Прв на списокот за помилување е Акиф Бејадин Равмановски на кој извршувањето на изречената казна му е заменета со условна. Равмановски во Идризово ја издржуваше 15 месечната затворска казна за поседување нелегално оружје. Познат е под прекарот Акиф Јусуфи како водач на скопскиот клан Барон а според неофицијални информации Равмановски е еден од осомничените за пукањето што се случи пред десетина дена во скопски Чаир кога едно лице, припадник на кланот Грчец беше тешко рането. На списокот на помилувани се најде и Шенол Маслани, брат на познатиот Шенки „Версаче“, кој беше уапсен во 2019 година како дел од група која продавала деоги и му се заканувала на полициски службеник. Инаку и двајцата му се братучеди на Фатљум Аети-Тоте од криминалната група „Беланоца“. Претседателката Сиљановска денеска посвечената академија во изјава за ТВ 21 рече дека не ги гледале личностите, при потпишувањето на одлуките се воделе по кривичното дело и ќе ја почитува работата на Комисијата за помилување.
-Кога се работи јас веќе и имињата не ги знам да бидам искрена меѓутоа кога јас ги потпишав овие одлуки по што се водев? Се водев од тоа дека во првиот случај не го знам ни името како беше да бидам искрена делото е, пресудата е 1 година и 3 месеци и делото се однесува на поседување неовластено поседување на оружје и на 5 куршуми. Тоа е делото. Веројатно тие се воделе по ова. Да личноста знам која е таа личност но лично јас зборувам за работата на комисијата. Кај вториот случај се работи за дело кое е врзано со насилство или на некоја наплатна станица некоја тепачка и казната е 6 месеци. Веројатно тие се воделе од ова заменувајќи ги обете кај првата е година и три месеци значи кога ги замениле овие казни со условна од три години, да личностите се навистина интересни во негативна смисла на зборот тоа е факт сега гледам јас тоа, но јас велам дека тие се воделе од конкретните дела,- изјави – Гордана Сиљановска Давкова – Претседател на РМ.
Канал 5 побара став и од дел од членовите на Комисијата за помилување кај Претседателот, по кои критериуми и дали сите дале позитивно мислење за помилувањата. Универзитетскиот професор Гордан Калајџиев единствено посочува дека како тело имаат советодавна улога но и дека според него поради лошите затворски услови треба почесто да се дава помилување.
-Комисијата за помилување не е самостоен орган кој со тоа би носел одговорност за одлуките, туку советодавен и дава мислење (како што даваат и затворите и МП) а одлуката е на суверенот. Лично мислам дека политиката на помилување е рестриктивна (строга) и се дава поретко и помалку (во скратувањето) отколку кога јас лично би одлучувал. Ако се земе предвид дека казните се строги а затворските услови очајни, треба да се дава повеќе. -Гордан Калајџиев – Универзитетски професор.
Дел од експертската јавност е на став дека за одредени кривични дела не смее да се даваат помилувања. Поранешниот началник во МВР Љубомир Ѓурчевски смета дека одлуката за помилување не треба да опфаќа повратници во криминалот.
-Јас сум против било какво намалување на казна на лица осудени за трговија со дрога и лица кои нелегално поседуваат огнено оружје. Бидејќи станува збор за лица криминалци, рецидивисти односно повратници во криминалот и на кои ресоцијализацијата не влијае. Тоа требало да го цени Комисијата и пред Претседателот да излезе со конкретен предлог или да се изгради генерален став за во иднина дека лица осудени за такви кривични дела да не може да бидат помилувани,- изјави – Љубомир Ѓурчевски – Поранешен началник во МВР.
Меѓу помилуваните има и други лица кои беа осудени во познати случаи во јавноста. Еден од нив е поранешниот градоначалник на Битола, Владимир Талески, кому претседателката му скрати една година од затворската казна со што му остануваат за извршување уште околу три години. Делумно помилување со три месеци помала казна доби и Марјан Ефремов, кој беше првообвинет во предметот „Шпион“. Одлуката за помилување од вчера е објавена во Службен весник со што и стапува на сила.