Рај, пекол, длабока темнина или реинкарнација, листата на можности е бесконечна... Но, научниците веруваат дека можеби конечно решиле барем дел од загатката, откако ја проучувале првата снимка на човечкиот мозок во моментот на смртта, објави Блиц.
Минатата година американските истражувачи направија ЕЕГ или електроенцефалографија на 87-годишен маж кој боледувал од епилепсија. Преку ЕЕГ тест ги снимиле мозочните бранови на пациентот 15 минути откако починал од срцев удар.
Постоењето на „гама осцилација“, односно зголемување на мозочните гама бранови, кои се доминантни во ситуации кога е неопходен висок интелектуален стрес, кога се обработуваат големо количество информации за кратко време, кога брзо ги обработуваме информациите или кога свесноста се зголемува преку употреба на сите пет сетила... Ова совршено одговара на теоријата дека животот на човекот му прелетува пред очи во моментот на смртта!
„Преку производство на осцилации вклучени во извлекувањето информации од меморијата, мозокот може да го репродуцира последниот потсетник за важни животни настани непосредно пред нашата смрт, слично на она што го пријавиле луѓето кои биле на работ на смртта“, рече др. Ајмал Зејмар, главен автор на студијата која беше објавена во научното списание „Frontiers in Aging Neuroscience“.
„Овие наоди го предизвикуваат нашето разбирање за тоа кога точно завршува животот и поставуваат важни следни прашања, како што се оние поврзани со времето на донирање органи“, додаде тој.
„Нешто што можевме да научиме од ова истражување е дека иако нашите најблиски трајно ги затвориле очите и се подготвени да нѐ напуштат, нивниот мозок можеби повторува некои од најубавите моменти што ги доживеале во нивните животи“, нагласи д-р Зејмар, цитира „Ladbible“.
Некои претходни студии покажале слични промени во мозочните бранови кај стаорци во моментот на смртта, но ова било прв пат истото да се открие кај луѓето. Сепак, како што е случајот со повеќето истражувања, тимот на научници истакнува дека е неопходно дополнително истражување за да се обезбедат поубедливи докази за нивната теорија.