцијата, рекол Рајфенштеул.

На Форумот учествувал и министерот за социјална политика, демографија и млади, Фатмир Лимани, исто така член на Управниот одбор на RYCO.

Говорејќи на панелот „Европскиот проект низ призмата на младите“, министерот изјавил дека младите претставуваат клучна демографска група која го обликува идентитетот на Европа.

- Вклучувањето на младите од Западен Балкан е исклучително важно, бидејќи тие и според аспирациите и географски припаѓаат на Европа и затоа нивниот глас, аспирации и предизвици мора да бидат дел од нашите политики, истакнал министерот.

Тој додал дека младите се и сегашноста и иднината и од нив зависи какво општество ќе имаме, додека од институциите зависи да им овозможат ресурси, пристап и вклученост во реализацијата на нивните идеи.

- Заедно, не само на локално, туку и на регионално ниво, можеме да направиме многу повеќе за сите млади да имаат еднакви шанси за напредок. Ве повикувам да работиме заедно и оваа десетгодишнина на Берлинскиот процес нека биде поттик за нови идеи, нови иницијативи и нова енергија за мир, стабилност и просперитет на Западен Балкан, рекол министерот.

Во рамки на вториот ден од Форумот, на панелот што се фокусирал на динамиката на соработката на младите од Западен Балкан, учество зела и заменичката министерка за европски прашања, Викторија Трајков. Таа истакнала дека младите треба да ги користат програмите за размена како што се „Еразмус плус“ и други програми што придонесуваат за поврзување на младите луѓе во регионот и пошироко.

Форумот исто така бил можност да се најави отворањето на шестиот повик за финансирање на проекти на граѓанските организации во регионот, со цел обезбедување нови можности за соработка и мобилност на младите.

- Форумот за млади од Западен Балкан се организира континуирано од 2021 година во рамките на Самитот на Берлинскиот процес и претставува единствена платформа за директно вклучување и поврзување на младите, како и на професионалците кои работат во секторот за млади на регионално и европско ниво, се истакнува во соопштението.

Култура

Премиера на претставата „Бог на колежот“ на 24 декември

Во Македонскиот народен театар на 24 декември ќе се одигра премиерната изведба на претставата „Бог на колежот“, по мотивите на „God of Carnage“ на Јасмина Реза, а во адаптација и режија на Весна Петрушевска.

Ова е седмиот проект на Македонскиот народен театар во оваа сезона.

Во претставата играат Ѓорѓи Јолевски, Дарја Ризова, Симеон Мони Дамевски, Наталија Теодосиевa како и децата од Актерската школа на Весна Петрушевска.

Преводот на текстот е на Рајна Кошка-Хот, како сценограф се потпишува Татјана Христоска, костимограф е Наталија Терзија, а сценските движења се на Кренаре Невзати-Кери.

Изборот на музиката е на Весна Петрушевска, а автор на сонгот „Пепел и мрак" е Игор Џамбазов.

-Оваа копродукциска претстава нуди можност да се погледнеме кои сме макар на 90 минути за време кога публиката е учесник во арената, се вели во соопштението на МНТ.

Првата реприза е закажана за 25 декември.

Македонија

Обвинителството ги истражува причините за смртта на декан на Економски факултет Скопје

Обвинителството ги истражува причините за смртта на професорот Кожухаров, декан на Економски факултет Скопје

Обвинителството ги проверува причините за смртта на лицето во водите на Црна Река. Се работи за професорот д-р Сашо Кожухаров, декан на Економски факултет и проректор за наука и развој на Универзитетот „Скопје“, кој беше најден мртов во својот автомобил излетан во Црна река, потврдуваат од Обвинителството.

Оттаму појаснуваат дека Основното јавно обвинителство Кавадарци презема повеќе дејствија за испитување на причините за смртта на 64-годишен скопјанец, кој на 16 декември беше пронајден починат во својот автомобил во водите на Црна Река, на територија на Општина Росоман.

- Веднаш по настанот беше извршен увид на лице место, а при првичниот преглед на телото на починатиот не се констатирани видливи траги на насилство. Издадена е наредба за обдукција, а обдукцискиот наод се уште се изготвува и не е доставен до обвинителството. Освен тоа, наредени се и дополнителни лабораториски анализи, соопштија од Обвинителството.

Со цел испитување на настанот, надлежниот јавен обвинител издал и барања до мобилни оператори за проверка на листинзи и податоци од базни станици за евентуална телефонска комуникација.

- Воедно, од АД ЕСМ – Подружница ХЕЦ Тиквеш побарани се информации дали во временскиот период на настанот е вршено испуштање вода од браната на хидроелектраната и дали при таков испуст се подига значително нивото на водата во Црна Река на критичната локација. Врз основа на сите овие наоди и информации, Основното јавно обвинителство Кавадарци целосно ќе го провери настанот, се вели во известувањето од Обвинителството.

Македонија

Презентирани научните трудови во рамки на 53. сесија на Клубот на истражувачите

Во рамките на 53. сесија на Клубот на истражувачите, во Народната банка се одржа презентација на научните трудови „Хиерархиска економска анализа на меѓународната трговија со услуги“.

Во рамките на 53. сесија на Клубот на истражувачите, во Народната банка се одржа презентација на научните трудови „Хиерархиска економска анализа на меѓународната трговија со услуги“ од авторите Филип Насковски, Мартин Бојковски, Димитар Пешевски и Димитар Трајанов.

Исто така беше презентирано и делото „Проценка на ефикасноста на јавните трошења во земјите од Југоисточна Европа – ДЕА техника за анализа на податоци“ од авторите Весна Гарванлиева Андонова и Борче Треновски.

Како што соопштија од Народната банка, сесијата ја отвори директорката на Дирекцијата за монетарна политика и истражување Билјана Давидовска-Стојанова, која истакна дека придобивките од трудот на авторите Насковски, Бојковски, Пешевски и Трајанов се значајни, поради фактот што овој труд става акцент на улогата на трговијата со услуги како битен фактор за економскиот раст и структурната трансформација, пред сѐ за помалите економии, процес којшто е зајакнат од развојот на дигитализацијата и ИТ-технологиите.

Трудот од авторите Весна Гарванлиева Андонова и Борче Треновски е значаен со оглед на тоа што подобрувањето на ефикасноста на јавниот сектор може го подобри фискалниот простор и да има позитивни влијанија врз економскиот раст во земјите од Југоисточна Европа.

Во трудот „Хиерархиска економска анализа на меѓународната трговија со услуги“ авторите ја истражуваат динамиката на глобалната трговија со услуги, вклучувајќи 137 земји заради откривање на поврзаноста, тековите на трговијата со услуги, како и конкурентните предности на одделните земји, вклучително и нашата економија, во рамките на глобалните и регионалните трговски екосистеми.

-Според анализата, градежништвото, останатите транспортни услуги и компјутерските услуги се секторите каде што е увидена конкурентна предност на македонската економија. Притоа, компјутерските и ИТ-услугите бележат силен раст, особено во периодот од 2012 до 2022 година и се еден од најперспективните сектори коишто треба да се искористат за посилен економски раст, а можностите за регионална соработка и добро водење политики придонесуваат за унапредување и зајакнување и на останатите помалку конкурентни сектори во економијата, соопштија од Народната банка.

Трудот „Проценка на ефикасноста на јавните трошења во земјите од Југоисточна Европа – ДЕА техника за анализа на податоци (Data envelopment analysis)“ од авторите Весна Гарванлиева Андонова и Борче Треновски ги истражува остварувањата на јавната потрошувачка на земјите од Југоисточна Европа, (ЈИЕ) за периодот 2010 – 2021 година, преку непараметриска анализа, односно оцена на границата на ефикасност.

Авторите ја користат оваа техника и за оцена на ефикасноста на трошењата во образованието, здравството и инфраструктурата. Заклучокот на авторите е дека остварувањата на земјите се разликуваат од аспект на ефикасноста на нивните јавни расходи и дека за земјите во регионот постои простор за унапредување на ефикасноста во сите три сектори.

Следната сесија е планирана за март следната година.