Европската Унија нема да биде целосна без земјите од западен Балкан – ова е пораката која германскиот канцелар Олаф Шолц ја упати на отворањето на средбата на лидерите на земјите од регионот и претставници на унијата во рамки на Берлинскиот процес. Оцени дека берлинскиот процес според него, е најдобар инструмент, не само за регионална соработка, туку и за забрзување на европската интеграција на сите земји од западен Балкан.

-Да кажам едноставно и мислам дека говорам во име на сите собрани тука денеска. ЕУ е целосна само со западен Балкан како дел од неа. - Олаф Шолц – Канцелар на Германија.

Македонија на самитот е претставувана од премиерот Христијан Мицкоски кој на преку социјалните мрежи порача дека Европската Унија мора да ги поддржи државите кои покажуваат зрелост, одлучност и соработка за заедничката цел, а Македонија според него, прави многу на тој план. Мицкоски сподели и дека учествувал на првата сесија од Берлинскиот процес, посветена на регионалната соработка. Заедно со македонскиот премиер во Берлин се и минситерот за ватрешни работи Панче Тошковски, за европски прашања Орхан Муртезани и шефот на дипломатијата Тимчо Муцунски. Токму Муцунски по една од сесиите порача дека на состаноците била пренесена и фрустрацијата која постои од билатерализацијта на процесот на проширување на ЕУ.

На маргините на состанокот пак, премиерот Мицкоски имал и средба со грчкиот министер за надворешни работи Јоргос Герапетртис, а како што соопштија од македонската влада, не се исклучени и останати билатерални средби. Во Берлин инаку, покрај претставници на официјална Атина е и техничкиот премиер на Бугарија Димитар Главчев. На Самитот традиционално учествуваат шесте држави од западен Балкан, нивните земји поддржувачи, Франција, италија, Хрватска, Словенија, Велика Британија и Полска, а од пред неколку години и Грција и Бугарија, како и ротирачкото претседателство со Советот на ЕУ, а тоа годинава е Унгарија.