Технологија

ЕК бара од „Епл“ да обезбеди интероперабилност на ајФон

„Прелиминарните наоди“ претставуваат документ со спецификации на предложени мерки за кои Еврокомисијата смета дека една компанија треба да ги спроведе врз основа на одредбите од ДМА. 

Европската комисија испрати „прелиминарни наоди“ до американската компанија „Епл“ во врска со двете барања од септември годинава за обезбедување на интероперабилност на уредите ајФон, како и за овозможување на попредвидлива и транспарентна интероперабилност за трети страни согласно Законот за дигитални пазари на ЕУ (ДМА).

„Прелиминарните наоди“ претставуваат документ со спецификации на предложени мерки за кои Еврокомисијата смета дека една компанија треба да ги спроведе врз основа на одредбите од ДМА.

Во случајов со „Епл“, ЕК смета дека компанијата треба „ефективно да се усогласи со своите обврски за интероперабилност во врска со неколку функции за поврзување со ајОС, кои претежно се користат за и од поврзани уреди“.

Станува збор за испраќање известувања за автоматско поврзување на Ви-Фи, ЕрПлај или ЕрДроп или, пак, за автоматско префрлување на Блутут.

Во „прелиминарните наоди“ за второто барање се наведени предложените мерки што Комисијата смета дека „Епл“ треба да ги спроведе во врска со „процесот што го поминуваат програмерите за да добијат интероперабилност со специфична функција на ајОС или ајПадОС“.

- За да се осигура дека со овие предложени мерки се постигнува ефективна интероперабилност во согласност со ДМА, Комисијата започна две јавни консултации: за мерките релевантни за поврзаните уреди кои бараат интероперабилност со ајОС, како и за процесот на барање за интероперабилност на „Епл“ за трети страни, се наведува во соопштението на Еврокомисијата.

Сега заинтересираните страни имаат рок до 9 јануари 2025 година да ги достават своите ставови за секоја од предложените групи мерки.

Според ДМА, „Епл“ е обврзана на програмерите и бизнисите да им обезбеди слободна и ефективна интероперабилност со хардверските и софтверските карактеристики на неговите оперативни системи ајОС и ајПадОС, кои се основни услуги на платформата заради која компанијата доби статус на еден од „дигиталните чувари“ на ЕУ.

По добиените повратни оценки за предложените мерки во наодите од заинтересираните страни и од „Епл“, Комисијата „внимателно ќе ги процени“, по што има рок од шест месеци за евентуално отворање на постапка против американската компанија заради неусогласеност со ДМА.

Според Законот, Комисијата може да донесе одлука во која ќе бара специфични мерки што треба да ги спроведе еден „дигитален чувар“ за да ги исполни обврските од членовите 6 и 7 од ДМА. /МИА

Македонија

УХМР: Студен бран со врнежи од дожд и снег

Под влијание на циклонска активност и студена воздушна маса од север времето утре ќе биде облачно и студено со врнежи од дожд и снег во пониските места, а на планините и повисоките места од снег, најавуваат од Управата за хидрометеоролошки работи.

Врнежите ќе бидат пообилни во западните и крајните источни делови (над 25л/м2) каде на планините ќе се зголеми постојната снежната покривка, а помала снежна покривка ќе се формира и во некои од пониските места. Ќе дува умерен до засилен јужен, а во текот на ноќта засилен северен ветер (над 60км/ч).

Потоа до четврток ќе се задржи променливо облачно, студено и ветровито време со локални врнежи претежно од снег, особено во среда.

Во Скопје, облачно и студено со врнежи од дожд, а во повисоките делови од котлината врнежите ќе преминат во снег, особено попладне. Ќе дува умерен југоисточен, а во текот на ноќта повремено засилен северен ветер. И во следните три дена ќе има услови за провејување на снег, особено во среда.

Фудбал

Горан Пандев спортски директор на националните селекции

Горан Пандев спортски директор на националните селекции. Илија Најдоски и Агим Ибраими советници на новиот претседател на ФФМ.

Марјан Стојкоски е нов потпретседател на ФФМ, Дрилон Ганиу в.д. генерален секретар.

Веднаш по завршувањето на Вонредно изборно генерално Собрание на Фудбалската федерација на Македонија, новиот претседател на ФФМ, Масар Омерагиќ одржа состанок со членовите на Управниот одбор на федерацијата.

На состанокот, на предлог на претседателот на ФФМ, Масар Омерагиќ, членовите на Управниот одбор на ФФМ го избраа Марјан Стојкоски од ОФС Прилеп за потпретседател на Фудбалската федерација на Македонија на местото од досегашниот потпретседател, Лазар Ракиџиев.

На седницата, исто така, беше констатирана оставката од функцијата генерален секретар на Наталиа Илиевска Божиновска.

За в.д. генерален секретар во Фудбалската федерација на Македонија е назначен Дрилог Ганиу, досегашен заменик на првиот оперативец во „Куќа на фудбалот“.

На предлог на новиот претседател на ФФМ, македонската фудбалска легенда, Горан Пандев е назначен за спортски директор на сите македонски репрезентативни селекции.

Еден од великаните на македонскиот фудбал, Илија Најдоски заедно со нашиот поранешен репрезентативец, Агим Ибраими се назначени за советници во кабинетот на претседателот на ФФМ, Масар Омерагиќ.

Македонија

Водата од водоснабдителниот систем на град Скопје е санитарно исправна

Водата од водоснабдителниот систем на град Скопје е санитарно исправна и може непречено да се користи, покажуваат резултатите од вонредниот мониторинг по вчерашната санација.

Секторот Санитарна контрола на ЈП „Водовод и канализација“ Скопје изврши вонреден мониторинг на водоснабдителниот систем на градот Скопје кој беше во прекин со водоснабдување поради изведување на активности за санација, реконструкција и модернизација на градската водоводна мрежа и по добиените резултати информира дека водата од водоснабдителниот систем на град Скопје е санитарно исправна и истата може од страна на граѓаните непречено да се користи.

Мониторингот опфати девет клучни места и тоа во Автокоманда, Сингелиќ, Маџари, Ново Лисиче, Центар, Драчево, Пржино, Ѓорче Петров и Карпош од каде беа земени примероци од водата за пиење врз кои беше изведено физичко-хемиско и микробиолошко лабораториско тестирање.

-Сакаме да ја информираме јавноста дека од добиените резултати сите примероци физичко-хемиски и микробиолошки ОДГОВАРААТ на Правилникот за барање за безбедност и квалитет на водата за пиење (Службен весник на РМ бр.183/18), со што констатиравме дека водата од водоснабдителниот систем на град Скопје е санитарно исправна и истата може од страна на граѓаните непречено да се користи, информираат од ЈП „Водовод и канализација“ Скопје.

Покрај теренските мерења на рутинските параметри, тестирање беше изведено со стандардни методи и јонска хроматографија за физичко-хемиската анализа, како и со полимераза верижна реакција метода за микробиолошката анализа.

Вчера беше извршена санацијата и реконструкцијата на градскиот водовод во Скопје, во која учестуваа повеќе од 160 лица технички персонал на ЈП Водовод и канализација, како и 150 административен персонал.

Градоналничката на Град Скопје, Данела Арсовска, по санацијата изјави дека станува збор за модернизација што за првпат се случува во повеќе од 50, односно скоро 60 години во градот Скопје.

Поради овој сложен оперативен план за санација на главниот цевковод поголем дел од Скопје вчера беше без вода од околу 2 часот, се до санирање на дефектот околу 14 часот, по што започна со постепено полнење на магистралниот цевковод на градот.

притисни ентер