Бајден ова го кажа во одговор на прашање на брифинг во Белата куќа.

-Израелците не одлучија што да прават во врска со нападот. За тоа сè уште се разговара, рече Бајден пред новинарите во Белата куќа.

„Да бев на нивно место, ќе размислував за алтернативи за гаѓање на нафтените постројки“, додаде тој.

Тензиите меѓу Иран и Израел се на највисоко ниво бидејќи Израел во моментов ги разгледува опциите како да одговори за иранскиот напад со балистички ракети, што Техеран го изведе во вторникот како одговор на воената акција на Израел во Либан.

Бајден беше прашан што мисли за тоа дека израелскиот премиер Бенјамин Нетанјаху се обидува да влијае на американските избори на 5 ноември со тоа што не сака да се вклучи во дипломатско решение на ситуацијата.

-Дали тој се обидува да влијае на изборите, не знам, не сметам на тоа, одговори Бајден. „Ниту една администрација не му помогна на Израел повеќе од мојата“, додаде тој.

Американскиот претседател изјави и дека е убеден оти претстојните претседателски избори ќе бидат слободни и фер, но го загрижува реакцијата на републиканскиот кандидат Доналд Трамп доколку загуби.

-Убеден сум дека тие ќе бидат слободни и фер. Не знам дали ќе бидат мирни. Тоа што го кажа Трамп и тоа што го кажа минатиот пат, кога не му се допадна исходот од изборите, е многу опасно, рече Бајден.

Бајден рече дека е значајно и тоа што изборот на Трамп за потпретседател, американскиот сенатор Џеј-Ди Венс, за време на потпретседателската дебата не сакаше да потврди дека ќе го прифати исходот од изборите на 5 ноември.

Полскиот министер за одбрана Владислав Косињак-Камиш најави дека Варшава ќе го блокира пристапот на Украина во Европската Унија, се додека Киев не го разреши прашањето за ексхумацијата на жртвите од масакрите во реонот на северозападниот украински град Волињ, извршени во текот на Втората светска војна.

Како што јави дописникот на МИА од Брисел, изјавата на полскиот министер уследи откако во средата Украинскиот институт за национално сеќавање соопшти дека следната година ќе почне теренско истражување на местата на масакрите во Волињ, извршени од страна на украинските националисти.

- Нема да има согласност Украина да се приклучи на Европската Унија, ако не го реши проблемот со Волињ, изјави Косињак-Камиш, при тоа поздравувајќи ја одлуката на Украинскиот институт.

Тој додаде дека дури и ако другите земји членки на ЕУ се согласат за пристапување на Украина во блокот, неговата конзервативна аграрна Полска народна партија (ПСЛ) ќе ја блокира одлуката за членство, доколку прашањето околу Волињ „остане нерешено“.

Косињак-Камиш нагласи дека по се изгледа Украина заборавила оти и треба поддршка од Полска, потенцирајќи дека за да се приклучи на ЕУ, една земја „мора да исполни одредени услови, не само економски, туку и оние кои се однесуваат на историската вистина“.

Тој додаде и дека не се согласува со изјавата на поранешниот министер за надворешни работи на Украина, Дмитро Кулеба, дадена минатиот месец, дека историските прашања, како масакрите во Волињ, треба „да им се препуштат на историчарите со цел да може фокусот да се насочи на градењето заедничка иднина“. Според полскиот министер, ваквата изјава на Кулеба е „најлошата формулација што може да се користи“.

Со ставот на Косињак-Камиш, не се согласи полскиот претседател Анджеј Дуда, која важи за цврст поддржувач на Украина од првиот ден на руска инвазија врз земјата и близок пријател на неговиот украински колега Володимир Зеленски. Дуда оцени дека секој што го блокира пристапот на Украина во ЕУ, постапува во согласност со политиката на рускиот претседател Владимир Путин.

Косињак-Камиш на ова одговори дека не се согласува со ваквиот став, нагласувајќи дека од суштинско знаење за членството на една земја во ЕУ е „да се соочи со минатото и да ги почитува членките на блокот кон која сака да се приклучи“.

- Ние бевме први што им испративме воена помош, но украинската страна изгледа дека заборави на оваа помош, рече Косињак-Камиш.

Коментирајќи ги оценките дека условувањето на членството на Украина во ЕУ може да резултира со поттикнување антиукраински чувства во полското општество, Косињак-Камиш изјави дека „најчесното нешто што треба да се направи е да се постават јасни услови и транспарентно да се кажат очекувањата“.

Според проценките на полската Влада во масакрите кај Волињ, извршени помеѓу 1943 и 1945 година, биле убиени околу 100.000 Полјаци и 5.000 Украинци. Масовните убиства ги извршиле припадници на националистичката герилска Украинска бунтовничка армија (УПА), чија цел била создавање на независна Украина и „протерување на нацистичките и советските окупатори“, но и на Полјаците, од „историската украинска територија. /МИА

Продолжува потрагата по исчезнатите во поплавите и одроните на подрачјето на општините Јабланица, Коњиќ, Кисељак, Крешево и Фојница во БиХ.

Федералната управа за цивилна заштита распоредува тимови на локациите каде што се претпоставува дека има исчезнати лица.

Според последните информации, во поплавите загинаа најмалку 20 лица - 17 во Јабланица и тројца во Фојница.

Вкупниот број на жртви не е познат, но според неофицијални информации има десетици повредени, исчезнати и загинати, пренесува порталот Кликс.

Затрупани се многу куќи, а утринава пристигна и дополнителна механизација.

Во тек е состанок на кризниот штаб за координација на спасувачките активности, а по него треба да се дознаат подетални информации за состојбата на теренот.

Најтешка е состојбата во Долна Јабланица каде се сомнева дека каменолом ја предизвикал трагедијата во населбата која е целосно затрупана со отпад од гранит./МИА