Се криеле во Лондон, а потоа папараците ги разоткриле (фото + видео)

Откриена тајната на познатиот холивудски пар...

Амал Клуни (45) е една од најпознатите и најпочитувани меѓународни адвокати за човекови права во светот, мајка на две деца, близнаците Ела и Александар (6) и сопруга на актерот Џорџ Клуни (62). Нејзината раскошна убавина не е за занемарување, па пред 10 години, во 2013 година, беше избрана за најубава адвокатка во Лондон. Џорџ и Амал се запознале во Италија, поточно во неговата вила на езерото Комо. Во јули 2013 година, таа поминувала од таму кога одела за Кан со една нивна заедничка пријателка. Штом ја запознал, Џорџ сфатил дека никогаш претходно не сретнал таква жена.

- Помислив дека е убава, забавна и многу паметна. Не знам дали и таа го помисли истото за мене. Веројатно помислила дека сум стар. Потоа ми испрати неколку фотографии што ги направи кога беше тука и почнавме да се допишуваме. По некое време ни стана јасно дека тоа помеѓу нас прерасна во нешто повеќе од пријателство. Во октомври 2013 година, ја поканив Амал да ме посети во студиото „Аби Роуд“ (Abbey Road) во Лондон, каде што снимав филм. Одлично си поминавме. Потоа отидовме на вечера. Само што тргнавме, пред вратата се појавија 50 папараци, но таа одлично се снајде. Додека бев во Лондон, работите брзо ескалираа и таму останав следните шест недели – објасни тогаш Клуни.

Дотогашниот најпознат ерген повеќе не одолговлекувал, па по само шест месеци врска, во април 2014 година, ја запроси Амал во неговиот дом.

- Јас сум готвач во семејството. Не направив ништо импресивно, некоја тесстенина. По вечерата, ѝ реков да оди до фиоката да ја земе запалката за да ги запалиме свеќите. Таа отвори и го извади прстенот. Останатото го завршив јас, клекнав и направив сè што е потребно. Таа зјапаше во прстенот и велеше: „О, Боже“! Клечев 20 минути и чекав да каже „да“, таа беше многу шокирана – објасни Клуни.

Амал ретко зборува за Џорџ, но првпат направи исклучок пред неколку години во театарот Долби во Лос Анџелес, каде што Клуни ја доби наградата за животно дело од Американскиот филмски институт. Така, деталите за нивната врска конечно излегоа на виделина.

- Го запознав Џорџ кога имав 35 години и тој почна да се крие во мојот стан во Лондон. Набргу почувствував дека што и да се случи, не сакам да бидам со некој друг. Не можев да заспијам кога бевме разделени. Ми велеа дека се смешкам како никогаш досега и дека ја навалувам главата на одреден начин секогаш кога ги читам неговите пораки и писма што кришум ги ставаше во чантата. Години подоцна, ништо од тоа не се промени. Тој е личноста на која неизмерно ѝ се восхитувам, која ме воодушевува и чија насмевка секој пат ме растопува. Со него ја најдов љубовта за која отсекогаш сонував. Нема ништо поубаво од тоа кога го гледам како си игра со нашите деца, кои, исто така, еден ден ќе се гордеат со него кога ќе сфатат кој е тој, како што се гордеам јас - изјавила тогаш Амал.

Пандов: Јанева има право пак да побара да работи надвор од затворот, нека побара

-За Катица Јанева ве уверувам дека имав анонимна дојдава дека госпоѓата не е на работното место. Јас по службена должност бев обврзан да пратам службени лица да проверат дали е тоа така и констатираа дека не била на работното место, рече тој.

Александар Пандов, в.д директор на Управата за извршување на санкции денеска изјави дека за поранешната специјална обвинителка Катица Јанева, која издржува затворска казна, имал дојава дека не е на работното место надвор од затворот и за кое имала дозвола и при проверка се увидело дека таа навистина не е таму. Јанева има право повторно да побара да работи надвор од затворот, но Пандов не кажа дали тоа ќе биде дозволено, туку само дека може да побара.

-За Катица Јанева ве уверувам дека имав анонимна дојдава дека госпоѓата не е на работното место. Јас по службена должност бев обврзан да пратам службени лица да проверат дали е тоа така и констатираа дека не била на работното место, рече тој.

За Јанева рече дека проверувал и дека таа има право повторно да побара да работи надвор од затворот, а дали ќе биде одобрено кусо рече „нека побара“.

Минатата недела вработени од Управата направиле контроли да видат дали и други затвореници кои имаат исто право се на работните места. За тојца, како што кажа, Пандов е утврдено дека не биле.

-А во меѓувреме имаме минатата недела две или три контроли направено на повеќе локации и во град Скопје, во Тетово и во Гостивар и притоа од десетина проверени лица се најдени уште три кои требале да бидат на одредено работно место, а не биле. И за нив исто ќе бидат одземени работните дозволи, рече в.д директорот на Управата за извршување санкции.

Пандов најави дека проверки на затворениците кои имаат право да работат ќе се прават редовно.

За Бојан Јовановски, познат како Боки 13, кој иако треба да биде во затвор не е, рече дека од Судот добил условен прекин поради здравствени причини.

-Проверив за него. Тој има добиено условен прекин, до кога не знам, но тоа судот му има одредено поради здравствени причини. Тоа не е прекин кој што го дава Управата туку Судот и има овластување Судот тоа да го направи, рече Пандов.

В. д директорот на Управата за извршување санкции денеска одржа прес-конференција на која соопшти дека при вонредна контрола во Затворот „Скопје“ е утврдено дека единаесет затвореници не биле во своите ќелии и дека дел од затвореници доаѓале и си заминувале од затворот кога сакале.

Борел: Неприфатливи се обвинувањата дека ЕУ се залага за војна во Украина

Тоа е целосно неприфатливо. Европската унија ја поддржува Украина и е подготвена оваа војна да заврши врз основа на Повелбата на Обединетите нации. 

Шефовите на дипломатиите за земјите членки на ЕУ на денешното заседанието на Советот за надворешни работи (ФАК), ќе одржат посебна расправа од затворен тип само со нивно присуство посветена на посетите на премиерот на Унгарија, Виктор Орбан на Киев, Москва и Пекинг и на обвинувањата на унгарскиот министер за надворешни работи Петер Сијарто на заседанието на Советот за безбедност на ОН дека Унијата се залага за војна во Украина, најави високиот претставник на ЕУ за надворешна политика и безбедност Жосеп Борел.

- Тоа е целосно неприфатливо. Европската унија ја поддржува Украина и е подготвена оваа војна да заврши врз основа на Повелбата на Обединетите нации. Ќе разговараме за тоа како земјите членки ја оценуваат оваа позиција на државата, кој во исто време е ротирачки претседавач со ЕУ. Европската Унија не се залага за војна, изјави Борел, додавајќи дека ЕУ не страна во војната, туку е во „војна за одбрана на Украина од агресија“.

На новинарско прашање дали ќе претседава со неформалното заседание на Советот за надворешни работи што за кон крајот на август во Будимпешта го најави Унгарија, Борел нагласи дека на денешниот состанок ќе се разговара за она што се случи и за ставот на унгарската влада и врз основа на оценките на земјите членки ќе биде донесена одлука како да се продолжи натаму.

- Не знам што ќе кажат земјите членки и затоа сакам тие да го кажат своето гледиште. Тоа е моја одлука. Високиот претставник е тој што свикува состанок на Советот. Така што откако ќе ги ислушам сите и откако ќе разговараме, ќе треба да донесам одлука, истакна Борел.

Во однос на Украина, според него, има две главни прашања кои ќе бидат тема на расправа на Советот, почнувајќи од обидите да се избегне целосно уништување на нејзиниот електроенергетски систем, имајќи предвид дека се уништени 70 проценти од капацитетите за производство на електрична енергија на земјата.

- Ќе ги повикам земјите членки да обезбедат поголема поддршка за обнова и зајакнување на електричната мрежа за производство на електрична енергија, рече Борел.

Тој нагласи дека втора тема во однос на Украина ќе биде зајакнувањето на противвоздушната одбрана на земјата, потсетувајќи дека набрзо по посетата на премиерот Орбан на Москва на почетокот на месецов, детската болница во Киев беше погодена од руски ракети, со што беа предизвикани многу жртви меѓу децата.

- Значи повеќе противвоздушна опрема и поголем капацитет за производство на електрична енергија. Тоа се двете прашања кои земјите членки ќе треба да ги разгледаат, додаде Борел, најавувајќи дека министрите ќе одржат и состанок преку видео конференциска врска со нивниот украински колега Дмитро Кулеба.

Борел додаде дека на заседанието ќе стане збор и за состојбата на Блискиот Исток во светло на објавеното советодавно мислење на Меѓународниот суд на правдата, во кое се наведува дека израелската окупација на палестинските територии на Западниот Брег е целосно нелегална и таа мора да прекине, став што, според него, ЕУ отсекогаш го поддржувала.

-Да, тоа е советодавно мислење, но доаѓа од Меѓународниот суд на правдата - највисокото правно тело на ОН, со многу јасна порака. Тие порачаа дека окупацијата е нелегална и мора да престане. Израел мора да ги повлече доселениците, истакна Борел.

Тој додаде дека Владата на израелскиот премиер Бенјамин Нетанјаху веднаш го отфрлила ваквото барање, образложувајќи го својот став со тврдењето дека тоа е еврејска земја и дека Израел не може да се повлече од таму поради историски причини.

- Можете да ја интерпретирате историјата како што сакате, но тука говориме за меѓународното право. Ние ќе го почитуваме меѓународното право. Мора да разговараме што ќе правиме сега, кои се последиците од ова мислење на Судот и како Европската Унија ќе го вклучи ова мислење во рамките на својата политика кон Блискиот Исток, истакна Борел.

Според него, за жал никогаш немало толкава разлика меѓу меѓународното право и реалната состојба на теренот, каде во Газа има хуманиарна катастрофа со неприфатливи димензии предизвикана од човекот - 17.000 сираци и речиси 40.000 убиени и каде за расчистување на урнатините ќе бидат потребни десетина години.

- Разлика во она што го вели правото, според Меѓународниот суд на правдата, и она што се случува на теренот никогаш не била толку голема како што е денес. Судот го пополнува вакуум просторот на политиката. Политиката не е во можност да најде решение, но Судот не е тука за да го имплементира своето мислење, тоа мора да се имплементира од политичките власти и ЕУ има посебна одговорност за ова прашање, потенцира Борел.

Затоа, според него, ЕУ мора да расправа за тоа што ќе преземе, освен само што ќе објави дека го поддржува ставот на Судот и дека бара од Израел да не продолжува со изградбата на еврејски доселенички населби.

Тој најави дека на министрите им доставил документ изработен од специјалниот претставник на ЕУ за човекови права, Олоф Скуг врз основа на извештаи на меѓународните агенции на ОН за хуманитарните последици од војната во Газа, што, според него ќе биде добра основа за подготовката на заседанието на Советот за асоцијација ЕУ-Израел на кој не може да се дискутира како се да е в ред, затоа што работите не се в ред во услови кога продолжува војната и постои ризик од нејзино проширување низ регионот.

- Се соочуваме со катастрофална ситуација. Да, мора да зборуваме за билатералните односи, но мора да зборуваме за тоа што се случува во Газа и на Западниот Брег. Мораме да зборуваме за економските ограничувања на палестинската управа со намалување на даночните приходи што ги прави Израел. Мора да зборуваме за изградбата на доселеничките населби. Мораме да зборуваме за тоа зошто хуманитарната поддршка не пристигнува во Газа. Но, за тоа ми треба едногласна согласност на земјите членки за нашата заедничка позиција за овој Совет за асоцијација.

Борел информира дека покрај Украина, Газа и Западниот Брег, кои секогаш се на дневниот ред на заседанијата на Советот за надворешни работи, министрите исто така ќе се сретнат и со новата претседателка на Европската инвестициска банка, Надија Калвињо со цел да се разгледа како подобро да се искористат ресурсите на Банката во спроведувањето на надворешната политика на Унијата, особено соработката со трети земји, но исто така и за финансирањето на одбранбените напори на ЕУ.

- ЕИБ е многу важен играч, со портфолио поголемо од она на Светската банка и добро е што новата претседателка ќе дојде овде да разговара со нас за тоа како можеме подобро да ја искористиме нејзината поддршка. Конкретно, мислам дека треба да се инвестира во поддршка на палестинската управа со повеќе позајмици, како што веќе беше дискутирано во Европскиот парламент изминатите денови, додаде Борел.

Тој потенцира дека овој последен состанок на ФАК пред летните одмори е многу важен и изрази надеж дека земјите членки ќе бидат подготвени да ја преземат својата одговорност.

Запрашан за став во однос на одлуката на американскиот претседател Џо Бајден да се повлече од претседателската трка, Борел изјави дека му посакувам се најдобро на новиот демократски кандидат што ќе настапи на изборите наместо Бајден.

- Соработувавме многу добро со претседателот Бајден, имавме многу позитивни односи. Но, ако претседателот Бајден одлучи да се повлече затоа што мисли дека друг кандидат може да и донесе победа на Демократската партија на изборите, ние не ја почитуваме неговата одлука, рече Борел.

Тој нагласи дека е сигурен оти ќе има важна разлика врз трансатлантските односи во зависност од тоа кој ќе биде новиот станар на Белата куќа, но дека Американците се тие кои треба да одлучат кого сакаат да имаат во неа.

- Тоа е одлука на граѓаните на САД. Не сакам да се мешам. Мислам дека не е наша работа да одиме и да им кажеме на Американците што треба да направат или да изразиме преференции за едниот или другиот кандидат. Во секој случај, тоа не е моја работа, истакна Борел.

За влез и за излез во државата од Табановце и Богородица се чека еден час

За влез и за излез во државата од Табановце и Богородица се чека еден час, во функција сите ленти на граничните премини.

За влез од граничниот премин Табановце и за излез од граничниот премин Богородица се чека околу еден час, соопштија денеска Министерството за внатрешни работи за МИА. Од МВР посочуваат дека се ставени сите човечки и технички капацитети за да се забрза протокот на патници. Викендов на ГП Табановце влегле над 26.000 патници, на Богородица излегле над 22.000 патници.

- На излез од Република Македонија на ГП Богородица се чека околу еден час, а на ГП Стар Дојран околу 45 минути. На ГП Богородица работат пет ленти за излез, а на ГП Дојран две. На ГП Табановце работат пет ленти за влез. За влез во државата се чека околу еден час. Од страна на МВР се преземаат сите мерки и во функција се ставени сите човечки и технички капацитети за да се забрза протокот на патници, се разбира со спроведување на задолжителните гранични проверки, информираа од МВР.

Викендов, од 19 до 21 јули годинава, излез од ГП Богородица оствариле 22.715 патници. На ГП Табановце викендов во државата влегле 26.063 патници. На овој граничен премин, денеска, од полноќ досега, за влез се пријавени 3.245 патници.

Според податоците на МВР од 1 јануари годинава до 15 јули минатата година, бројот на патници за излез од државата на ГП Богородица бил 724.840, а за истиот период (1 јануари до 15. јули годинава), бројот на патници за излез од Република Македонија на ГП Богородица бил 750.812, што значи, има зголемување за околу 25.000 во однос на лани.

притисни ентер