„Подготвени сме да го оставиме настрана целото наше оружје сè додека Израел е подготвен да го стори истото“, рече Пезешкијан пред почетокот на Генералното собрание на ОН во Њујорк и продолжи:
„Не сакаме да го дестабилизираме регионот“.
Неговата изјава дојде еден ден откако Израел започна масовни воздушни напади врз цели на Хезболах во Либан, при што загинаа повеќе од 400 луѓе, според извештаите од Бејрут.
Како што јави агенцијата „Блумберг“, Пезешкијан попладнево да им се обрати на учесниците на Генералното собрание на ОН, а два дена подоцна на истата говорница да се појави и Бенјамин Нетанјаху, премиерот на Израел.
Иранскиот претседател коментира дека тензиите меѓу Иран и Израел го достигнуваат врвот откако Техеран го обвини Израел дека стои зад големата експлозија на пејџери и воки-токи во Либан во која загинаа неколку десетици, а беа повредени илјадници луѓе.
Меѓу ранетите е и иранскиот амбасадор во Бејрут, кој изгубил око. Техеран се закани со одмазда за овој напад. Нападот, за кој Израел официјално не ја презеде одговорноста, беше насочен кон членови на милитантната група Хезболах, поддржана од Иран.
Исламската Република го спонзорира и Хамас, кој се бори против Израел во Газа. Хезболах и Хамас се на американската листа на терористички организации. Во Јемен, бунтовниците Хути, поддржани и од Техеран, од минатата година вршат напади врз трговски бродови во Црвеното Море.
Израел и Хезболах се ангажирани во тековна размена на ракетен оган. Ако ескалира во регионална војна од целосен размер, САД и Иран, кои го гледаат Хезболах како најважна од своите сојузнички милитантни групи на Блискиот Исток, најверојатно ќе бидат вовлечени во конфликт кој се заканува да се претвори во општа војна на Блискиот Исток.
Пезешкијан рече дека Иран сака да види мир, но дека ќе се спротивстави на неправдата против своите сојузници, кои сами донесуваат одлуки за воена акција.
„Не примаат наредби од никого“, рече тој и продолжи:
„Не е како Јеменците да чекаат да им кажеме што да прават или што да не прават. Ако избие војна во регионот, тоа нема да служи на ничии интереси.“
Пезешкијан повтори дека Иран немал претходни сознанија за нападите врз Израел од 7 октомври од страна на Хамас, што ја предизвика војната во Газа. Во тој напад загинаа 1.200 цивили и војници, а беа земени околу 250 заложници.
Следуваше израелска одмазда, во која, според палестинските власти, загинаа повеќе од 41.000 луѓе.
Сметан за реформатор во тесен круг на иранската политичка сцена, Пезешкијан ја изрази својата подготвеност да ги рестартира разговорите за откажаниот нуклеарен договор на Техеран со Западот и ќе инсистира САД да ги укинат економските санкции.
Тој рече дека Иран е подготвен да се врати на првичниот договор и рече дека Техеран продолжува да се движи кон целите утврдени во договорот.
Пезешкијан, кој ја презеде функцијата во јули, откако неговиот тврдокорен претходник загина во хеликоптерска несреќа, исто така негираше дека Иран ѝ дал оружје на Русија за поддршка на нејзината војна против Украина, спротивно на тврдењата на САД.
„Не ја одобруваме руската агресија врз Украина. Не сме им испратиле и нема да им испратиме балистички ракети“.