Живот

Папата Франциск ја предводеше мисата на Бадник во Ватикан пред илјадници верници

Папата Франциск вчера ја предводеше бадниковата миса во базиликата Свети Петар во Ватикан, на која присуствуваа илјадници верници.

На мисата и претходеше отворањето на „Светите врати“, кои го симболизираат почетокот на католичката света година, позната и како јубилеј. Светата година се слави на секои 25 години и се смета за време на мир, простување и помилување.

Оваа традиција датира од 1300 година, кога за прв пат ја вовел папата Бонифациј VIII.

Папата Франциск ја отвори „Светата врата“, посебен чин кој претставува надеж и обнова за верниците ширум светот.

Папата рече дека приказната за раѓањето на Исус треба да ги поттикне луѓето да се надеваат дека секој може да влијае на светот.

-Надежта е покана да не се одолговлекува, да не се задржуваме од старите навики или да останеме во просечност или мрзеливост. Надежта нè повикува да бидеме вознемирени од нештата што се погрешни и да најдеме храброст да ги промениме, рече папата Франциск.

Аџиите кои ќе дојдат во Рим за време на „Светата година“ можат да добијат простување на гревовите, а овој јубилеј трае до 6 јануари 2026 година.

Ватикан очекува до 100.000 аџии да минуваат низ вратите секој ден следната година.

Свет

Драма на лет од Чикаго: Тело е најдено меѓу тркалата на авионот, никој не знае од каде е (ФОТО)

Телото на непознато лице е пронајдено меѓу тркалата на авион на Јунајтед ерлајнс кој летал од Чикаго за Хаваи, соопштија официјални лица.

Авионот полетал вчера од меѓународниот аеродром О'Хара во Чикаго околу 9:49 часот и пристигнал на аеродромот Кахулуи околу 14:12 часот, според авиокомпанијата, пренесува Њујорк Пост.

Телото е откриено во опремата за слетување на Боинг 787-10, област достапна само надвор од авионот, изјавија од United Airlines.

Официјалните лица веднаш немале објаснување за страшното откритие. Според неофицијални информации, се работи за тело на машко лице.

Она што сè уште е мистерија е како и кога лицето влегло во просторот меѓу тркалата. Од авиокомпанијата соопштија дека за овој случај соработуваат со полицијата и надлежните.

Полицијата соопшти дека истрагата е во тек и ќе објави повеќе информации за јавноста кога ќе ги има.

Технологија

Теории на заговор по божикната порака на астронаутите: Од каде капите и украсите?(ВИДЕО)

Астронаутите на Меѓународната вселенска станица го слават Божиќ, а од орбитата испратија и порака до Земјата.

Сепак, снимката на која астронаутите носат капи и украси на Дедо Мраз предизвикаа мноштво теории на заговор на Интернет, пишува Њујорк пост.

За многумина најголем проблем беше појавувањето во празничното издание на Буч Вилмор и Сунита Вилијамс, двајца астронаути кои во јуни отидоа во орбитата на една недела и ќе останат во вселената барем до март поради дефект на Боинг Старлајнер.

- Добредојдовте на Меѓународната вселенска станица додека се подготвуваме за божиќните празници. Ова е одлично време за поминување со семејството на вселенската станица. Седуммина сме овде горе па ќе уживаме заедно - изјави Сунита Вилијамс.

- Дали со себе понесоа капи на Дедо Мраз пред лансирањето? Или таму ги плетеа? - напишал еден корисник на Икс (Твитер).

Друг коментатор се огласи:

- Дали се тоа истите оние кои заминаа на осумдневната мисија во јуни?

Трети, пак, веруваа дека присуството на украсите е знак на голема завера и дека астронаутите всушност не биле заглавени во вселената.

- Сето тоа е едно големо шоу - напиша еден коментатор.

Друг корисник на X додаде дека астронаутите кои лебдат во вселената се всушност во филмско студио.

Сепак, објаснувањето за работите што ги збунуваат теоретичарите на заговор е прилично едноставно. New York Post потврди дека капата на НАСА за Дедо Мраз - заедно со други украси, специјални подароци за членовите на екипажот на вселенската станица и новогодишни оброци - биле дел од пратката од 3 тони на SpaceX кон крајот на ноември.

Меѓународната вселенска станица се снабдува неколку пати годишно, па постоењето на украси воопшто не изненадува. Особено ако се земе предвид дека станицата работи од 2000 година и дека многу астронаути веќе ги прославија Божиќ и Нова Година во орбитата. На пример, ова не е прв Божиќ за Вилијамс во вселената: таа беше дел од мисијата во 2006 година, која беше закажана за божиќните празници.

Доставата на храна вклучува шунка, мисирка, компири, зеленчук, па дури и пити и колачиња. Други мисии и научни предмети биле дел од испораката. И со дел од дополнителниот простор, НАСА испрати неколку празнични предмети за астронаутите, вклучувајќи капи и новогодишна елка.

Од 10-те луѓе кои моментално се во вселената, 7 се на Меѓународната вселенска станица. Заедно со Вилмор и Вилијамс, тука се и нивните американски колеги Ник Хејг и Дон Петит, како и руските космонаути Алексеј Овчинин, Иван Вагнер и Александар Горбунов. Рускиот дел од екипажот денеска не го слави Божиќ, туку според јулијанскиот календар.

Свет

Насилни протести во сирискиот град Хомс, властите воведоа полициски час (ВИДЕО)

Сириската полиција воведе полициски час во градот Хомс во текот на ноќта, објавија државните медиуми, по немирите поврзани со протестите за кои населението ги обвини припадниците на малцинските алавити и шиитските муслимански верски заедници.

Ројтерс не можеле да ги одредат барањата на демонстрантите или обемот на немирите.

Некои жители ги поврзуваат демонстрациите со притисок и насилство насочено во последните денови против припадниците на алавитското малцинство, секта која се смета за лојална на поранешниот претседател Башар ал Асад, кој беше соборен од сунитските исламистички бунтовници на 8 декември.

Портпаролите на новата сириска влада, предводена од групата Хајат Тахрир ал-Шам (ХТС), поранешен огранок на Ал Каеда, не одговориле на барањата за коментар за полицискиот час.

Државните медиуми објавија дека полицискиот час е воведен за една ноќ, од 18 часот по локално време до четврток во 8 часот.

Новите водачи на земјата редовно ја повторуваат својата посветеност за заштита на малцинските религиозни групи кои стравуваат дека поранешните бунтовници, сега на власт, би можеле да се обидат да наметнат конзервативна форма на исламистичко владеење.

Помали демонстрации се одржани и во други области во близина на сирискиот брег, дом на мнозинството од алавитското малцинство во земјата, вклучувајќи го и градот Тартус.

Тие се случија околу времето кога на социјалните мрежи почна да кружи видео од пожар во алавитски храм во градот Алепо, при што вооружени мажи влегуваа и позираа во близина на човечки тела.

Не е јасно кога се случило ова.

МВР на својот официјален профил на Телеграм објави дека видеото е од бунтовничката офанзива на Алепо на крајот на ноември, а насилството го извршиле непознати групи.

Оние кои сега го шират видеото сакаат да поттикнат секташки конфликт, велат од Министерството.

Исто така, објавија дека некои членови на поранешниот режим денеска ги нападнале силите на Министерството за внатрешни работи во крајбрежната област на Сирија, и дека нападот резултирал со неколку загинати и повредени.

притисни ентер