Македонија

Ѓорѓиевски: Мега проектот за водоснабдување во Стаклара-Каменик станува реалност

Општина Кисела Вода ќе добие 600.000 евра, за реализација на капиталниот проект за изградба на водовод во Каменик-Стаклара, кој жителите го чекаат половина век. 

Средствата се обезбедуваат од страна на Владата на Република Македонија, која по мерката од 250 милиони евра, сега прави нова голема инвестиција во општините, наменета за управување со води. Заложбите утврдени со Меморандумот потпишан со ЗЕЛС кој сите претходните власти го игнорираа, веќе даваат конкретни резултати, а граѓаните се на прво место, истакна Претседателот на ЗЕЛС, градоначалникот Орце Ѓорѓиевски по денешната средба со Премиерот Христијан Мицкоски.

-Кога се работи чесно и посветено за народот, резултатите се гледаат. А за тоа најмногу зборуваат делата. Денес, на средбата со Премиерот Христијан Мицкоски бевме информирани дека се ставаат на располагање нови над 50 милиони евра кои ќе се слеат во општините, а ќе бидат наменети за управување со води.Чест ми е да напоменам дека, после мерката од 250 милиони евра, ова е втората најголема инвестиција во локалните самоуправи благодарение на посветеноста на Владата и меморандумот потпишан со ЗЕЛС кој сите претходните власти го игнорираа.

Општина Кисела Вода ќе добие 600.000 евра, пари за остварување на долгогодишното барање на мојот народ од Каменик-Стаклара, после 50 години да добијат чиста вода за пиење. Ова исто така ќе значи и дека после завршување на градежните активности, го затвораме поглавјето со подземна инфраструктура и Стаклара конечно, ќе биде последното населено место без соодветно водоснабдување.

Сакам да се заблагодарам на Премиерот Мицкоски и Владата на Република Македонија за нивните заложби за единиците на локалната самоуправа и за нивниот напор за поразвиени општини.Како никогаш во минатото, оваа Влада покажа и докажа дека граѓаните се на прво место.Посебно ме радува фактот што сега навистина постои еднаквост помеѓу општините и што нема апсолутно никакви поделби. Само така, ова наше парче земја ќе стане уште поубаво место за живеење. Продолжуваме!-изјави градоначалникот Орце Ѓорѓиевски, се наведува во соопштението.

Свет

Израел купува од Боинг 25 најнови борбени авиони Ф-15, вредни 5.2 милијарди долари

Израел потпиша договор вреден 5,2 милијарди долари со американскиот производител на авиони Боинг за купување на 25 борбени авиони Ф-15 во најновата верзија ЕХ.

Испораката на авионите е планирана од 2031 година, при што годишно ќе се испорачуваат четири до шест авиони.

Новите израелски авиони ќе бидат приспособени на специфичните потреби на земјата и ќе ја носат ознаката F-15IA, што подразбира инсталирање на израелски технологии и напредна домашна електроника. Овој модел ќе обезбеди зголемен опсег, поголема носивост и подобрени перформанси во различни оперативни сценарија, според израелското Министерство за одбрана.

Овој договор доаѓа во време кога Боинг се соочува со предизвици во производството на борбени авиони, а продажбата на Израел претставува значителен успех за компанијата. Боинг веќе го произведува моделот F-15EX Eagle II за американските воздухопловни сили (USAF), додека израелскиот F-15IA ќе биде дополнително приспособен за нивните специфични оперативни потреби.

Покрај новиот авион Ф-15ИА, Израел на почетокот на оваа година склучи договор со Локхид Мартин за купување на 25 авиони Ф-35 Лајнинг II, кои ќе обезбедат трета ескадрила од овие авиони од петта генерација за израелските воздухопловни сили.

Шоу биз

Турција го забрани прикажувањето на романтичната драма со Даниел Крег во главната улога (ВИДЕО)

Романтичната драма Queer, со Даниел Крег во главната улога, е забранета да се прикажува во Турција.

Како што пишува „Гардијан“, турските власти од областа Кадикој го забранија прикажувањето на најновиот филм на познатиот режисер Лука Гвадањино, бидејќи го сметаат за премногу провокативен и сметаат дека ќе доведе до нарушување на јавниот мир. Имено, филмот содржи експлицитни љубовни сцени меѓу двајца мажи, а една од темите е и зависноста од дрога.

Забраната дојде од „безбедносни причини“, како што рекоа властите на платформата за стриминг и дистрибутер Муба.

Но, оваа одлука не беше без последици. Бидејќи Queer требаше да го отвори Филмскиот фестивал во Истанбул, компанијата Муби, која е и организатор на фестивалот, одлучи да го откаже целиот четиридневен фестивал неколку часа пред отворањето.

„Фестивалите се оази кои ги зближуваат луѓето и ја слават уметноста и културната различност. Оваа забрана не влијае само на еден филм, туку и на значењето и целта на целиот фестивал“, велат портпаролите на компанијата Муби.

Квир е адаптација на истоимениот роман на Вилијам С. Бароуз од 1985 година, кој опишува љубовна приказна меѓу двајца мажи, сместена во средината на минатиот век. Во филмот, Крег го толкуваше Ли, средовечен американски иселеник кој се преселил во Сиудад де Мексико. Таму тој се вљубува во млад војник Алертон (Дру Старки), кој е зависник од дрога.

Во споредните улоги се Лесли Менвил, Џејсон Шварцман, Хенри Зага, Дру Дроге, Ариел Шулман, Дејвид Ловери, Колин Бејтс, Ронија Ава, Перла Амброзини и Сајмон Рицони.

Филмот Квир ја имаше својата светска премиера на филмскиот фестивал во Венеција во септември оваа година. Ги воодушеви тамошните критичари и моментално има рејтинг од 78% на Rotten Tomatoes. Филмот ќе биде прикажан во кината на 27 ноември.

Свет

Избегната трагедија во Висконсин: 13 годишен ученик сакал да влезе вооружен во училиште

13-годишно момче, кое вооружено се обидело да влезе во основното училиште Рузвелт во американската сојузна држава Висконсин, е во притвор откако побегнало кога се соочило со училишниот персонал, соопштија денеска официјални лица.

„За влакно избегнавме трагедија“, изјави началникот на полицијата во Кеноша, Патрик Патон, пренесе ABC News.

Полицијата на Кеноша соопшти дека верува дека момчето имало огнено оружје кога било запрено околу 9 часот вчера додека се обидувало да влезе во основното училиште Рузвелт со ранец и торба, во град на околу 35 милји јужно од Милвоки.

Вработените во училиштето го испрашувале тинејџерот пред безбедниот влез на училиштето, а видеото од надзорот покажало голема црна торба покрај него, соопшти полицијата.

„Веруваме дека всушност станува збор за вооружен осомничен со огнено оружје и нема легитимна причина тој да влезе во училиштето“, рече Патон на вчерашната прес-конференција, додавајќи дека е избегната трагедија.

Според него, единствената причина поради која момчето не можело да влезе во училиштето е брзата и вредна акција на вработените во училиштето.

Момчето веднаш истрчало кога му пришле вработените во училиштето. Полицијата не го соопштила идентитетот на момчето, ниту пак кажале како дошло до пиштолот.

Изјавиле и дека мајката на осомничениот соработува со полицијата.

Полицијата соопшти дека ученикот кој е во притвор, ја посетува гимназијата „Махон“ и е поранешен ученик во основното училиште „Рузвелт“. Инспекторите „имаат информации дека осомничениот извршил повеќекратни пребарувања на Интернет во врска со престрелки во училиштата пред инцидентот“, рече Патон.

притисни ентер