Македонија

Министерката за образование апелира под итно да се најде решение за јавниот градски превоз

Министерката за образование и наука Весна Јаневска апелира до градските власти под итно да најдат соодветно решение за јавниот градски превоз.

Според анализата на Министерството за образование и наука од Е-дневник, како што изјави денеска Јаневска, нема значајна разлика во отсуствата на учениците.

- Претпоставувам дека учениците и родителите се организираат најдобро што можат нивните деца да стигнат во училиште, но и наставниците имаат разбирање за ова што се случува. Состојбата е многу лоша и срамота е во главниот град да им се онезвоможи на учениците да добијат соодветно образование што е загарантирано право со Устав. Се надевам дека ќе се најде решение за оваа ситуација затоа што е недозволиво сите напори што ги правиме, промените што се обидуваме да ги спроведеме за подобрување на квалитетот на образованието, да бидат на некој начин спречувани заради неорганизираност на градските власти. Се надевам дека градските власти сериозно ќе ја сфатат оваа ситуација и под итно ќе најдат соодветно решение, изјави Јаневска пред почетокот на потпишувањето на Анексот на меморандумот за соработка меѓу МОН и Амбасадата на Франција.

Јаневска дава поддршка и на студентите кои најавија дека утре ќе се приклучат на протестот пред Град Скопје доколку не се најде решение со јавниот превоз.

- Апсолутно се во право, имаат право својот револт на соодветен начин да го изразат и ако ова е единствениот начин да најдат решение, јас ги поддржувам, рече Јаневска.

Проблемите со јавниот градски превоз кулминираа вчера откако најголем дел од автобусите на Јавното сообраќајно претпријатие не возеа поради недостиг на гориво. Во сообраќај беа пуштени само 25 автобуси кои работат на гас.

За денеска во 18 часот е закажана вонредна сендица на Советот на Град Скопје, а дел од политичките партии побараа оставка од градоначалничката на Град Скопје, Данела Арсоваска.

Македонија

Јаневска: Францускиот јазик е дел од нашата историја

Францускиот јазик е дел од нашата историја, но исто така и нераскинлив дел од нашата европска иднина.

Министерката за образование и наука Весна Јаневска, во име на Министерството и францускиот амбасадор, Кристоф Ле Риголер во име на Амбасадата на Република Франција, денеска потпишаа Анекс на меморандумот за соработка, со кој дополнително ќе се поттикне изучувањето на францускиот јазик во нашиот образовен систем.

Пред потпишувањето на меморандумот, Јаневска изјави дека во Анексот се наведени 25 училишта во целата држава каде ќе се одвиваат средби за презентација на францускиот јазик кај родителите. како и часови за учениците, насочени кон откривање на можностите што ги нуди изучувањето на францускиот јазик.

- Исклучително е значајно учениците да бидат мултијазични, но и да се запознават со различни култури и да ги шират сопствените видици. Дополнително сметам дека е од исклучителна корист учеството во Франкофонијата на Република Македонија, затоа што тоа е можност и за афирмација на нашата култура, нашиот идентитет и нашиот јазик. Македонија и Франција се две европски држави со заеднички стремеж кон јакнење на меѓусебна соработка, што континуирано се продлабочува во сите сфери од заемен интерес, рече Јаневска.

Таа додаде дека присуството на францускиот јазик кај нас, како и членството на нашата држава во Меѓуанродната организација на Франкофонијата го гледа како можност за афирмација на македонскиот идентитет, јазик, историја и богато културно наследство, како и на сите вредности на современото македонско општество, мирот, демократијата, толеранцијата и солидарноста.

-Ова е во интерес на подигнувањето на квалитетот на националниот образовен систем и посакувам овој успех да се остваари. Да ги подготвиме младите со знаење и вештини, кои ќе одговорат на идните потреби, кои и покрај технолошкиот напредок, вклучуваат знаење на странски јзации како алатка, која се поврзува со многу култури, перспективи и можности. МОН како креатор на политики ја промовира посветеноста на јазична различност, а францускиот јзаик се изучува во основното, средното и високото образование, рече министерката.

Како резултат на соработката со амбасадата на Франција и Францускиот институт во Скопје, со Меѓународната организација на Франкофонија и со Регионалното биро за централна и источна Европа, веќе четврт век се организира Летниот регионален семинар во Струга, педагошка обука која обединува на едно место професори по француски јазик од повеќе земји во регионот. Професори по француски јазик и професори кои предаваат други наставни предмети на француски јазик, можат да учествуваат и на летни обуки во Франција.

Министерката Јаневска нагласи дека секогаш е можно постојната соработка да се издигне на уште повисоко ниво, па затоа и во иднина двете страни ќе разговараат за нови заеднички иницијативи.

Францускиот амбасадор, Кристоф Ле Риголер изјави дека потпишување на Меморандумот е доказ дека соработката меѓу македонските образовни институции и Француската амбасада се продлабочува, со цел промовирање и афирмација на францускиот јазик во македонскиот образовен систем.

-Да им се заблагодариме на сите професори коишто помагаат во промовирањето на францускиот јазик и изучувањето на францускиот јазик во училиштата. Но, исто така, ова е одличен доказ дека соработката се повеќе се продлабочува меѓу МОН и македонските образовни институции, заедно со Француската амбасада и со Францускиот институс во Скопје, а се со една поголема цел - промовирање и афирмација на францускиот јазик во македонскиот образовен систем, рече амбасадорот.

Регион

Црна Гора прва од Балканот стана дел од SEPA зоната

Црна Гора официјално се приклучи на Единствената зона за плаќање во евра (SEPA), соопштија денеска Централната банка на Црна Гора (ЦБЦГ) и Европскиот совет за плаќања.

„Црна Гора, под водство на ЦБЦГ, успешно ги усогласи националниот платен систем и регулативата со стандардите на Европската Унија (ЕУ), станувајќи првата земја од Западен Балкан која пристапува кон SEPA“, се наведува во соопштението.

Со ова, од април 2025 година црногорските финансиски институции ќе можат да испраќаат и примаат SEPA кредитни трансфери, моментални трансфери и директни задолжувања со минимални или без никакви трошоци.

Гувернерката на ЦБЦГ, Ирина Радовиќ, истакна дека ова претставува значаен чекор за финансиската интеграција на Црна Гора со ЕУ, додека Џорѓо Андреоли, директор на Европскиот совет за плаќања, го оцени како потврда на европската определба за унапредување на електронските плаќања.

Свет

Обилни снежни врнежи ја погодија Велика Британија, затворени се околу 200 училишта

Обилни снежни врнежи денеска зафатија повеќе делови на Велика Британија пред пристигнувањето на бурата Берт, која се очекува за викендот, а затворени се околу 200 училишта, јавуваат британските медиуми.

Метеоролозите издадоа жолт метеоаларм за голем дел од северна и западна Шкотска, како и за делови од југозападна Англија, јавува Би-Би-Си.

Повеќе од 60 училишта во таа област беа затворени поради невремето, како и 30 во Велс, додека околу 100 училишта во Девон и Корнвол целосно или делумно ја откажаа наставата.

Се очекува бурата Берт во сабота да донесе нови обилни снежни врнежи, дожд и ветрови со јачина до 112 километри на час во некои области.

Автомобилската служба ги предупреди возачите дека доколку тргнат на пат да бидат крајно внимателни во сообраќајот.

Поради снегот откажани се неколку поаѓања на возови во подрачјата погодени од невреме. Температурите во делови од Шкотска се спуштија до 10 степени под нулата, а се очекува ноќеска драстично да се намалат, предупредија метеоролозите.