Тенис

Надал уште не оди во пензија- Алкараз му даде нова шанса со нерешен резултат против Холандија

По поразот на Рафаел Надал, Шпанија не беше во завидна позиција во четвртфиналната пресметка од Дејвис купот против Холандија, но Карлос Алкараз израмни на 1:1 совладувајќи го Талон Грикспор со 7:6(0), 6: 3 .

По поразот на Рафаел Надал, Шпанија не беше во завидна позиција во четвртфиналната пресметка од Дејвис купот против Холандија, но Карлос Алкараз израмни на 1:1 совладувајќи го Талон Грикспор со 7:6(0), 6: 3 и на тој начин му донесе надеж на „бикот од Мајорка“ да може барем уште еднаш да се појави пред публиката во Малага.

Како што е веќе познато, Надал најави дека натпреварите на Дејвис купот оваа сезона ќе бидат негови последни професионални ангажмани во кариерата, а по спектаклот полн со емоции и поразот од Ботик Ван де Зандшулп (2:0), Шпанците дојдоа до ситуација Рафа никогаш повеќе да не го гледаат на теренот.

Потребно е Шпанија да обезбеди полуфинале за во петок Надал барем уште еднаш да ја поздрави публиката, а триумфот на Алкараз е чекор кон тоа достигнување.

Карлитос немаше лесна работа против Грикспор, кој знаеше да натера да настрадаат многу фаворити, па првиот сет мораше да се решава преку тај-брејк.

Публиката практично мораше да навива за три цели - Алкараз да слави, Шпанија да опстане и Надал да игра барем уште еднаш.

Следеше шок и тишина на трибините кога Холанѓанецот направи брејк со нула во шестиот гем (4:2), а додека дел од трибините во портокалово се радуваа, веќе следуваше риб-брејк и потврда за уште еднаш нерешено.

Карлос почна сѐ посилно да замавнува со форхендот, пропушти можност за брејк во деветтиот гем, но потоа во тајбрејкот со седум последователни поени покажа во која насока ќе оди овој меч.

Убедливите 3:0 во вториот сет по само 10 минути игра значеа дека прашањето за вториот меч исчезна, а сега се очекува финалната битка која ќе го даде конечниот одговор.

На терен ќе излезат двојките, а според најавата од почетокот на денот тоа ќе бидат Карлос Алкараз и Марсел Гранољерс на едната страна и Ботик Ван де Зандшулп и Весли Колоф.

НБА

Пол Џорџ не го заврши натпреварот против Мемфис поради повреда

Кошаркарот на Филаделфија, Пол Џорџ одигра само 17,5 минути ноќеска на натпреварот со Мемфис во НБА-лигата.

Џорџ не можеше да му помогне на својот тим кој загуби со резултат 111:117. Тој повторно го исчаши левото колено. Истата повреда кошаркарот ја доби пред еден месец.

До моментот на напуштање на теренот Џорџ успеа да постигне 2 поени, 4 скока и 2 асистенции, со шут од поле 1 од 6.

Филаделфија е последна во Источната конференција со биланс две победи и 12 загубени натпревари.

Македонија

Во Струмица се поставуваат контејнери за селектирање на отпадот

Струмичкото комунално претпријатие почна со поставување на 60 контејнери во две бои-сина за хартија и жолта за пет пластика.

Контејнерите се поставени во дворовите на сите средни и основни училишта, како и на 20 локации низ градот, информираа од ЈПКД „Комуналец“ на нивната официјална страница.

Оттаму напоменуваат дека истите се само за одреден тип на отпад, сини за хартија и жолти за пет пластика, додека депонирање на друг вид отпад во нив е строго забрането и ќе биде санкционирано од страна на инспекциските служби.

-Според законот за управување со отпад ЈПКД „Комуналец“, како фирма која управува со собирањето на отпад, е должна на граѓаните да им овозможи канти во кои согласно истиот закон се должни да вршат примарна селекција на отпад. Под примарна селекција на отпад се подразбира дека секое домаќинство мора одделно во различни канти да става хартија, пет пластиката и останат смет, се наведува во информацијата.

Додаваат дека деновиве дел од домаќинствата кои не добија канти за рециклирање истите ќе им бидат доставени, со што секое домаќинство, покрај стандардната канта за отпад што ја поседува, ќе има и уште една канта за примарна селекција за отпад.

Инаку, контејнерите се набавени преку Министерството за животна средина и просторно планирање со капацитет од еден метар кубен.

Живот

САД покренаа обвинение против индискиот милијардер Адани за поткупи во вредност до 265 мил.дол

Милијардерот Гаутам Адани, претседател на индискиот конгломерат „Адани Груп“ и еден од најбогатите луѓе во светот, е обвинет во Њујорк за вмешаност во шема за давање поткупи во вредност до 265 милиони долари.

Милијардерот Гаутам Адани, претседател на индискиот конгломерат „Адани Груп“ и еден од најбогатите луѓе во светот, е обвинет во Њујорк за вмешаност во шема за давање поткупи во вредност до 265 милиони долари, објавија агенциите, повикувајќи се на американското обвинителство.

Американските власти соопштија дека Адани и седум други обвинети, вклучително и неговиот внук Сагар Адани, се согласиле да платат мито на индиски владини претставници за да склучат договори кои ќе им овозможат профит од 2 милијарди долари во текот на 20 години и да го разработат најголемиот проект за соларна енергија во Индија.

Судот во Њујорк издаде налози за апсење на Гаутам и Сагар Адани, а обвинителите планираат да ги проследат налозите за апсење до странските агенции за спроведување на законот.

Тие, заедно со поранешниот извршен директор на „Адани грин енерџи“, Винет Џејн, се обвинети за заговор за измама со хартии од вредност, а двајцата од семејството Адани ќе се соочат и со граѓански обвиненија поднесени до Комисијата за хартии од вредност на САД.

Пет други лица се обвинети за заговор за кршење на Законот за странски коруптивни практики, американскиот закон против поткуп, а четворица од нив ќе се соочат и со обвиненија за заговор за попречување на правдата.

Ниту еден од обвинетите не е приведен, соопшти обвинителството во Бруклин. Се верува дека Гаутам Адани е во Индија.