Мухамед Ибрахими е композитор и мултиинструменталист на жичани инструменти од Скопје. Неговиот деби албум „Fly” излезе во јануари 2014 за скопската независна продукција „ПМГ Рекордингс“ и може бесплатно да се симне на нивната веб-страница.
- Својот инструмент (гитара, мандолина, саз) Ибрахими го третира на мошне неконвенционален начин, длабоко интуитивно и широко инспиративно. Неговите композиции се автентичен микс од различни музички стилови, мириси и созвучја. Рок, блуз, амбиент, кои се длабоко вкоренети во ориенталната (суфи), но и балканска (албанска, македонска) фолклорна традиција. Оваа храбра и елегантна комбинација, често доловува неочекувани резултати во прекрасен и уникатен звучен свет, соопшти Дирекцијата за култура и уметност, организатор на „Скопско лето“.
Басистот и композитор Џоле Максимовски на музичката сцена е повеќе од 20 години. Член на „Архангел“ од 1998 до 2006 година. Од 2000 година свири во „Влатко Стефановски Трио“. Соработувал и снимал со Гарбет Тавитјан, Јан Акерман, Теаодосиј Спасов, Стефан Миленковиќ, Дамир Имери, Мугер Фугер, Чиста околина, Никола Коџобашија и Алшар. Во моментов работи на својот нов албум со својот авторски бенд „Кабадајас“. Во 2013 година е дел од групата „Темпера“ со која оваа година го промовираше албумот „Играј“.
Ратко Даутовски е еден од најактивните македонски перкусионисти, кој од најрана возраст целосно е посветен на истражувањето на богатата мелоритмичка структура, пред се, на македонската традиционална музика. Покрај редовното музичко образование на ФМУ, добивал континуирана обука од неговиот татко, проф. д-р Драган Даутовски. Ратко Даутовски од 1999 е редовен член на „Драган Даутовски квартет“. Има настапувано во многу земји и соработува со многу светски музичари и ансамбли. Како автор и изведувач, учествува и во голем број театарски и филмски проекти.
Во рамки на „Скопското летно кино“, во Кинотеката на Македонија вечер ќе биде прикажан мјузиклот „Мулен руж“ од 2001 година во режија на Баз Лурман, со Никол Кидман и Јуан Мекрегор во главните улоги. Оваа австралиско-американска копродукција има два Оскара и уште 75 филмски награди.