Свет

Њујорк тајмс и Гардијан за одлуката на САД за испраќање систем за противракетна одбрана

Њујорк тајмс и Гардијан за одлуката на САД за испраќање систем за противракетна одбрана и околу 100 воен персонал во Израел.

Пентагон објави дека ќе испрати ракетен одбранбен систем THAAD (Terminal High Altitude Area Defense) и негов персонал во Израел, во момент кога Израел размислува за одмазднички напади против Иран, објави Њујорк Тајмс.

САД испраќаат напреден ракетен одбранбен систем во Израел, заедно со околу 100 американски војници кои ќе го управуваат, соопшти Пентагон. Тоа е прво распоредување на американски сили во Израел по нападите извршени таму на 7 октомври 2023 година од Хамас.

Претседателот Џо Бајден му наложи на секретарот за одбрана Лојд Остин да го распореди системот, се вели во соопштението на портпаролот на Пентагон, генерал-мајор Патрик Рајдер.

Тој потег ќе ги стави американските војници со копнениот противракетен одбранбен систем, кој е дизајниран да се брани од балистички ракети, поблиску до проширувањето на војната на Блискиот Исток, наведува Њујорк Тајмс.

Весникот исто така објави дека израелската војска на новинарите веднаш преку границата во јужен Либан им покажала складирани експлозиви и мини на Хезболах, што е доказ за длабоко вкоренетата воена инфраструктура на движењето во областа долж границата со Израел.

Информацијата дека САД испраќаат ракетна одбранбена батерија THAAD во Израел заедно со околу 100 американски воен персонал го продлабочува американското учество во регионот погоден од кризата, посочува Гардијан.

Последен пат САД испратија ваков ракетен систем на Блискиот Исток веднаш по нападите на Хамас врз Израел на 7 октомври минатата година.

Запрашан зошто одлучил да го одобри распоредувањето, американскиот претседател Џо Бајден рече: „За заштита на Израел“, кој размислува за очекувана одмазда против Иран откако Техеран истрела повеќе од 180 проектили врз Израел на 1 октомври.

Портпаролот на Пентагон, генерал-мајор Патрик Рајдер го опиша распоредувањето како дел од „пошироките корективни дејствија што американската војска ги презеде во последните месеци“ за поддршка на Израел и заштита на американскиот персонал од нападите на Иран и групите што ги поддржува.

Американските власти не кажаа колку брзо системот ќе биде распореден во Израел, а портпаролот на израелската армија одби да обезбеди распоред за неговото пристигнување, забележува Гардијан.

Иранскиот министер за надворешни работи Абас Арагчи предупреди дека САД ги ставаат на ризик животите на своите војници „со тоа што ги испраќаат да работат со американските ракетни системи во Израел во нашиот регион, јас јасно велам дека немаме црвени линии“ за одбрана на нашиот народ и интереси“, напиша Арагчи на социјалната мрежа Х.

За еден THAAD обично се потребни околу 100 воен персонал за да функционира. Се состои од шест фрлачи поставени на камиони со осум пресретнувачи на секој фрлач и моќен радар.

Претходно Хезболах му се закани на Израел со нови напади доколку продолжи офанзивата на израелските војници во Либан.

Македонија

Отстранети десетина диви депонии во скопските општини Аеродром, Центар, Карпош и Чаир

Во текот на празничниот продолжен викенд, екипите на ЈП „Комунална хигиена“ - Скопје подигнаа и транспортираа приближно 70 кубни метри отпад од десетина диви депонии лоцирани во скопските општини Аеродром, Центар, Карпош и Чаир.

Како што соопшти „Комунална хигиена“ - Скопје, отстранети се автомобилски гуми, стар и неупотреблив мебел, градинарски отпад и градежен шут што биле непрописно одложени на јавни и сообраќајни површини на улиците „Февруарски поход“ во општината Аеродром, „Орце Николов“ и „Народен фронт“ во општината Центар, „Вуковарска“ во општината Чаир, улиците „Јуриј Гагарин“ и „Париска“, како и булеварот „Метрополит Теодосиј Гологанов“ во скопската општина Карпош.

- Во текот на викендот беше извршено и целосно расчистување на теренот по сообраќајната незгода што се случи на аголот меѓу булеварите „Србија“ и „Трета македонска бригада“ во скопската општина Аеродром, се вели во соопштението.

Македонија

Граѓаните на Општина Ѓорче Петров вклучени во креирањето на буџетот на нивната општина

Како и минатите две години, жителите на оваа општина повторно ќе имаат можност да учествуваат во креирање на буџетската каса за 2025 година, информираат денеска од Општината.

Општина Ѓорче Петров повторно ги вклучува граѓаните во изготвување на буџетот. Како и минатите две години, жителите на оваа општина повторно ќе имаат можност да учествуваат во креирање на буџетската каса за 2025 година, информираат денеска од Општината.

Оттаму велат дека целта е сите заедно да ги испланираат и да ги реализираат приоритетите кои ќе ја направат општината подобро место за живеење.

Од Општина Ѓорче Петров истакнуваат дека во периодот што следува, граѓаните ќе имаат можност преку прашалник да го споделат своето мислење.

Оваа активност е веќе воспоставена пракса во Општина Ѓорче Петров, велат оттаму и додаваат дека и изминатите две години, односно од почетокот на мандатот на градоначалникот Александар Стојкоски, граѓаните на повеќе начини активно учествувале со свои идеи, предлози и сугестии во изготвување на буџетот за следната година.

Регион

Централната банка открива: Во Црна Гора има 89 милионери

 Според податоците на Централната банка, во Црна Гора има 89 граѓани кои на сметките во комерцијалните банки имаат повеќе од милион евра.

Иако бројот на милионери расте, финансискиот консултант Стеван Гаевиќ посочува дека тоа е мал број во однос на бројот на населението, пренесува Градска ТВ.

- Сметам дека тоа се главно луѓе кои стекнале пари легално или преку продажба или наследство и ги чуваат во банки. Мораме да сме свесни дека има инфлација и држењето пари на сметки може да ја намали нивната вредност, па затоа мислам дека 89 милионери е релативно мал број за Црна Гора, рече Гаевиќ.

Инес Мрдовиќ од НВО Акција за социјална правда смета дека Црна Гора е ветена земја за богатите, бидејќи нивните приходи се оданочуваат со исклучително ниски стапки.

- Важно е да се спомне дека во Црна Гора има многу невидливи милионери. Тие не би ги чувале своите средства на видливи сметки кај Централната банка, туку би ги преместиле надвор од земјата, додаде Мрдовиќ.

притисни ентер