Трамп, кој стапува на должност на 20 јануари, на прес-конференција во неговото одморалиште на Флорида ја претстави идејата за претворање на Канада во сојузна држава на САД, и вети дека ќе го промени името на Мексиканскиот Залив во Американски Залив.
Две недели пред преземањето на функцијата, Трамп почна да скицира агресивна надворешна политика, без оглед на загриженоста на американските сојузници. Запрашан дали може да гарантира дека нема да употреби воена или економска сила во обид да воспостави контрола над Панамскиот канал и Гренланд, Трамп рече дека не може да го каже тоа со сигурност.
„Можам само да кажам дека ни се потребни за економска безбедност“, додаде тој.
Трамп ги критикуваше трошоците на САД за канадски стоки и воената поддршка за Канада, нагласувајќи дека САД немаат корист од тоа, а границата меѓу двете земји ја нарече „вештачки повлечена линија“.
Тој посочи дека ќе воведе царини за Данска доколку таа се спротивстави на неговата понуда да го купи Гренланд, за која рече дека е од витално значење за националната безбедност на САД.
Данска соопшти дека Гренланд, самоуправен дел од нејзиното кралство, не е на продажба.
Непосредно пред коментарите на Трамп, неговиот син Дон Џуниор, пристигна во приватна посета на Гренланд./МИА