Македонија

Уапсен газдата на „Ритрон копи“ за тендерите за телевизори во Државна лотарија

Попладнево е уапсен Артан Ајрули, сопственикот на кумановската компанија „Ритрон копи“, а неговото апсење  е во рамки на друга истрага поврзана со работата на поранешното раководство на Државната лотарија. 

Нова кривична пријава против екс директорот на Државна лотарија, Перпарим Барјами поднесе Управата за финансиска полиција, овојпат поради сомнителни тендери за набавка на телевизори и компјутерска опрема за Државната лотарија. Кривична пријава е поднесена и за сопственикот на фирмата „Ритон копи“ од Куманово која ги добила тендерите, како и за уште други двајца директори во лотарија кои се сомничат за злоупотреба на службената положба и овластување и за злоупотреба на постапката за јавни набавки. Постапувајки по кривичната пријава од Финансиската полиција, од ОЈО соопштија дека е поведена постапка против две физички и едно правно лице за чиј сопственик до судија за претходна постапка е доставено барање за определување на мерки на предпазливост - одземање на патната исправа и обврска повремено да се јавува во судот.

Првоосомничениот во периодот од 2022 до 2024 година одобрувал исплата по фактури со невистинита содржина за набавка на употребувани телевизори, принтери, компјутерска и комуникациска опрема за потребите на АД „Државна лотарија“. Фактурите ги издавал второпријавениот сопственик и управител на осомниченото правно лице, иако и двајцата биле свесни дека дел од опремата во фактурите не се испорачувала согласно предвиденото во склучените договори за јавни набавки. Предмет на проверки е целокупната постапка за доделување на шест јавни набавки на ваква опрема за „Државна лотарија“, од моментот на утврдување на техничките спецификации до реализацијата.

Во меѓувреме, истражувачката мрежа БИРН објави дека поранешниот вицепремиер Артан Груби нема албанско државјанство. За ова потврда добиле од кабинетот на Албанскиот претседател, односно дека немаат пронајдено никаков запис во тамошниот Службен весник дека Груби добил нивно државјанство.

Инаку, Груби во моментов се уште е недостапен на органите на прогонот, откако пред десет дена успеа да ја напушти државата. Кривичниот суд на 17 демекври одреди 30 дневен притвор за него, додека МВР веќе следниот ден распиша меѓународна потерница.

Свет

Во постизборните насилства во Мозамбик загинаа 125 луѓе за три денови

Како резултат на насилството во изминатите три дена во Мозамбик, каде опозицијата протестира против прогласената победа на владејачката партија на изборите во октомври, според локална невладина организација, загинале 125 луѓе.

Во вторникот вечерта, владата соопшти дека 21 лице загинало во првите 24 часа од немирите во неколку големи градови во сиромашната јужноафриканска земја, откако во понеделникот беше потврдено дека владејачката партија Фрелимо победила на претседателските и на Националното собрание на изборите.

Но, Платформа ОДЛУЧИ, реномирана невладина организација чии податоци редовно ги користат Амнести интернешенел и други меѓународни невладини организации, објави за 125 жртви. Според невладината организација, бројот на жртви од почетокот на демонстрациите, по изборите на 9 октомври достигнаа 252 лица во земја која не била сведок на такво насилство од крајот на граѓанската војна, со исклучок на злосторствата извршени од вооружени џихадистички групи на северот на земјата.

Најмногу смртни случаи се регистрирани во регионот Мапуто, во северните провинции, особено во Нампула, каде што опозицијата е силна, и во регионот Беира (во централниот дел), вториот по големина град во земјата.

Во меѓувреме, шефот на националната полиција, Бернардино Рафаел, изјави дека најмалку 6.000 затвореници избегале од затворот со максимална безбедност во главниот град на Мозамбик.

Рафаел, исто така, рече дека 33 затвореници загинале, а други 15 се повредени во судирите со безбедносните сили.

Затворениците избегаа за време на насилните протести во кои беа уништени полициски автомобили, полициски станици и инфраструктура, откако Уставниот совет на земјата ја прогласи владејачката партија Фрелимо за победник на изборите на 9 октомври. /МИА

Свет

Потврдена информацијата за заробен ранет севернокорејски војник од страна на Украина

Јужнокорејското разузнавање ја потврди информацијата за заробен ранет севернокорејски војник од страна на Украина

Јужнокорејската разузнавачка агенција денеска потврди дека Украина заробила ранет севернокорејски војник, откако се појавија информации дека украинска специјална единица го заробила војникот, пренесе агенцијата Јонхап.

„Преку размена на информации во реално време со разузнавачка организација на пријателска држава, потврдивме заробување на ранет севернокорејски војник и планираме темелно да го следиме развојот на настаните“, се наведува во кусото соопштение на Националната разузнавачка служба на Јужна Кореја.

Потврдата уследи откако украинската армиска новинска служба „Милитарни“ синоќа соопшти дека украинските сили го заробиле војникот за време на операции во руската Курска област, без да се наведе точниот датум на настанот.

Фотографија на наводниот севернокорејски војник, кој изгледа ранет, беше објавена на „Телеграм“. Засега нема повеќе детали за неговата состојба, додава „Јонхап“./МИА

Свет

Кинескиот претседател Си Џинпинг ќе ја посети Русија во 2025 година

 Кинескиот претседател Си Џинпинг ќе ја посети Русија во 2025 година, соопшти денеска рускиот амбасадор во Пекинг Игор Моргулов.

„Што се однесува до конкретни билатерални настани, можам да кажам дека активно се изработуваат релевантните планови“, изјави Моргулов, пренесува БТА.

- Она што не е тајна е дека претседателот на Народна Република Кина се очекува во Русија следната година, додаде тој.

Рускиот претседател Владимир Путин последен пат го посети Пекинг во мај минатата година, каде што најави „нова ера“ во руско-кинеските односи, фокусирани на отпор кон американската политика. /МИА

притисни ентер