Здравје

Седум фитнес придобивки од прескокнувањето јаже: Изгледа како детска игра, а е далеку од тоа

Скокањето со јаже порано се сметаше за забава за девојчиња од училишна возраст, но постои добра причина - или подобро кажано, неколку добри причини што јажето е омилено средство и кај оние што тренираат бокс.

Скокањето со јаже е одлична опција за секој што сака да го подобри својот режим на вежбање. Но, на самиот почеток, неопходно е да се напомене дека лекарите советуваат да внимавате доколку имате ортопедски проблеми со стапалата, глуждовите, грбот или колената. Исто така, ако последните три месеци сте ги поминале седејќи, можеби е паметно да започнете со полесно кардио вежби за прво да изградите аеробна база.

Тоа е затоа што прескокнувањето јаже може да изгледа лесно, но воопшто не е.

1. Го подобрува здравјето на коските

Скокањето со јаже е одлична вежба која ќе ви помогне да изградите и одржувате силен скелет во текот на животот. Тоа е вежба со оптоварување, односно вежба која бара од вас тежината да ја префрлите на вашиот скелет и затоа прескокнувањето јаже помага во подобрување на здравјето на коските.

Според д-р Вилијам Робертс, директор на Програмата за спортска медицина на Медицинскиот факултет на универзитетот во Минесота, оваа вежба е одлична за одржување на густината на коските во позрели години, а може да има уште поголемо влијание кај младите зашто помага во развојот на коските.

- Сакаме да ги поттикнеме ваквите активности во пубертетот, особено кај младите жени, за да го достигнат врвот на коскената густина, бидејќи е многу потешко да се зголеми коскената густина по дваесеттата година - истакнува докторот и додава дека скокањето јаже може да помогне во подобрување на здравјето на коските кај жените во постменопауза, демографската група која најмногу страда од остеопороза.

2. Може да помогне во спречувањето повреди

Колку е посилна коската, толку потешко се крши. Ова е една од причините зошто прескокнувањето јаже помага во спречувањето повреди.

На пример, оние кои страдаат од остеопороза лесно можат да скршат коска по пад или дури и за време на секојдневните активности, како што е наведнување. Колку повеќе вежби со оптоварување се применуваат, како што е скокањето јаже, во сите фази од животот, толку е помала веројатноста да развиете остеопороза или да ги скршите коски при полесни незгоди.

Скокањето со јаже може да спречи и повреди на скочниот зглоб, бидејќи ги зајакнува мускулите што го поддржуваат.

3. Го подобрува здравјето на кардиореспираторниот систем

Експертите веруваат дека прескокнувањето јаже е исто така одлична кардиореспираторна вежба, бидејќи отчукувањата на срцето за време на прескокнувањето може да бидат многу повисоки отколку за време на други кардио тренинзи како што се пешачење, џогирање или возење велосипед.

Кардиоваскуларните вежби не се добри само за срцето и белите дробови. Тие помагаат да се спречи зголемувањето на телесната тежина, високиот крвен притисок и бројни други клинички состојби.

4. Ја подобрува координацијата и рамнотежата

Координацијата е клучна за успешно скокање со јаже - особено помеѓу рацете, стапалата и очите - така што повторувањето на оваа вежба може да ја подобри вашата целокупна координација.

- Скокањето со јаже не е лесно. Потребен е фокус и свесност за сопственото тело. Исто така, ја подобрува рамнотежата, што е една од причините зошто боксерите тренираат со јаже. Ако немате добра координација, скокањето со јаже може да биде многу тешко на почетокот - објаснува д-р Робертс.

5. Согорува калории

Додека скокате јаже, ќе согорите помеѓу 667 и 990 калории на час. Истражувањата ја поддржуваат идејата дека со скокањето со јаже се согоруваат повеќе калории отколку со трчањето.

- Скокањето со јаже има вредност MET од 11 (мерка која се користи за проценка на количината на енергија што се троши при една активност), додека трчањето со брзина од 8 км/ч има MET вредност од 8,3. Само трчање со брзина од 11 км/ч има MET вредност од 11, што е еквивалентно со потрошената енергија при прескокнување јаже за истото време. Со други зборови, треба да трчате прилично брзо за да потрошите подеднакво калории како при скокање со јаже - известува Метју Стултс-Колемајнен, клинички физиолог.

6. Помага во зајакнување на рамената

Од перспектива на сила и тонирање мускули, повеќето физички придобивки од скокањето со јаже се фокусирани на јадрото и долниот дел од телото; сепак, тоа може да помогне и во зајакнување на рамената. Според наодите од една мала студија објавена во списанието Human Kinetics, учесниците поминале 12 неделни тренинзи со трамбулина и завршиле со посилни зглобови на рамената и зголемена подвижност.

Прескокнувањето исто така ја подобрува еластичноста на тетивите и фасцијата (т.е. сврзното ткиво) што ги опкружува, што помага подобро да се складира енергијата.

7. Опремата е достапна и пренослива

Најголемата предност на овој метод на вежбање е тоа што можете да скокате со јаже каде било. Јажето за скокање не зазема простор, тоа е супер лесно и го собира во секоја мала торба, што го прави уште поудобно за користење додека патувате. И не ви треба огромен простор за скокање.

Совршено е и за на отворено, што значи дека ако немате простор во вашиот дом, сепак кога времето е убаво може да уживате во придобивките од скокањето.

Свет

Украина тврди дека Русија лансирала интерконтинентална балистичка ракета

Русија денеска лансирала интерконтинентална балистичка ракета „Кинџал“ од нејзиниот јужен регион Астрахан и седум крстаречки ракети, соопшти украинската војска.

Русија го употреби ова оружје со долг дострел за прв пат откако ја почна војната.

Нападот следуваше откако Украина оваа недела употреби американски и британски ракети за да нападне цели во Русија, за што Москва со месеци предупредуваше како потенцијална ескалација.

Цел на нападот биле бизниси и критична инфраструктура во централно-источниот украински град Дњепар, соопштија властите.

Не е познато што конкретно е погодено од интерконтиненталната ракета или дали има голема штета.

Руските ракети имаат дострел од неколку илјади километри и можат да носат нуклеарни боеви глави.

Украинскиот систем за противвоздушна одбрана собори шест крстосувачки ракети Кх-101 за време на нападот.

Воздухопловните сили на Украина соопштија дека ракетата била лансирана од областа Астрахан во Русија, но не прецизираа за каков тип на интерконтинентална балистичка ракета се работи.

Свет

Бајден поднесе барање до Конгресот за отпишување на долг кон Украина од 4,6 милијарди долари

Американскиот претседател Џо Бајден планира да отпише дел од долгот на Украина настанат преку економска помош, како и да воведе голем број други мерки за поддршка на напорите на Украина пред доаѓањето на администрацијата на Доналд Трамп.

Според американските медиуми, Бајден до Конгресот доставил изјава за намера да отпише половина од долгот на Украина за економска помош, во износ од околу 4,65 милијарди долари.

Дополнителниот пакет за безбедносна помош од 61 милијарда долари, што Конгресот и го додели на Украина во април, вклучуваше околу 10 милијарди долари економска помош како заем. Условите на понудата во тоа време му дадоа на Бајден овластување да прости до 50 отсто од тој заем.

- Го презедовме чекорот што го бара законот за да ги укинеме тие заеми, да ја обезбедиме таа економска помош за Украина, а сега Конгресот е добредојден да преземе иницијатива ако сака, изјави портпаролот на Стејт департментот Метју Милер. Тој додаде дека изјавата за намерите на Бајден била доставена до Конгресот минатата недела.

Иако Конгресот има можност да го отфрли барањето на претседателот, Милер рече дека очекува поддршка од американските пратеници за олеснување на долгот.

- Би бил изненаден доколку Конгресот преземе таков чекор, со оглед на огромната двопартиска поддршка во Конгресот за пружање помош, но ние ќе го следиме законот, рече Милер.

Администрацијата на Бајден вети дека ќе ја зајакне поддршката за Киев пред Доналд Трамп да ја преземе функцијата претседател на САД. Бајден вети дека ќе ги достави преостанатите шест милијарди долари помош доделени за Украина пред инаугурацијата на Трамп. Тој, исто така, одобри испорака на противпешадиски мини во Украина и го овласти Киев да напаѓа цели длабоко во Русија со ракети ATACMS.

Регион

Уапсени 11 лица за трагедијата во Нови Сад, меѓу нив екс министерот Горан Весиќ ...

Уапсени 11 лица за трагедијата на железничката станица во Нови Сад, меѓу нив Горан Весиќ и Јелена Танасковиќ.

Вишото јавно обвинителство во Нови Сад соопшти дека вкупно 11 лица се уапсени и приведени во врска со трагедијата во Нови Сад, кога при падот на настрешницата на железничката станица загинаа 15 лица, а двајца беа тешко повредени. Меѓу уапсените се министерот за градежништво Горан Весиќ, директорката на Инфарсатруктура на железниците на Србија Јелена Танасковиќ, поранешниот директор на Инфарсатруктура на железниците на Србија Небојша Шурлан и помошник на министерот за железнички транспорт Анита Димоски, јави дописникот на МИА од Белград.

По истрагата и деталната анализа на целата потребна документација, разговори со поголем број граѓани, и по извршеното вештачење за утврдување на причините и околностите под кои дошло до пад на настрешницата, што на 20 ноември беше доставено до обвинителството, и запознавање со наодите и мислењето на стручни лица од градежната струка, по наредба на Вишото јавно обвинителство во Нови Сад се уапсени и приведени вкупно единаесет лица.

Поради постоење основи на сомнение, осомничените Ј.Т., Ѓ.В., А.Д. и Н.Ш. сториле кривично дело Тешко дело против општата сигурност од член 288 став 2 од КЗ во врска со кривичното дело Предизвикување општа опасност од член 278 став 3 во врска со став 2 од Кривичниот законик.

-Осомничени: С.Н., М.Ј., Љ.М.М., М.С., Д.Ј., М.Г. и Д.Т. сториле кривично дело Тешко дело против општата сигурност од член 288 став 2 од Кривичниот законик во врска со кривичното дело Непрописно и неправилно извршување градежни работи од член 281 став 1 од Кривичниот законик, се вели во соопштението.

Според РТС, меѓу 11-те уапсени се Горан Весиќ, Јелена Танасковиќ, Небојша Шурлан и Анита Димоски.

Во Вишото јавно обвинителство во Нови Сад претходно беа сослушани 66 лица, а распит чекаат уште пет лица.

При падот на настрешницата загинаа 14 лица, додека тројца се тешко повредени.

Дваесет и четиригодишната Ања Радоњиќ почина во Клиничкиот центар во Војводина и таа е петнаесеттата жртва во несреќата во Нови Сад.