Здравје

Трибина во рамки на кампањата „Октомвриски розов караван – превенцијата е заштита“

Трибина и информативен штанд во рамки на кампањата „Октомвриски розов караван – превенцијата е најдобра заштита“.

Во рамки на националната кампања на Министерството за здравство под мотото „Октомвриски розов караван – превенцијата е најдобра заштита“ денеска во „Скопје Сити Мол“ ќе биде поставен информативен штанд и посетителите ќе имаат можност да се информираат за тековните активности за превенција и лекување на рак на дојка.

Според програмата, денеска во 13:00 часот ќе се одржи централна трибина во „Синеплекс“, „Скопје Сити Мол“, каде панелисти ќе бидат членови на Националната комисија за скрининг на рак на дојка.

Кампањата се спроведува со поддршка од СЗО, УНФПА, Град Скопје, Здружение за помош и поддршка на пациенти со гинеколошки заболувања „Фемина М“, Националната опера и балет, Факултетот за музичка уметност-Скопје и општествено одговорните компании „Скопје Сити Мол“ и „Синеплекс“.

Министерството за здравство на 16 овој месец ја почна националната кампања под мотото „Октомвриски розов караван – превенцијата е најдобра заштита“ со цел подигнување на свесноста за рано откривање рак на дојка./МИА

Свет

Израелската армија во контролирана експлозија уништи резерви на оружје на Хезболах

Во северниот дел на Израел утрово беа издадени предупредувања за земјотрес по контролираната експлозија на резерви на оружје на либанската милитантна група Хезболах од страна на израелските сили.

Израелската метеоролошка служба соопшти дека издала предупредување за земјотреси откако мерните уреди регистрирале земјотрес по поголема контролирана експлозија што утринава била извршена на северот на Израел, пренесе порталот Инет.

Во експлозијата биле уништени резерви на оружје на Хезболах, се вели во соопштението./МИА

Фудбал

Гвардиол: Меси беше мојот идол

Хрватскиот фудбалски репрезентативец, Јошко Гвардиол даде свое видување за настапите од почетокот на сезоната.

На осум натпревари од сезоната во Премиер лигата, дефанзивецот на Манчестер Сити постигна два гола.

- Мојот идол беше Меси. Кога играш дефанзивец 10-15 години, се заморуваш од тоа. Како помлад, играв насекаде - крилен играч, дефанзивен играч за врска, офанзивен играч за врска, па дури и напаѓач. Се чувствувам удобно во која било позиција и често завршувам на внатрешната лева страна бидејќи тоа го сака тренерот, рече Гвардиол.

Пред да дојде во Манчестер сити, Гвардиол играше за Динамо Загреб и за Лајпциг. /МИА

Македонија

СДСМ до ВМРО-ДПМНЕ: Прифатете го предлогот за минимална плата од 450 евра заради граѓаните

Додека граѓаните живеат сè полошо, Владата одбива да ја зголеми минималната плата на 450 евра.

На денешната прес конференција СДСМ уште еднаш ја повика ВМРО-ДПМНЕ и Владата да го прифати предлогот за поголема минимална плата од 450 евра затоа што тоа ќе значи бенефит за сите работници и нивните семејства, потенцирајќи дека тоа е вистинска потреба за подобар животен стандард на граѓаните.

-Додека граѓаните живеат сè полошо, Владата одбива да ја зголеми минималната плата на 450 евра. Со потсмев им вели на граѓаните „да почекаат, ќе бидат задоволни“. Чекаат работниците за повисоки плати, а граѓаните за ефективни мерки за намалување на цените. Сите чекаат Владата да се смилува и да преземе нешто што ќе значи директна поддршка за семејствата и родителите кои се борат да ги покријат основните потреби. Наместо да манипулира со лажни кампањи, Мицкоски треба да се охрабри и да ги продолжи добрите политики на СДСМ. Јасно е дека нема економски концепт и дека со неговите политики сите осиромашуваат. Време е да признае дека вака веќе не може и да го прифати предлогот за зголемување на минималната плата. Ова е решение кое ќе донесе бенефит за сите работници, ќе ја зголеми минималната плата, а со тоа и просечната плата. Секое семејство ќе има повеќе пари, рече Богданка Кузеска, портпаролка на СДСМ.

СДСМ обвинува дека по само неколку недели од воведувањето, анализите покажуваат дека владината мерка за намалување на цените на основните производи е целосно неефективна додека стандардот на граѓаните опаѓа.

-Денес, на едно четиричлено семејство му се потребни 61.249 денари за основните потреби во месецот, додека просечната плата падна за 1.000 денари откако Мицкоски стана премиер. Овие индикатори покажуваат дека животниот стандард на граѓаните драстично опаѓа и дека имаат сè помалку пари во џебовите, рече портпаролката на СДСМ, Богданка Кузеска на денешната прес конференција на партијата.