Свет

Си Џинпинг бара итен прекин на огнот меѓу Израел и Хамас

Кинескиот претседател Си Џинпинг го повтори повикот за итен прекин на огнот во војната меѓу Израел и Хамас, јавуваат државните медиуми.

Кинескиот претседател ги повтори повиците за итен прекин на огнот на сите страни во конфликтот меѓу Израел и Хамас и за ослободување на приведените цивили.

Тој ги даде коментарите додека зборуваше денеска на вонредниот виртуелен самит на БРИКС за палестинско-израелското прашање.

„Во сегашната ситуација, навремено и неопходно е БРИКС да биде глас на правдата и мирот за палестинско-израелското прашање“, рече Си, според извештајот на државната новинска агенција Ксинхуа.

Си, исто така, повика да се запрат сите насилства и напади врз цивили, да се преземат чекори за да се обезбеди безбедно и непречено поминување на хуманитарната помош, да се обезбеди поголема хуманитарна помош за луѓето во Газа и да се запре „колективната казна“ за луѓето од Газа преку присилна миграција и прекин на снабдувањето со вода, електрична енергија и нафта.

„Повеќе пати нагласив дека крајниот начин за решавање на повторливите конфликти меѓу Палестина и Израел е „решението со две држави““, рече Си, додавајќи дека без праведно решение на палестинското прашање, нема да има траен мир и стабилност на Блискиот Исток.

На итниот виртуелен самит присуствуваа Бразил, Русија, Индија, Кина и Јужна Африка.

Јужна Африка претседаваше со виртуелниот самит. Јужноафриканското претседателство соопшти дека лидерите на Саудиска Арабија, Аргентина, Египет, Етиопија, Иран и Обединетите Арапски Емирати, исто така, биле поканети да присуствуваат и да зборуваат.

Си и кон средината на октомври повика на прекин на огнот и рече дека решението со две држави е единствениот излез од конфликтот меѓу Израел и Хамас.

Во тоа време тој рече дека Кина е подготвена да работи со Египет и арапските нации за „промовирање на сеопфатно, праведно и трајно решение за палестинското прашање“, според CCTV, пренесе Си-Ен-Ен.

Свет

Во Франција и утринава нарушен железничкиот сообраќај

Одредени возови во Франција и денеска беа во прекин, еден ден по „масовниот и добро подготвен“ напад врз мрежата на брзите возови (ТГВ), извршен неколку часа пред церемонијата на отворање на Олимписките игри (ОИ) во Париз.

Состојбата се подобрува, но железничкиот сообраќај и денеска ќе биде нарушен, со доцнење на возовите од најмалку еден час.

Француската железница СНЦФ синоќа соопшти дека ќе биде обезбеден превоз за олимписките спортисти и нивниот персонал.

Неколку пожари избувнаа ноќта меѓу четвртокот и петокот на мрежата на ТГВ. Пресечени и запалени се некои кабли, а запалени се и сигнални кутии. Таа опрема покрај специјалната пруга за тој тип возови дава безбедносни информации за машиновозачите.

СНЦФ го означи нападот како саботажа, а париското обвинителство отвори истрага.

Нападот се случил неколку часа пред церемонијата на отворање на Олимпијадата, во време кога многу патници планирале да патуваат во Париз.

За време на викендот околу 800.000 патници ќе бидат погодени од нарушениот железнички сообраќај, кој е омилено и најпрактично превозно средство за Французите.

Култура

Мултимедијален перформанс „Во моите чевли“ на Скопско лето

 Во рамки на јубилејното 45. издание на манифестацијата „Скопско лето“, вечерва ќе се одржи мултимедијален перформанс „Во моите чевли“ во Сули ан, со почеток во 20:30 часот.

Автор и изведувач на проектот е Јована Зајкова, додека костимограф е Соња Геговска – Зајкова.

- Заедно со изведувачот, публиката патува низ палета на различни чевли, кои претставуваат различни карактери, предизвици и гледишта, во внимателен хармонично-хаотичен свет. Оваа приказна во себе содржи многу хумор и дури може да наликува на перформанс наменет за деца. Сепак, во овој лесен и шеговит пристап се крие многу силна порака за отворање на срцето, живеење на животот до максимум и пронаоѓање на убавината во тешкотиите на животот, велат од Дирекцијата за култура и уметност - Скопје.

Авторот и изведувачоте на проектот, Јована Зајкова е професионален танчар и кореограф. Таа ги завршува додипломските студии при Универзитетот „Гоце Делчев“ во Штип во 2020 г., каде што се здобива со диплома за современ танчар под менторство на проф. д-р Рисима Рисимкин. Во тек на студиите Јована стажира како дел од Скопје Танцовиот Театар и учествува во голем број изведби на фестивали во земјата и надвор. Таа се појавува како кореограф и изведувач на повеќе авторски проекти, меѓу кои: „Парадоксот на Диоген“, „УПМ“, „Јовано, Јованке“, „Самовили и демони“. Во 2023 г. Јована го кореографира солото „Во моите чевли“ со кое настапува на фестивали во Полска, Србија, Белгија, Германија и Хрватска. Покрај работа како професионален танчар на сцена, во музички спотови и реклами, Јована држи часови по танц и работилници за деца и возрасни.

Регион

Претседателката на албанскиот Парламент, Линдита Никола, поднесе оставка од функцијата

Претседателката на албанскиот Парламент, Линдита Никола, доцна синоќа поднесе оставка од функцијата.

Таа самата ја соопшти веста додека зборуваше во Собранието, откривајќи дека причината за оваа оставка е поврзана со нејзината здравствена состојба.

- Почитувани колеги од парламентарното мнозинство и почитувани колеги од парламентарната опозиција. Овде денеска завршува мојот 3-годишен ангажман на чело на Собранието. Поради мојата здравствена состојба, не можам да ја извршувам високата должност на вториот државен функционер на државата, со потребната посветеност што ја повлекува оваа должност, рече Никола од собраниската говорница.

Секојдневно, додаде, се трудев да дадам се од себе за да се обезбеди непречено одвивање на работата во оваа сала.

- Ако некому сум оставила поинаков впечаток, го уверувам дека тоа не ми била намерата. Ако сум згрешила, не сакајќи, се извинувам. Кон сите го имам убавото чувство на почит што сите ми ја упатувате. Ви благодарам на сите, посочи таа.

Линдита Никола(59) е позната универзитетска професорка. Пред да биде избрана за парламентарец таа беше министерка за образование.

притисни ентер