И покрај зголемените повици до францускиот претседател Емануел Макрон да поднесе оставка, тој треба да го заврши својот втор претседателски мандат за да избегне голема институционална криза, изјави поранешниот претседател на Франција, Франсоа Оланд во интервју за „Вест Франс“.

Оланд, кој сега е пратеник во францускиот парламент, нагласи дека, без оглед на критиките упатени кон Макрон, тој беше реизбран на изборите пред три години и треба да го доврши мандатот. Во спротивно, Франција би се соочила со сериозна институционална криза.

Во однос на можните предвремени парламентарни избори, Оланд вели дека не гледа како распуштањето на парламентот по шест месеци би довело до значителни промени во составот на Долниот дом, кој сега е поделен на три блока без апсолутно мнозинство.

Оланд исто така повика на „смирена парламентарна демократија“ и изрази став дека владата на центристот Франсоа Бајру може да опстане до 2027 година, под услов да направи значителни компромиси, особено во однос на пензиите и фискалната правда, за да избегне гласање за недоверба.

Тој изрази желба за обновување на Социјалистичката партија како независен политички субјект, кој ќе биде отворен за социјалдемократи. Оланд повика на одржување партиски конгрес пред летото за утврдување на стратегијата за претседателските избори во 2027 година. /МИА

Германската Социјалдемократска партија (СПД) на канцеларот Олаф Шолц го обвини опозицискиот конзервативен политичар Родерих Кизеветер за ширење лажни информации за наводна планира средба помеѓу Шолц и рускиот претседател Владимир Путин пред предвремените парламентарни избори во Германија, закажани за 23 февруари, пренесува ДПА.

Лидерот на парламентарната група на СПД, Ролф Мицених, изјави дека изјавата на Кизеветер е „чисто фабрикување“. Генералниот секретар на СПД, Матијас Мирш, додаде дека тврдењето е „подмолно и ниско“.

Кизеветер на платформата „Икс“ објави дека „канцеларот Шолц може да отпатува во Москва за средба со Путин пред изборите“.

Германската влада најави правни чекори против овие тврдења, наведувајќи дека нема планови за такво патување и дека овие изјави се клевета. Мирш побара од опозициската Христијанско-демократска унија (ЦДУ) да се огради од објавата на Кизеветер, додавајќи дека ова го нарушува договорот за фер изборна кампања.

Извозот на турскиот одбранбен и воздушно-вселенски сектор минатата година изнесуваше рекордни 7,2 милијарди долари, што претставува зголемување од 29 проценти во споредба со претходната година, соопшти раководителот на Секретаријатот за турската одбранбена индустрија, Халук Ѓоргун, пренесува Анадолија.

Овој резултат за 11 отсто ја надмина годишната цел за извоз од 6,5 милијарди долари. Според Ѓоргун, меѓународната соработка им овозможила на турските компании извоз на нивните производи низ светот.

- Одбранбената индустрија е посветена на иновациите и отворање нови хоризонти. Ќе продолжиме да ги надминуваме рекордите и да ја унапредуваме технолошката моќ на Турција, изјави Ѓоргун.

Фокусот останува на зачувување на позитивниот тренд и зголемување на извозот на производи со висока додадена вредност. - Во 2025 година ќе продолжиме со истата решителност за постигнување одржлив раст, додаде тој./МИА