Крос: Не знам дали Реал е фаворит во Лигата на шампионите, но ние сме способни да победиме

 Фудбалерот од средниот ред на Реал Мадрид, Тони Крос одговори на прашањето дали неговиот тим е фаворит за Лигата на шампионите 2023/24.

- Не знам дали сме фаворити, но секако дека сме способни да победиме. Имаме добар тим, но еден лош ден може да биде доволен за да испаднете. Нивото овде е толку високо што е исклучително тешко да се победи. Ние обично ги играме нашите најдобри натпревари против многу силни противници. Ова не мотивира, изјави Крос на официјалната веб-страница на Реал Мадрид.

Реал вечер од 21 часот ќе игра против Лајпциг во осмина финалето од Лигата на шампионите. Реваншот ќе се одигра на 3 март.

Клубот од Мадрид нема пораз во последните пет средби.

Нетанјаху: Израел ќе биде блиску до целосна победа со операцијата во Рафа

 Израелскиот премиер Бенјамин Нетанјаху денеска изјави дека офанзивата во Рафа, дури и ако биде одложена поради прекинот на огнот, ќе му овозможи на Израел да биде на дофат на целосна победа.

„Целосната победа ни е на дофат, не за неколку месеци, туку за неколку недели, кога ќе ја започнеме операцијата“, рече Нетанјаху во интервју за американскиот телевизиски канал Си-Би-Ес.

Како што пренесуваат странските агенции, Рафа е „последното упориште“ на палестинското движење Хамас во очите на израелскиот премиер, кој е решен таму да започне копнена офанзива за да го порази Хамас и да ги ослободи заложниците кои се држат во Појасот Газа, и покрај предупредувањата од меѓународната заедница.

Според ОН, околу 1,5 милиони луѓе се во Рафа, град кој се наоѓа на границата со Египет. Тој граничен премин сега е затворен.

„Ако постигнеме договор (за прекин на огнот), таа (офанзивата) на некој начин ќе биде одложена, но ќе се случи“, додаде израелскиот премиер. /МИА

Ливерпул го освои англискиот Лига куп

 Ливерпул вечерва на „Вембли“ во Лондон го победи  Челзи во финалето на англискиот Лига куп со 1:0.

Основните 90 минути завршија без голови. Решавачкиот момент се случи во 118. минута кога дефанзивецот на „Црвените“, Вирџил ван Дајк се запиша во листата на стрелците.

Ливерпул по десетти пат во историјата го освои англискиот Лига куп. Тимот го држи рекордот по победи на турнирот.

Последен пат тимот од „Енфилд“ го освои трофејот во 2022 година. /МИА

Девет лица загинаа во сообраќајна несреќа во Јужна Африка, се враќале од партиски митинг

Девет лица загинаа во сообраќајна несреќа во Јужна Африка додека се враќале од митинг на владејачката партија Африкански национален конгрес.

Поддржувачите на партијата на претседателот Кирил Рамафоса се враќале дома со автобус по митингот во градот Дурбан.

Автобусот излетал од патот и се превртел, соопшти полицијата.

Службите за итни случаи објавија дека уште 17 лица се повредени во несреќата кај градот Паулпитерсбург, на околу 360 километри северно од Дурбан.

Африканскиот национален конгрес соопшти дека некои од повредените се во критична состојба.

Партијата официјално ја започна својата изборна кампања на стадионот Мозес Мабхид во Дурбан пред десетици илјади поддржувачи, а изборите се закажани за 29 мај. /МИА

притисни ентер