Македонија

Стопанска комора: Алармантна состојбата во металската индустрија

Редуцирано е производството во металската индустрија, а значителен пад, од речиси една третина, бележи и извозот.

Тоа, како што беше речено денеска на прес-конференција во Стопанската комора, ќе се одрази врз вработените.

Според претседателот на Здружението на металургијата Митко Кочовски, лани, заклучно со ноември, производството на руди и метали евидентира пад од осум отсто, а само на метали 11 проценти.

- Бројките се поразителни. Само во ноември 2016 производството на основни метали е намалено за 20 отсто во однос на истиот месец 2015 година. Значително е намален и извозот, 26 проценти или безмалку една третина. Во периодот јануари - октомври бил 384 милиони долари за разлика од реализираните 519 милиони во истиот период 2015. Нормално, ова намалување на производството и на извозот, повлекува намалување и на вработените, истакна Кочовски.

Негова оценка е дека покрај светските прилики кои силно влијаат на металската индустрија, состојбата дополнително ја усложнуваат и одредени внатрешни системски решенија. -Сака ли државата да има индустрија за метали? Не бараме непринципиелна поддршка, некој да ни ги реши проблемите внатре, туку јасна визија за тоа каде ќе се движи секторот. Да се изготви студија по примерот на долгорочните стратегии за енергетскиот сектор, да се решат проблемите со сопственоста на земјиштето кое се води како општествено и да се реши водоснабдувањето, напомена Кочовски.

Осврнувајќи се на состојбите по комбинати, информира дека производството на Фени е преполовено, Макстил работи со половина капацитет, Бучим не го прекинува производството зашто двојно ќе го чини ако треба да рестартира, а Арчелор митал е за нијанса подобар. Исклучително незавидна, додаде, е и ситуацијата со леарниците.

- Во Дојран стил моментно се реализира инвестиција која ќе овозможи зголемување на производството. Нешто подобра е ситуацијата и во двете фабрики за цевки, во Куманово и во Кавадарци, посочи претседателот на Здружението.

И покрај уверувањата од надлежните дека ќе бидат сериозно разгледани и решени проблемите во металургијата со пакет мерки, од тоа, потенцира Кочовски, брзо се отстапи и се се претвори во јалова дискусија.

Тој укажа и на проблемите со еколошките дозволи, подвлекувајќи дека и кога капацитетите не работат загадувањето е многу високо, како и со немањето доволно стручен кадар.

Македонија

Народната банка ја додели Годишната награда за млади истражувачи за 2024 година

Народната банка, на денот на монетарната самостојност, 26 април, традиционално ја додели Годишната награда за млади истражувачи за најдобар труд од областа на макроекономијата и банкарството.

Овогодишниот добитник на првата награда е младиот истражувач Никита Ристовски за неговиот труд „Економски раст поттикнат од интеграцијата: Случајот на интеграцијата на Македонија во Европската Унија“. Годинава, беше доделена и втора награда за трудот „Монетарната политика и каналите на цените на средствата во контекст на регионализацијата на берзите во земјите на поранешна Југославија“ на Стефан Таневски.

При доделувањето на наградите, младите истражувачи остварија средба со гувернерката на Народната банка, како и со Одборот за оценување трудови, којшто го сочинуваат вицегувернерката Ана Митреска, претседател и членовите Билјана Давидовска-Стојанова, директорка и Гани Рамадани, заменик-директор во Дирекцијата за монетарна политика и истражување. На средбата со младите истражувачи беше искажана поддршка за нивниот придонес кон научноистражувачката работа. Беше истакнато дека основната цел на Народната банка за организирање на Конкурсот за Годишната награда, веќе осумнаесет години, е да се афирмираат младите истражувачи и да се даде придонес кон развојот на истражувачката дејност во земјава во областа на макроекономијата и банкарството.

Во согласност со досегашната практика, наградените трудови ќе бидат презентирани на некоја од следните сесиите на Клубот на истражувачите на Народната банка, којшто служи како центар за развој на истражувачката мисла и мрежа за поврзување на истражувачите од ова поле на интерес.

Пригодното одбележување на монетарната самостојност преку чинот на доделување на Годишната награда ги отсликува залагањата на Народната банка за постојано јакнење на научноистражувачката мисла во прилог на макроекономската стабилност, раст и развој. Инаку, Народната банка одбележа 32 години од монетарното осамостојување, односно од осамостојувањето како централна банка и од воведувањето на националната валута – денарот. За овие 32 години, напорите на централната банка беа насочени кон обезбедување макроекономска и финансиска стабилност, како фундаменти за економскиот раст и развој, работејќи особено на јакнењето на сопствените капацитети, односно на напредокот на човечките ресурси. Залагањата и резултатите на Народната банка во изминатите години се признаени од сите релевантни меѓународни организации, а таа е согледана како современа професионална институција, со висок кредибилитет.

Народна банка на Република Македонија

Фудбал

Модриќ трет странец според бројот настапи за Реал

Хрватскиот фудбалер Лука Модриќ изминатата вечер стана третиот странец со најмногу настапи за Реал Мадрид, објави клубот основан пред 122 години.

Модриќ беше дел од победата од 1-0 на гости кај Реал Сосиедад со која Реал е на чекор до освојување на шпанската титула.

За 38-годишниот капитен на хрватската репрезентација тоа беше негов 527. натпревар за „Кралскиот клуб“, со што се израмни на вечната листа со легендарниот бразилски играч Роберто Карлос.

Пред нив се само Бразилецот Марсело со 546 настапи и Французинот Карим Бензема со 648 натпревари.

Свет

Хутите истрелаа три проектили кон два брода во Црвеното Море

Американската војска соопшти дека јеменските бунтовници Хути лансирале три противбродски балистички проектили врз два брода во Црвеното Море, при што лесно е оштетен британски танкер за нафта.

Американската централна команда (ЦЕНКОМ) во објава на платформата Икс соопшти дека танкерот за нафта МВ Андромеда Стар е оштетен, а проектил паднал во близина на друг брод, МВ Маиша, но не го оштетил.

Од ноември минатата година, Хутите напаѓаат комерцијални бродови во Црвеното Море и Аденскиот Залив со проектили и беспилотни летала во знак на, како што велат, поддршка за палестинската милитантна група Хамас во конфликтот со Израел во Појасот Газа.