Здравје

Влада: Приоритет е подобрувањето на здравствениот систем, здравствената заштита, ....

Приоритет е подобрувањето на здравствениот систем, здравствената заштита, услугите за пациентите.

Подобрување на здравствениот систем, здравствената заштита и на услугите за пациентите е приоритет на Владата и на премиерот Христијан Мицкоски. Сто дена нова влада, значи вработување 600 специјализанти во дефицитарните области, укинување економски директори, нова магнетна резонанца во поликлиниката „Идадија“, реновирано Одделение на дигестивна хирургија и нова апаратура, проширување на Позитивната листа за девет генерици или 87 лекови, се истакнува во денешното соопштение на владината прес-служба.

- За 100 дена влада се укинаа постоењето 1.000 економски директори и со тоа се става крај на дуализмот во здравствениот систем. Со ова, прецизно ќе се лоцира одговорноста во менаџирањето на институциите, а ќе се заштедат и финансиски средства. Здравствените установи имаат само медицински директори, кои ќе управуваат со здравствените установи, се наведува во соопштението.

Потсетуваат дека вработувањето 600 специјализанти во јавните здравствени установи во дефицитарните области, ќе се одвива во две фази. Вработување 300 специјализанти до крајот на годинава и уште толку, наредната. Со ова, како што се нагласува, им се дава шанса на младите доктори, а се решаваат и проблемите со гужвите по здравствените установи.

- Конечно после деценија, новата влада во првите 100 дена донесе одлука за проширување на Позитивната листа со девет генерици или 87 лекови, во различни имиња, форми, јачина и пакување и тоа за крвен притисок, срцеви заболувања, анти-агреганси, лекови за третман на депресија и за деменција. Ова е значително олеснување за пациентите, со што вкупно еден милион евра ќе останат кај граѓаните, се додава во соопштението.

Се нагласува и дека комплетно е реновирано Одделението за дигестивна хирургија со нови кревети, плакари, врати и осветлување. Се набави и апаратура за лапароскопски столб и изведба на оперативен зафат со употреба на флуоресцентен контраст, како што се додава, во вредност од 1.000.000 евра.

Дополнително, во поликлиниката „Идадија“ во ЈЗУ Здравствен дом - Скопје е пуштен во употреба новиот апарат за магнетна резонанца во вредност од 1.300.000 евра, што од медицински аспект претставува врв во дијагностиката, што дава најдобар приказ, визуелизација на дефинитивна и детална слика на внатрешни органи и меки ткива, неинвазивна, безболна метода, што употребува нејонизирачко зрачење и е предност во однос на сите други дијагностики во радиодијагностиката. За 100 дена нова влада има 100 проекти и мерки за граѓаните.

- Владата покажа дека може поинаку. Владата покажа како се работи посветено и во интерес на пациентите. Продолжуваме посветено да го подобруваме здравствениот систем во Македонија за сите граѓани, пишува во соопштението.

Свет

Судот на правдата на ЕУ ја одби жалбата на забраната за давање адвокатски услуги на Руси

Судот на правдата на Европската унија ги отфрли жалбите на адвокатски здруженија од Белгија, Франција и Германија против одлуката на ЕУ со која се забранува давање правни совети на руската Влада или на други субјекти основани во Русија. 

Како што јави белгискиот јавен радиодифузен сервис РТБФ, станува збор за одлука на ЕУ донесена во рамки на пакетот санкции воведени поради руската инвазија на Украина.

Меѓутоа, неколку адвокатски здруженија сметаат дека со оваа одлука се кршат основните права кои гарантираат пристап до правни совети од адвокат, како и принципите за почитување на професионалната тајна и независноста на адвокатите. Дополнително, според подносителите на жалбата, забраната ги крши и вредностите на владеењето на правото и принципите на пропорционалност и правна сигурност.

- Очигледно е дека силно ја поддржуваме Украина и нејзините жители, кои трпат неприфатлива агресија од страна на Русија. Но, војната и нејзините злосторства не смеат да не натераат да заборавиме дека правото и правдата не се услуги како сите други. Тие се гаранти на здрава демократија, изјави претседател на Франкофонската адвокатска комора од Брисел, Емануел Плашер.

Според Плашер. ако се следи оваа логика, еден ден би можело да им се каже на адвокатите дека не смеат да бранат лице кое се смета за несовесно.

- Ова е почеток на крајот на владеењето на правото, додаде Плашер.

Меѓутоа, Судот на правдата оцени дека оваа забрана не го ограничува правото на секој поединец да биде советуван и застапуван од адвокат.

- Забраната не се однесува на правни совети дадени во врска со правните постапки, а дополнително со неа не е опфатено давањето совети на поединци, заклучи Судот.

Највисокото судско тело во ЕУ, исто така, ги отфрли и жалбите во кои се тврди дека со забраната се кршат принципите на професионална тајна или независност на адвокатите.

Македонија

Таравари: Комисија ќе утврдува дали имало пропусти со починатата родилка од Куманово

Формирана е комисија која треба да утврди дали имало пропусти со починатата родилка од Куманово.

Формирана е комисија, која треба да утврди дали имало пропусти во случајот со починатата родилка во Куманово, а првичните информации ќе може да се очекуваат денеска, најави министерот за здравство, Арбен Таравари.

Свет

Литванија го ратификуваше договорот за распоредување на 5.000 германски војници во земјата

Литванија вчера го ратификуваше заедничкиот договор со Германија за распоредување на германска борбена бригада во балтичката земја-членка на НАТО, при што сите 88 пратеници присутни на гласањето го поддржаа планот, јави ДПА.

Договорот, склучен во Берлин на 13 септември, предвидува распоредување и на германски војници и на цивили од германските вооружени сили во Литванија.

Како одговор на променетата безбедносна ситуација во Европа по руската инвазија на Украина, Германија одлучи трајно да ја распореди својата борбена бригада во Литванија, која треба да биде подготвена до 2027 година. Планот предвидува распоредување до 5.000 германски војници во земјата, од кои 80 отсто ќе бидат сместени во воената база во Руднинкаи, а останатите во јужниот литвански град Рукла.

Германска командна единица од околу 20 војници дојде во Литванија уште на 8 април, а уште 120 се очекува да пристигнат на почетокот на октомври.

Литванските пратеници почнаа да расправаат за планот минатата недела, откако германскиот министер за одбрана Борис Писториус се обрати во Парламентот. Литванскиот министер за национална одбрана Лауринас Кашунас го поздрави чекорот како „уште еден камен-темелник на стратешкото партнерство“ со Германија.

Германските пратеници исто така мора да го ратификуваат договорот, иако сè уште не е одреден датум. За време на неговата неодамнешна посета на Литванија, Писториус рече дека очекува процесот на ратификација да биде завршен следната година.

притисни ентер