Свет

Полицајци од Романија, Унгарија и Австрија ќе ја чуваат бугарската граница кон Турција

По целосното приклучување на Бугарија кон Шенген зоната, долж нејзината граница со Турција ќе бидат распоредени сто гранични полицајци од Романија, Унгарија и Австрија.

Ваквата мерка е дел од договорот постигнат со Австрија, како услов за укинување на нејзиното вето за вклучување на Бугарија и Романија во Шенген зоната.

Како што информира началникот на бугарската гранична полиција Антон Златанов, покрај ова, Бугарија ќе ангажира уште дополнителни 1200 свои полицајци за контрола на границата кон Турција. Според Златанов, се очекува овие мерки да резултираат со „намалување на мигрантскиот притисок за 70 отсто“.

По укинувањето на граничните контроли на аеродромите и пристаништата во Бугарија и Романија при патување во земјите од Шенген зоната на 31 март годинава, од 1 јануари 2025 се очекува да бидат укинати и контролите на копнените гранични премини на двете држави кон зоната на ЕУ на слободно движење. Конечната одлука за ова се очекува да биде донесена на состанокот на министрите за внатрешни работи на ЕУ на 12 декември.

Златанов најави дека и покрај целосниот прием во Шенген зоната од следната година, Бугарија нема да ја отстрани инфраструктурата на своите гранични премини кон земјите од ЕУ, за случај на евентуална обнова на контролата на границите.

Бугарското МВР соопшти и дека на сегашната единствена копнена граница на Бугарија со Шенген зоната, онаа со Грција, наместо контролите ќе бидат воведени заеднички бугарско-грчки гранични патроли за „проверка на сомнителни лица“. Ваквата мерка, според Златанов е со цел „да не се остави впечаток дека секој може да влезе во Бугарија без да биде проверен“.

Бугарскиот министер за внатрешни работи Атанас Илков, пак, изјави дека и покрај укинувањето на контролите, полицајците сепак ќе мора да вршат проверки, но тоа ќе го прават „незабележливо и без да го попречуваат слободното движење“ на луѓето и стоките. Според него, ваквите проверки ќе се вршат врз основа на оперативни податоци и информации добиени од партнерските служби.

Свет

Франциск: Лицемерните земји кои зборуваат за мир, а произведуваат оружје се виновни за војните

Папата Франциск ги обвини „лицемерните“ земји кои зборуваат за мир, а истовремено произведуваат оружје, за конфликтите во Украина и палестинските територии.

- Сакам да ги споменам неуспесите на човештвото – Украина и Палестина, каде што луѓето страдаат, а ароганцијата на освојувачите победува над дијалогот, изјави папата.

Римокатоличкиот поглавар повика на дијалог и потенцираше дека младите имаат посебна способност да донесат мир. Неговите зборови беа изречени на средба по повод 40-годишнината од примирјето меѓу Аргентина и Чиле.

Македонија

Акција за пошумување кај Гевгелија, засадени над 5.000 дрвца багрем и чемпрес

Со акција за пошумување насловена „Да пуштиме корени во нашата Гевгелија“, во близина на месноста Топлик кај Гевгелија, засадени се над 5.000 дрвца багрем и чемпрес, информираа денеска од Општина Гевгелија преку нивната официјална страница.

Акцијата ја организираше Општина Гевгелија во соработка со ЈПКД „Комуналец“- Гевгелија, Шумско стопанство „Кожуф“ и ОО на Црвен Крст од Гевгелија и со голем број волонтери,претставници на Советот на Општина Гевгелија, државните и локалните институции и граѓанскиот сектор.

На акцијата, покрај градоначалникот на Општина Гевгелија, Андон Сарамандов, учествувала и заменик-министерката за животна средина и просторно планирање, Ане Лашковска.

- Гевгеличани масовно и сплотени покажаа дека градот се сака со конкретни дела. Заштитата на животната средина е важен сегмент за здрава средина. Ова е поттик за сите нас ваквата иницијатива да прерасне во традиција и да се случува често, стои во изјавата на Сарамандов.

Во информацијата од Општината се додава дека акцијата треба да прерасне во традиција и има за цел да го надомести недостигот и намалувањето на шумската маса заради преголемата суша и предизвиканите пожари на подрачјето на општина Гевгелија, но и да ја подигне јавната свет за важноста на зелените површини и нивната улога во животната средина.

Живот

Четвртина млади Европејци работат за време на школувањето

Во 2023 година, 25,7 отсто од младите Европејци на возраст од 15 до 29 години биле вработени додека учеле, соопшти Евростат.

Како што се наведува, 71,4 отсто од младите кои студираат лани не учествувале на пазарот на труд, додека 2,9 отсто активно барале вработување.

Процентот на млади луѓе кои студираат и работат во исто време значително варира меѓу земјите-членки на ЕУ. Најголем удел на вработени млади во текот на образованието е забележан во Холандија 74,5 отсто, Данска 52,6 отсто, Австрија 46,2 отсто, а најмало во Романија - само 2,3 отсто, Словачка 5,8 отсто и Унгарија 6,1 отсто.

Дополнително, најголем удел на млади кои се во образование и во исто време активно бараат вработување е забележан во Шведска 13,8 отсто, Финска 8,3 отсто и Данска 6,9 отсто. За разлика од нив, најмал удел на младите од споменатата категорија е регистриран во Унгарија 0,4 отсто, Чешка 0,8 отсто и Полска 0,9 отсто.