Регион

Израелски бизнисмен баран со романска потерница уапсен, па ослободен во Атина

Тој бил уапсен откако на аеродромот во Атина пристигнал од Тел Авив со неговиот приватен авион

Израелскиот бизнисмен Бени Штајнмец синоќа бил уапсен на атинскиот аеродром по издадена меѓународна потерница од романските власти, меѓутоа денеска бил ослободен бидејќи веќе постои одлука на грчкиот суд против негова екстрадиција, јави дописничката на МИА од Атина.

Според неофицијалните информации во Грција, израелскиот тајкун кој се занимава со рударството, енергетика, недвижностите и индустриите за ископување дијаманти, бил уапсен откако на аеродромот во Атина пристигнал од Тел Авив со неговиот приватен авион.

Меѓународната потерница од романските власти се однесувала на негово учество во криминална организација и по донесената пресуда во отсуство за купување на земјиште во периодот 2006-2008 година.

Од грчката полиција, засега, нема официјално соопштение за апсењето на израелскиот бизнисмен.

Медиумите во Грција пренесуваат изјава на адвокатот на Штајнмец, Ставрос Тојас, кој објаснува дека постои одлука на Апелациониот суд во Атина од 2022 година, која неотповикливо е против неговата екстрадиција во Романија, признавајќи му го правото слободно да патува.

-Потерницата од романските власти за екстрадиција на Бени Штајнмец е прогласена за неважечка од Интерпол, Грција, Италија и Кипар. Истото се случи и со другите обвинети заедно со г-дин Штајнмец во истиот случај, по кои нивните налози за апсење не беа спроведени во Франција, Белгија и Малта. Така, бројот на европските земји кои ги отфрлија правно неоснованите барања на романската правда во овој случај достигна шест. Затоа, Бени Штајнмец беше ослободен додека и формално не се реши прашањето, истакнал адвокатот.

Според „Катимерини“, ослободен е со кауција од 5.000 евра и забрана за излез од земјата.

Пред една година бил уапсен и на Кипар врз основа на потерницата од романските власти, но и тогаш бил ослободен.

Штајнмец, во минатото според натписите во македонските медиуми бил еден од сопствениците на фабриката „Фени“, а новинарите од ИРЛ и ОССРП во нивното истражување откриле дека двапати истото лице со мала група негови пријатели, стои зад двојниот стечај на топилницата. /МИА

Македонија

Инспектор нападнал началник во просториите на полицијата во Радовиш

Инспекторот Б.И. (39) од село Ињево, радовишко вчера бил уапсен откако бил пријавен дека физички го нападнал на О.Г (43) началник на Одделението за внатрешни работи Радовиш, соопштија денеска од СВР Струмица.

Според соопштението, началникот пријавил дека во службени простории на полициската станица инспекторот агресивно се однесувал кон пријавителот, кој извршувал службени задачи, а во еден момент и физички го нападнал, нанесувајќи му телесни повреди.

Во соопштението се додава дека за настанот биле запознати началникот на СВР Струмица, Одделот за внатрешна контрола, криминалистички истраги и професионални стандарди и јавен обвинител, по чии насоки биле преземени мерки за расчистување на случајот, а по целосно документирање на случајот против Б.Ј. ќе биде поднесена соодветна пријава.

Македонија

Почина универзитетскиот професор Љупчо Арнаудовски

Почина универзитетскиот професор, правник Љупчо Арнаудовски.

Арнаудовски oсновно и средно образование го завршил во родниот град Охрид. Дипломирал на Правниот факултет во Скопје (1960), а магистрирал на Правниот факултет во Загреб (1966). На Правниот факултет во Скопје ја одбранил докторската дисертација на тема „Вонзатворските воспитни мерки во југословенското кривично право“ (1975).

Работел како виш научен соработник во Институтот за социолошки и политичко-правни истражувања во Скопје (1963-1979). Бил избран за вонреден професор на Правниот факултет во Скопје по предметите криминологија и пенологија (1979), а потоа и за редовен професор на истиот факултет (1985). Од март 1944 година бил член на СКОЈ, а од мај 1949 година и член на СКЈ. Бил секретар на Градскиот комитет на СКМ (1969-1973). Ги вршел функциите член на РИС и секретар за внатрешни работи на СРМ (1971-1973). Од овие функции бил отстранет во периодот на „либерализмот” поради сфаќањата и јавните настапи од тие позиции.

Бил член на Републичкиот судски совет (1994-2000 година). Избран за претседател на Моралниот суд на РМ (2003).

Во периодот 1960-1986 година бил главен и одговорен уредник на списанието „Правна мисла“, орган на Здружението на правниците на Македонија. Долги години бил претседател на издавачкиот одбор на Ревијата за криминалистика, криминологија и кривично право „Безбедност" - Скопје и издавачкиот совет на Ревијата за казнено право и криминологија - Скопје. Во периодот 1983/1984 година бил претседател на Советот на заедниците за научно-истражувачките дејности на Југославија.

Бил почесен претседател на Македонското пенолошко друштво и Здружението за кривично право и криминологија на Македонија.

Во 1981 година добитник е на наградата „Гоце Делчев“. Објавил повеќе од 200 научни труда и неколку учебници.

Регион

Црна Г. го прогласи 23 декември за Ден на жалост поради трагичниот инцидент во Загреб

Владата на Црна Гора го прогласи 23 декември 2024 година за Ден на жалост во врска со трагичниот настан во училиште во Загреб, соопшти премиерот на Црна Гора, Милојко Спајиќ.

„Изразуваме сочувство до семејството и пријателите на починатото дете и се молиме за брзо закрепнување на повредените. Нашите мисли се со нашите соседи“, напиша Спајиќ на социјалната мрежа Х.

Во страшното злосторство што вчера ја потресе Хрватска и регионот, загина седумгодишно дете, а неколку други и наставничка се тешко повредени кога 19-годишен напаѓач вооружен со нож упадна во основно училиште во Загреб.

Меѓу повредените е и напаѓачот кој се обидел да се самоубие.