Свежо цвеќе пред споменикот на Аџиларски положи делегација од општина Илинден предводена од градоначалникот Александар Георгиевски, делегација предводена од пратеничката Драгана Бојковска, советници, претставници на општинските јавни институции и установи, сојузот на борци, Здружението на пензионери од Општина Илинден и невладини организации месни заедници и граѓани.

Денот на македонската револуционерна борба, 23-ти Oктомври, е ден кога со гордост се потсетуваме на борците за слобода и еднаквост каков што бил Васил Стојанов-Аџаларски, кој е роден во селото Аџалари, денешно Миладиновци во 1880 година, а загинува во 1909 година. Аџаларски пред и по Илинденското востание бил предводник на поголема чета, а во неговата чета имало повеќе комити од околните места на денешната општина Илинден.

Во рамки на одбележувањето на празникот во просториите на Домот на култура во Миладиновци се одржа и шаховски турнир на кој учествуваа 16 шахисти членови на здружението на пензионери „Илинден“ кои беа поделени во две групи. Се играше според ФИДЕ Правила за забрзан шах, а темпото на игра беше 10 минути по играч.

Покровителот на настанот, градоначалникот на Општина Илинден Александар Георгиевски на најдобро пласираните им додели пригодни награди и плакети. Од сите 16 учесници првото место го освои Трајче Христовски од Бунарџик, второто место го освои Душко Сурловски од Марино, третото место го освои Миле Спасовски од Миладиновци и четврто место за Димитар Мицевски.

Општина Илинден