Здравје

Се разбудивте со отечено лице?

Кога е солта причина, а кога треба веднаш да се јавите на лекар? – Овие симптоми не треба да ги занемарувате!

Две работи се чести причини за отекување на лицето.

Лицето е огледало на нашето здравје и кога ќе се разбудите со оток на него, нормално е да се загрижите. Во повеќето случаи, отокот исчезнува по неколку дена, но многу е важно да се препознаат ситуациите кога отокот на лицето е предупредувачки знак.

Лекарите ги издвојуваат следниве најчести причини кои доведуваат до оток на лицето:

Реакција на солена храна

Не е невообичаено лицето, рацете, нозете или глуждовите да се надујат по консумирање голема количина солена храна. Ова се случува поради реакција на крвните садови на вишокот сол, кои апсорбираат повеќе течност за да го одржат балансот на натриум и вода.

Алергиска реакција

Алергиските реакции може да бидат една од причините за појава на оток на лицето. Кога имунолошкиот систем ќе открие алерген, доаѓа до ослободување на хистамини и други хемиски супстанци кои предизвикуваат пропустливост на крвните садови, а тоа доведува до отекување на лицето.

Во случај на сериозни симптоми на алергиска реакција, неопходна е итна лекарска помош.

Инфекција

Вирусните или бактериските инфекции може да резултираат и со отекување на лицето, особено ако има промени во бојата на кожата, треска или чувствителност на допир. Добивањето точна дијагноза може да биде предизвик, но третманот зависи од причината на инфекцијата.

Хормонски дисбаланс

Кушинговиот синдром, кој се јавува поради прекумерно производство на кортизол, може да предизвика заоблено лице поради задржување на течностите или зголемено складирање на маснотии. Хипотироидизмот, исто така, може да доведе до таложење на молекули кои апсорбираат течност, што резултира со надуен изглед на лицето.

Хипотироидизам

Една од најчестите причини за надуено лице е хипотироидизмот, кој се развива постепено со текот на времето. Тоа се случува кога тироидната жлезда во вратот (која може да изгледа отечена) не произведува доволно хормони кои му се потребни на вашето тело.

Ако ја имате оваа состојба, може да чувствувате замор, да имате опаѓање на косата, запек, неправилни менструации, болки во зглобовите и потешкотии со поднесувањето ниски температури.

Хипотироидизмот лесно се дијагностицира преку анализа на крвта и се третира со лекови кои го заменуваат хормонот што вашата тироидна жлезда не го создава самостојно.

Чувствителност на сол

Некои луѓе се особено осетливи на задржување на солта, што може да резултира со надуеност на лицето по консумирање на солена храна. Оваа осетливост може да биде поврзана и со висок крвен притисок, па затоа е важно да обрне внимание на можните реакции на организмот по внесувањето на солена храна, пренесува self.com.

Во случај на какви било невообичаени симптоми, важно е да се побара лекарска помош за да се постави точна дијагноза и да се обезбеди соодветен третман. Отеченото лице може да биде знак за посериозни здравствени проблеми, па затоа е важно внимателно да се следат симптомите и да се реагира навреме.

Свет

Воениот советник на Трамп: Се соочуваме со најголема закана со војна од 1945 година

Западот се соочува со најголемата закана од 1945 година, изјави вчера генералот Џек Кин, воен советник на новоизбраниот претседател на САД, Доналд Трамп, во врска со опасноста конфликтот во Украина да прерасне во нова светска војна.

„Воените игри со сè повоинствената оска на моќ го ставија Западот во најголема опасност од крајот на Втората светска војна“, изјави Кин за Тајмс.

Заканата од директен конфликт со Русија поради војната во Украина ескалира во последните денови по одлуката на САД да му дозволат на Киев да истрела проектили со долг дострел длабоко во Русија, што ја натера Москва силно да предупреди на нуклеарна одмазда.

Кин, поранешен заменик-началник на американската војска, рече дека војната во Украина ќе остане главен приоритет на новата претседателска администрација, и покрај стравувањата дека Доналд Трамп би можел да ја повлече виталната американска поддршка за украинските воени напори.

Тој ја опиша одлуката на Северна Кореја да ги зајакне руските линии со свои војници како „најголема ескалација во војната“, предупредувајќи дека растечкиот сојуз меѓу Русија, Северна Кореја, Иран и Кина претставува „најсериозен и најопасен предизвик“ за Западот во речиси 100 години.

Кин, исто така, посочи дека рускиот претседател Владимир Путин може да се обиде да го зголеми бројот на војници на линијата на фронтот во Украина.

„Тој (Путин) не сака да оди на друга мобилизација од страв да не започнат протести. Тој нема да оди да регрутира во западна Русија каде што живеат образованите, тој оди во руралните области и сиромашните заедници и им дава пари да се приклучат. Избегнува национален повик затоа што знае дека ќе му се спротивстават“, рече Кин.

Кин истакна дека е за преговори, „кога тоа е во најдобар интерес“ на Украина, но дека верува оти Путин „не сака да преговара за договор“.

„Тој повеќе би сакал да ја земе целата земја“, предупреди Кин.

Украинското лансирање на американската ракета ATACAMS со долг дострел оваа недела, како и британската крстосувачка ракета „Storm Shadow“ во Русија за прв пат, што ја натера Русија да истрела експериментална хиперсонична балистичка ракета со среден дострел во Украина како одмазда, го зголемија влогот за опасноста од потенцијално избувнување на глобална војна.

Живот

Принцезата Кејт ги повика преживеаните деца од масакрот во Саутпорт на Божикен концерт

Британската принцеза Кејт ги покани децата кои го преживеаја нападот во Саутпорт во јули на концерт со божиќни песни, објавија британските медиуми.

Принцезата од Велс е надвор од очите на јавноста во поголемиот дел од годината бидејќи се лекува од рак.

Како што информираат од Кенсингтонската палата, децата се поканети да присуствуваат на настанот Together for Christmas на 6 декември, кој принцезата го организира по четврти пат во Вестминстерската опатија.

Во напад со нож на час по танц во Саутпорт, на крајот на јули беа убиени три деца, се сеќава Скај њуз.

Кејт и принцот Вилијам ги посетија и разговараа со семејствата на загинатите во нападот во Саутпорт минатиот месец.

Свет

Мистериозни дронови се забележани над три американски воени бази во Британија

Неколку неидентификувани беспилотни летала се забележани над три воздушни бази во Обединетото Кралство, потврдија американските воздухопловни сили (USAF).

Инцидентите, кои се случиле помеѓу средата и петокот, биле пријавени над РАФ Лакенхит и РАФ Милденхал во Сафолк, како и РАФ Фелтвел во соседниот Норфолк. УСАФ, која ги користи базите, рече дека се уште не е јасно дали беспилотните летала претставуваат закана. Тие не коментираат ниту дали се користени одбранбени механизми, но нагласија дека го задржуваат „правото да ги штитат“ своите објекти.

„Можеме да потврдиме дека беспилотните летала беа забележани во близина и над базите. Имаше неколку од нив, и тие се разликуваа по големина и конфигурација. Активно ги набљудувавме, а раководството на базата заклучи дека ниту еден од упадите не влијаел на жителите на базата или на клучната инфраструктура. Продолжуваме да го следиме нашиот воздушен простор и да работиме со локалните власти за да се осигура безбедноста на персоналот, објектите и опремата“, рече портпаролот на УСАФ за Европа.