Фудбал

Менди го тужи Сити поради неисплатени плати

Францускиот фудбалски репрезентативец и поранешен дефанзивец на Манчестер сити, Бенџамин Менди, поднесе тужба против актуелниот европски и англиски првак поради неисплатени плати .

Францускиот фудбалски репрезентативец и поранешен дефанзивец на Манчестер сити, Бенџамин Менди, поднесе тужба против актуелниот европски и англиски првак поради неисплатени плати кои клубот му ги укина откако во 2021 година беше обвинет за силување и сексуално злоставување.

Францускиот фудбалер поднесе тужба во Судот за работни односи барајќи поврат на неисплатените плати во износ од повеќе милиони евра за периодот од септември 2021 до јуни 2023 година, кога му истече договорот со Манчестер сити.

Британскиот суд во јули го прогласи Менди за невин по обвиненијата за силување и обид за силување во повторениот судски процес, откако во јануари беше ослободен од обвинувањата за силување и сексуално злоставување кои против него ги изнесоа повеќе жени.

Манчестер сити одби да ја коментира поднесената тужба од Менди, кој дојде во клубот во 2017 година од Монако во трансфер вреден 70 милиони евра.

Македонија

Шалтерите во Дирекцијата на „Водовод и канализација“ денеска и утре ќе работат до 14 часот

Шалтерите за наплата на „Водовод и канализација“ во дирекцијата на претпријатието денеска ќе работат од 07:30 до 14 часот, а утре од 09 до 14 часот. Наплатните пунктови во Сарај, Шуто Оризари и Лисиче, нема да работат.

Од претпријатието информираат дека од петок продолжуваат со редовно работно време.

Одлуката, како што посочуваат од ЈП „Водовод и канализација“ е во согласност со заклучоците од 199. седница на Владата поради одржување на 30. Министерски состанок на ОБСЕ.

Фудбал

Халанд најбрзо до 40 гола во Лигата на шампионите

Фудбалерот на Манчестер сити, Ерилнг Халанд синоќа беше стрелец во победата на неговиот тим против Лајпциг со 3:2 во натпреварот од 5. коло од групната фаза на Лигата на шампионите.

Норвежанецот на оваа средба го постигна својот 40-ти гол во 35-от натпревар од елитното фудбалско натпреварување.

Халанд е играчот кој најбрзо стигна до 40 гола во Лигата на шампионите. Тој го собори и рекордот на напаѓачот на ПСЖ, Килијан Мбапе и стана најмладиот играч кој постигнал 40 гола во Лигата на шампионите (23 години, 130 дена).

Оваа сезона, 23-годишниот Халанд забележа 20 настапи за Манчестер сити во сите натпреварувања, постигнувајќи 19 гола и четири асистенции.

Свет

Турција очекува да го ратификува приемот на Шведска во НАТО до крајот на годинава

Шефот на шведската дипломатија Тобијас Билстром изјави дека неговиот турски колега Хакан Фидан му рекол дека ратификацијата на приемот на Шведска во НАТО може да се случи „во рок од неколку недели“.

-Го чекаме спроведувањето на ратификацијата. Вчера имав билатерална средба со турскиот министер за надворешни работи Хакан Фидан, на која тој изјави дека очекува ратификацијата да се случи во наредните недели, рече Билстром.

Изјавата на шведскиот министер ги потврдува зборовите на висок функционер на Стејт департментот, според кои турскиот министер за надворешни работи вчера на своите колеги од НАТО им рекол дека напорно работи на ратификацијата на приемот на Шведска во алијансата и посочил како веројатен период до крајот на годината.