Свет

Набљудувачите на ОБСЕ ги критикуваат изборите во Грузија

Меѓународните набљудувачи на изборите изразија загриженост за бројните нерегуларности по парламентарните избори во Грузија, пренесе ДПА.

Експертите се пожалија на случаи на заплашување гласачи, притисок врз власти, насилство врз набљудувачите, купување гласови, повеќекратно гласање и полнење гласачки кутии, соопшти мисијата на Организацијата за безбедност и соработка во Европа (ОБСЕ) денеска во главниот град Тбилиси.

Тие побараа истрага за овие инциденти и повикаа на дополнителни демократски реформи.

Во исто време, шефот на мисијата Паскал Ализар ја пофали „демократската виталност на јужнокавкаската република, и покрај одредени неуспеси“. На гласачките ливчиња имаше вкупно 18 опции, истакна тој. Французинот изјави дека изборите, генерално, биле добро организирани.

Другите набљудувачи, исто така, го истакнаа силното присуство на граѓанското општество, обезбедувајќи надзор над гласањето и пребројувањето на гласовите.

Набљудувачите на ОБСЕ, исто така, изразија загриженост за новите авторитарни закони во земјата, критикувани од Европската унија и САД, како и за целокупната поларизирана ситуација.

Земјата се наоѓа на крстопат следејќи ги негативните трендови во последните месеци, велат тие.

Грузија е земја кандидат за ЕУ, но процесот во моментов е закочен поради овие контроверзни закони.

Изборната комисија ја прогласи конзервативната националистичка владејачка партија Грузиски сон за победник со апсолутно мнозинство. Поединечните блокови на проевропската опозиција не го признаа резултатот./МИА

Македонија

Пожар зафати дел од туристичкиот комплекс Манастир во Берово

Пожар вечерва зафати дел од туристичкиот комплекс Манастир во Берово. На терен се екипи на ТППЕ Берово кои веднаш по дојавата се упатиле во кругот на објектот каде е забележан густ чад.

Оттаму повеќе информации за обемот на пожарот и евентуалната причинета штета најавија во текот на вечерта.

Очевидци за МИА велат дека засега нема опасност од проширување на пожарот на околните објекти.

Свет

Бројот на загинати во невремето Трами на Филипините се искачи на 138

Бројот на жртвите во невремето Трами, што го погоди северозападниот дел на Филипините, се искачи на 138, а голем број луѓе се водат за исчезнати, соопшти денеска владината агенција за одговор при катастрофи.

Агенцијата соопшти дека бројот на жртви најверојатно дополнително ќе се зголеми поради поплавите и одроните предизвикани од невремето.

Полициски и противпожарни единици се ангажирани во операции за помош и спасување во погодените области на Филипините./МИА

Регион

Излезни анкети: Сигурна победа на Борисов - ГЕРБ освојува 26,4%, Продолжуваме со промените 15%

Партијата на Бојко Борисов, ГЕРБ е убедлив победник на денешните избори во Бугарија, но далеку од можност самостојно да формира влада, покажуваат повеќе излезни анкети.

Анкетата на агенцијата „Алфа Рисрч“ покажува дека ГЕРБ освоил 26,4 проценти од гласовите, пред Продолжуваме со промените на Петков со 14,9 проценти.. На третото место е проруската „Преродба“ на Костадин Костадинов со 12,9. Следуваат ДПС - нов почеток на Дељан Пеевски и Алијансата за права и слободи со по близу девет проценти, бугарските социјалисти се на шестото место со 7,8 и Има таков народ со 6,2 проценти.. Останатите партии се под цензусот од четири проценти..

Изразено во мандати, тоа би значело дека ГЕРБ добива 74, партијата на Петков 42, а на Костадинов 36 мандати.. За формирање мнозинство, потребни се 121 пратеник во 250-члениот парламент.