Технологија

Видео: Погледнете ја трката на два роботи: Едниот во патики, другиот трча бос

„Robot Era“, компанија која развива хуманоидни роботи, повторно го привлече вниманието на технолошките ентузијасти ширум светот.

Откако пред неколку месеци го покажа својот „XBot-L“ како оди по Кинескиот ѕид, компанијата сега објави снимка од два модели на „Star1“ кои трчаат низ пустината Гоби.

Трчањето во пустината со голема брзина овозможува поглед на потенцијалната иднина на хуманоидните роботи дизајнирани за реални средини.

Видеото е снимено кон крајот на минатиот месец и прикажува два хуманоидни роботи „Star1“ како се тркаат низ пустината. Тие се движат по карпести патеки, тревни површини и кривулести патишта.

Еден од роботите трча „бос“, додека другиот носи патики, кои, како што се испостави, одиграа значајна улога во исходот на трката.

Иако „Robot Era“ не откри многу детали за роботот „Star1“, знаеме неколку клучни спецификации: висок е 171 cm и тежи 65 kg .

Во трката во пустината, роботот со патики тргна зад својот противник, но брзо ја намали разликата. „Robot Era“ објави дека „Star1“ облечен во чевли достигнал брзина од околу 13 km/h и успеал да остане во водство цели 34 минути.

Извор: Б92

Регион

Кривични пријави за 7 опозициски пратеници за вчерашниот хаос парламентот во Тирана (ВИДЕО)

Полицијата во Тирана до Специјалното обвинителство за борба против корупција и организиран криминал, СПАК, поднесе кривични пријави против 7 пратеници од опозицијата, кои вчера предизвикаа хаос и насилство внатре и надвор од Собранието.

По извршените истражни дејствија, материјалите ги доставивме до СПАК. За пратеничката Елда Хоти (32) за сторено кривично дело „Заплашување“ и „Повреда на правилата за отровни материи“, за пратениците Фламур Нока (53), Бледион Налбати (38), Газмент Барди (39), Дашнор Сула (55), Луан Бачи (61) година и Саимир Кореши (43) за сторено кривично дело „Спротивставување на полициски службеници“, соопшти полицијата.

Вчера во собраниската сала на пленарна седница, пратеничката Елда Хоти фрли пиротехнички средства и шише со течност, но обезбедувањето успеа навреме да ја неутрализира состојбата. Веднаш потоа претседателката на парламентот Елиса Спиропали ја исклучи од седницата Хоти и уште двајца нејзини сопартијци. А поради мирисот на бензин во салата, Спропали, даде подолга пауза.

Останатите осомничени пратеници истурале бензин и насилно се спротивставиле на полицајците и гардистите пред собраниската зграда.

Реагираше, Газмент Барди, координатор на пратеничката група на демократите, наведувајќи дека „опозицијата не е обвинета дека за само една година украла 180 милиони од државниот буџет“ индиректно обвинувајќи ја власта.

-Опозициските пратеници не се обвинети дека за само една година украле 180 милиони од државниот буџет од незаконската купопродажба на енергија. За ова е формирано Специјалното обвинителство, да се бори против корупцијата и кражбите од државниот буџет, изјави Барди.

Според него, деградацијата на сите нивоа на МВР, е очекувана затоа што „полиција која не може да се бори против организираниот криминал се занимава со пратениците од опозицијата“.

Свет

Страшно невреме опустоши делови од Франција, невидено во последните 40 години (ВИДЕО)

По обилните дождови што вчера го зафатија југоисточниот дел на Франција, десет француски департмани денеска остануваат под портокалово предупредување за дождови и поплави.

По обилните дождови што вчера го зафатија југоисточниот дел на Франција, десет француски департмани денеска остануваат под портокалово предупредување за дождови и поплави, а премиерот Мишел Барние најави активирање на процесот на природна катастрофа во загрозените подрачја.

Најпогодена е областа Ардеш, каде во рок од 48 часа паднале повеќе од 600 милиметри дожд на квадратен метар, но од катастрофата биле погодени и областите на Приморските Алпи, Атлантските Пиринеи и Севените.

Барние рече дека 2.300 интервенции на спасувачките служби овозможиле да се спасат многу животи, пренесува телевизијата БФМ.

„Во изминатите 40 години во Франција не се забележани врнежи од ваков размер“, посочи тој во обраќањето пред медиумите во Оперативниот центар за меѓуресорско управување со кризи на МВР.

Барние истакна дека сега приоритет е воспоставувањето на патниот и железничкиот сообраќај меѓу Сент Етјен и Лион.

Тој рече и дека сега доаѓа проценката за причинетата штета која, како што истакна, е голема.

Тој најави и спроведување на процесот на елементарни непогоди во погодените општини со што ранливите жители ќе добијат отштета.

Тој испрати порака за солидарност и поддршка до сите погодени сонародници и спасувачките служби и предупреди дека, со климатските промени, сите мора да се подготват да се соочат со ризици и катастрофи во сите области и почесто, нагласувајќи дека „превенцијата е поевтина од елиминирањето на штетите“.

Според Барние, Министерството за внатрешни работи активирало нова услуга, наречена FR-Alert, која овозможува испраќање СМС пораки со предупредувачки сигнал до сите жители на ризичните подрачја.

„Овие превентивни системи ќе ни овозможат да го избегнеме најлошото сценарио. Ќе останеме будни“, заклучил тој.

Француската метеоролошка служба денеска укина четири црвени предупредувања за дожд и поплави - во областите Рона, Лоара, Горна Лоара и Лозер - додека југоисточниот дел на земјата и понатаму е под портокалова тревога.

Дождот се уште врне над Приморските Алпи, понекаде пропратен со невреме, а ќе продолжи да врне и над југозападните делови од земјата, на места во големи количини, соопшти Метеоролошката служба.

Свет

НАТО стартува со вселенски план за Арктикот за да му се спротистават на Путин

Вчера НАТО алијансата започнала со планови за развој на воена сателитска комуникациска мрежа за Арктикот, со цел зајакнување на одбраната од сè поагресивните потези на Русија на север.

На маргините на состанокот на министрите за одбрана на НАТО во Брисел, група од 13 земји се согласија да ја унапредат иницијативата „Northlink“ за изградба на вселенски комуникациски системи низ Арктикот со помош на постоечки комерцијални сателити, објави „Политико“.

Планот вклучува „експлоатација на услуги од соѕвездија на комуникациски сателити“ за да се понуди сигурна „мултинационална комуникациска мрежа за Арктикот“, соопшти НАТО.

Алијансата не управува со сопствени сателити, но откако вселената беше прогласена за петти воен простор на НАТО во 2018 година, следната година беше отворен вселенски команден центар во воената база Рамштајн во Германија.

Русија, која се граничи и со Арктикот, неодамна ги зголеми своите операции во регионот, предупредувајќи на можни напади врз сателити во областа.

Данска, Канада, Исланд, Норвешка и САД ја контролираат територијата на Арктикот и се членки на НАТО, заедно со Шведска и Финска, кои неодамна се приклучија на Алијансата.

Сите тие земји се согласија на писмо со намери за Нортлинк, заедно со Франција, Германија, Унгарија, Италија, Луксембург и Холандија.

Одделно, околу 14 членки на НАТО се согласија да ја започнат таканаречената иницијатива „Starlift“ за работа на обезбедување капацитет за лансирање ракети во четврток.

Тој сојуз ги вклучува Белгија, Финска, Франција, Германија, Унгарија, Италија, Луксембург, Холандија, Норвешка, Шпанија, Шведска, Турција, Велика Британија и САД.

притисни ентер