Запрашан дали САД ќе ги укинат ограничувањата за употребата на оружје со долг дострел од Украинаво војната против Русија, како што се ракетните системи ATACM, американскиот претседател Џо Бајден вчера рече дека неговата администрација „во моментов се занимава со тоа прашање“,

Украинскиот претседател Володимир Зеленски во неколку наврати го повика Западот да им дозволи на неговите сили да користат западно оружје со долг дострел за да ја нападнат Русија.

Портпаролот на Кремљ, Дмитриј Песков, изјави за новинарите дека се чини дека Вашингтон веќе одлучил да и дозволи на Украина да користи оружје за далекуметни напади во Русија.

Вашингтон претходно се двоумеше да и достави на Украина оружје со долг дострел за напад на цели во Русија, плашејќи се дека таквиот потег би можел да го ескалира двеиполгодишниот конфликт.

Претседателот на Социјалдемократскиотсојуз на Македонија, Венко Филипче, денеска во Струмица, во одговор на новинарско прашање, потенцираше дека Законот за кредит од Унгарија што го најави Владата, е голем корупциски проект за кој каматите ќе ги плаќаат идните генерации.

„За жал морам да констатирам дека корупцијата во овој Закон се гледа од авион.Имено, како никогаш досега една фирма која ќе биде одговорна за провизиите ја назначува унгарската банка која ги дава парите, тоа никогаш не било сценарио и не се случило во нашата земја. Секогаш кога имало меѓународна куќа таа била етаблирана, позната и ја обезбедувала државата со цел да се заштити. Сега некој друг ни кажува кои адвокати и која фирма ќе ги земе тие провизии. За жал, сметам дека тоа е еден голем корупциски проект кој што е озаконет, односно веќе влегува во законска процедура, генерации и генерации ќе плаќаат понатаму камати“, изјави претседателот на СДСМ Филипче.

Во одговорот на новинарското прашање, Филипче посочи дека загрижува и фактот што Владата го криеше овој закон од јавноста и сега се носи по скратена постапка.

„Ние укажувавме изминатиов период и сега излегува дека е вистина. За жал се носи еден таков сериозен закон по скратена постапка, за да нема доволно време за дискусија или анализа од страна на експертите и експертската јавност. Тој закон е поминат на Влада на 3-ти септември и очигледно еве скоро цела недела се криел од јавноста. Се поставува прашање зошто на таков шверцерски начин се обидуваат таков закон да протнат во Собранието по скратена постапка“, рече претседателот на СДСМ Филипче, додавајќи дека СДСМ многу внимателно ќе следи кои ќе бидат тие фирми што ќе бидат назначени од Унгарија и ќе бидат одговорни за провизиите, и сите работи кои ќе ги открива СДСМ ќе и бидат презентирани на јавноста.

Директорот на Агенција за храна и ветеринарство (АХВ), Оливер Миланов од денеска до 13 септември, во Будимпешта, Република Унгарија, заедно со делегација од Агенцијата, учествува на ветеринарниот самит од Западен Балкан на главните ветеринарни офицери (директори на ветеринарни служби) и на Европската унија (ЕУ), Европската асоцијација за слободна трговија и првите луѓе на ветеринарните служби од Западен Балкан.

На состанокот, како што информира АХВ, ќе се дискутира за поддршката за развој на капацитетите на ветеринарните служби од Западен Балкан, европската пракса и искуство за вакцинацијата на животните како основа за превенција и контрола на болестите, поддршката на ЕУ во делот на вакцинација кај лисиците и другите активности поддржани од ЕУ, а споделено ќе биде и искуството на Унгарија на оваа тема.

Првите луѓе на Ветеринарната канцеларија на БиХ и АХВ на Косово ќе го претстават искуството од реализацијата на вакциналните кампањи на малите преживари против бруцелоза, оралната вакцинација против болеста беснило во периодот 2009-2024 година, како и искуството од управувањето со епидемиите на болестите кај животните во Косово и потенцијалот за нивна контрола со поддршка од ЕУ, како што е болеста чвореста кожа. Во рамки на состанокот ќе бидат презентирани извештајот за реализација на проектот „Регионални активности за искоренување на болести во земјите од Западен Балкан” (ADEWB Project) и функционирањето на COMМ SANTE - Агенција за здравствени комуникации и банка за вакцини.

На маргините на состанокот, на 13 септември, ќе се одржи Шестиот форум за комуникација и соработка на директорите на ветеринарните служби од Западен Балкан на кој ќе учествуваат претставници од Европската комисија - DG SANTE, Светската организација за здравје на животните - WOAH, од ветеринарните служби на Романија и Грција и претставници од ветеринарните служби од Северна Македонија, Албанија, Србија, Босна и Херцеговина, Црна Гора и Косово. Тема на овој состанок ќе биде актуелната состојба со болеста чума кај малите преживари, за што претставници од надлежните ветеринарни служби од Грција и Романија ќе ја презентираат актуелната состојба со болеста во нивните земји и мерките кои ги преземаат за ставање под контрола и нејзино искоренување. Презентиран ќе биде и глобалниот и регионалниот механизам за координација во однос на преземање превентивни и заштитни мерки против оваа болест.