Елегантни моторџии низ скопските улици во обид да ја подигнат свеста за машкото здравје

Стотици дотерани моторџии денеска дефилираат низ скопските улици со цел подигање на свеста за машкото здравје и превенција на рак на простатата.

Моторџиите облечени во палта и вратоврски по девети пат земаат учество во глобалниот хуманитарен мотоциклички настан, а собраните донации од учесниците одат во фондацијата за борба против рак на простатата „Мовембер“ во Лондон .

Организаторот на настанот во Скопје Игор Стефановски објаснува дека Глобалното движење започнало 2012 година во Сиднеј од група моторџии, во чест на нивниот пријател кој починал од рак на простатата, по што станува најголем глобален собир на мотоциклисти на светско ниво.

- Тие губат другар од рак на простатата, во негова чест почнуваат собирање, чисто клубски прво, меѓутоа сакаат да пренесат порака дека мотоциклистите не мора секогаш да бидат бучни, во кожни вентијаги и одлучуваат настанот да го направат дотерани, костумосани што би се рекло. Така да настанот со текот на годините настанот излегува од рамките на Австралија и се шири низ целиот свет. - Игор Стефановски – организатор

Во движењето на глобално ниво учествуваат околу 100.000 мотоциклисти од 110 држави. Во Скопје оваа година има рекорден број на официјално пријавени учесници, над 170. Тие велат дека се особено горди што се дел од ваков настан.

- Чувството да се вози на ваков настан е навистина убаво бидејки да си џентлмен и да правиш нешто што помага за да се поттикне машкото здравје е многу убава работа, веќе 8 години возам на gentlemens ride и е настан кој дефинитивно не се пропушта.- Филип Арсовски – учесник

- Чувството е одлично, се работи за еден интернационален настан кој ја потикнува важноста од борбата за машкото здравје, би препорачал на сите граѓани што повеќе да земаат учество во вакви хуманитарни настани и да ја гајат културата на старите мотори, олдтајмер возилата.- Златко Ивановски – учесник

Скопје е дел од ова движење од 2016 година. Досега учествувале 1.172 учесници, а собрани се над 18.000 евра. Од основањето на движењето досега глобално се собрани над 50 милиони долари кои се донираат во институции и болници за машко здравје.

Ребров: Многу важна победа за тимот и за државата

Селекторот на Украина, Серхи Ребров, беше исклучително задоволен од духот што го покажаа неговите играчи за победа од 2:1 против Словачка.

-Многу сум среќен за играчите. Реагиравме многу добро откако примивме гол. На полувремето променивме некои работи во однос на високиот пресинг. Играчите кои дојдоа од клупата ни помогнаа да ја подобриме нашата игра. Најважно е дека го покажавме нашиот дух. Мора да се фокусираме на следниот натпревар, но тоа беше многу важна победа за тимот и за земјата. Не викав на полувремето, само требаше да реагираме. Знаевме дека не притискаме доволно високо и ова беше нашата единствена шанса. Така им кажав на играчите“, изјави Ребров.

Ребров зборуваше и за својата одлука да стартува со Анатолиј Трубин на голот.

-Мило ми е што имаме добра конкуренција меѓу голманите. Мислам дека Трубин заслужи шанса по настапот против Германија. Беше многу мирен и можеше да започне пред овој натпревар, истакна тој. /МИА

Аргентинскиот претседател Милeи ја почна својата европска турнеја

Аргентинскиот претседател Хавиер Милеи попладнево пристигна во Мадрид, започнувајќи ја својата турнеја низ Европа, во која ќе биде вклучена и Германија, јави ДПА.

Тој беше игнориран од шпанската левичарска влада и од кралот Фелипе Шести, со кого нема предвидена средба.

На предизборен митинг за европските избори, организиран од шпанската партија „Вокс“ во мај, Милеи го нападна шпанскиот премиер Педро Санчез и ја нарече неговата сопруга Бегоња Гомез „корумпирана“.

Шпанскиот министер за надворешни работи Хозе Мануел Албарес, пак, го обвини Милеи дека ја напаѓа шпанската демократија, шпанските институции и Шпанија како целина. Милеи го отфрли барањето за јавно извинување и оттогаш продолжува со вербалните напади.

Во рамките на посетата, аргентинскиот лидер има планирана средба со премиерката на регионот Мадрид, Изабел Дијаз Ајусо, која е претставник на конзервативната Народна партија.

Милеи се очекува утре да биде во Хамбург, а в недела во Берлин ќе се сретне со германскиот канцелар Олаф Шолц. Последната станица од европската турнеја на аргентинскиот претседател е Чешка./МИА

Едномесечен притвор за косовски Србин осомничен за напад врз припадници на КФОР во мај 2023-та

Судот проценува дека, доколку биде на слобода, постои опасност од бегство на обвинетиот, со оглед на тоа дека работи во Србија и може да биде недостапен за органите на правдата во Косово.

Косовски суд му одреди едномесечен притвор на косовски Србин осомничен дека сторил четири кривични дела, меѓу кои и напад врз припадници на Мировната мисија на НАТО во Косово - КФОР на протестите во Звечан во северно Косово во мај 2023 година, јави дописникот на МИА од Приштина.

Според Основниот суд во Приштина, обвинетиот со иницијали Л.Д. е осомничен за кривичните дела „здружување за противуставна дејност“, „загрозуваање на лица под меѓународна заштита“, „учество во толпа што врши кривично дело и хулиганство“ и „напад врз службено лице“.

Судот проценува дека, доколку биде на слобода, постои опасност од бегство на обвинетиот, со оглед на тоа дека работи во Србија и може да биде недостапен за органите на правдата во Косово.

- Постои основано сомнение дека на 29.05.2023 година во временскиот интервал од 06:00 часот до вечерните часови, во периметарот во кој се наоѓа објектот на општина Звечани, пријавениот Л.Д активно учествал во групата или толпата лица, која имала за цел да изврши тешки кривични дела, на тој начин што преку употреба на насилство се обидела да го спречи воспоставувањето на уставниот поредок на Република Косово во северните општини на земјата, се вели во соопштението.

Според судот, и покрај наредбите на војниците од мировната мисија на КФОР за мирно растурање на толпата и одбивањето да влезат во објектот на општината, групата во која учествувал Л.Д. „почнала да врши неконтролирано насилство, користејќи цврсти алатки, импровизирани експлозивни направи и огнено оружје, од кои се повредени најмалку 30 припадници на мировните сили на КФОР, од кои тројца од проектилите од огнено оружје“.

- Предизвикана е и значителна материјална штета на возилата на КФОР, полицијата на Косово и на автомобили на новинари кои известуваа за настаните од тој ден, кои вклучуваат целосно палење на неколку возила или физичка штета во голема мера, предизвикувајќи висок степен на опасност по животите и телата на многу луѓе и имот, се вели во образложението на Судот за определување на мерката притвор.

Според српските медиуми, станува збор за маж, роден 1979, кој завчера бил запрен на пунктот Бистрица, првенствено со цел да се провери поради евентуален шверц на стока.

По проверка на лицето и документите, полицијата објави дека утврдила дека се работи за лице кое се бара во врска со настаните од мај минатата година пред општинската зграда во Звечан, кога дојде до конфликт меѓу група Срби и припадници на КФОР.

За апсењето на Л.Д. се огласи и Канцеларијата за Косово при Владата на Србија, која тврди дека станува збор за цариник кој, велат, една година слободно се движи и дека „неговото апсење во овој момент е исклучиво политичко дејствие на Приштина со цел да предизвика нови тензии“. /МИА

притисни ентер