Според Марко Трошановски, Македонија како држава презела обврска да го промени уставот, а Европската Комисија нема да ја разгледува иницијативата за уставни измени со одложено дејство, барем додека не се избере стабилна влада во Бугарија. Смета дека Македонија во наредниот период мора да вложи максимални дипломатски напори во објаснување на своите позиции.

- Сега за сега комисијата иако можеби има разбирање, не би се нафатила да разговара и разгледува иницијативи од наша страна, во најмала рака барем додека не се консолидира стабилно владини мнозинство во Бугарија, бидејќи на крајот на краиштата тоа е страната со која треба да се разговараат овие идеи.- Марко Трошановски – Институт за демократија „Социетас Цивилис“

Поранешниот министер за надворешни работи Бујар Османи во вчерашното издание на Само интервју го повтори ставот за уставни измени со суспензивна калузула, односно доколку во текот на преговорите официјална Софија продолжи да ја блокира земјава за работи кои не се поврзани со ЕУ, парламентот да ги блокира измените. Според него, идејата за одложено дејство била предлог во преговорите со Бугарија, но во разговорите приоритет бил ставен на македонскиот јазик.

-За ова одложено дејство, тоа беше нашиот предлог во преговорите со Бугарија. Меѓутоа во тие компромиси за јазикот нас ни беше поважно тука ние да биде нашиот став непроменет. Се разбира направивме одредени комрпомиси кога уставните измени... ако е таа грижата пост фестум ќе има, кој може да не спречи ние да ги корегираме тие уставни измени, па еве нека се додаде суспензивна клаузула било каде, што го слушнав премиерот дека тоа не држи. - Бујар Османи – Поранешен министер за надворешни работи

Од владата пак, велат дека предлогот за устанви измени со суспензивно вето се правно неиздржани. Министерот за евроинтеграции Орхан Муртезани на брифинг со новинарите повтори дека промената на македонскиот устав и натаму е услов, но дека неодбивањето на Фон дер Лајен на владиниот предлог, значи дека има простор за некакво решение.

-Условот за уставни измени стои, промената се однесува на неодбивањето на претседателката на ЕК на нашиот предлог без при тоа да се конкретизира предлогот, меѓутоа неодбивањето значи дека се создава простор кој нас би можел да не води до потенцијално решение. Новината од вчерашната посета е тоа и мислам дека од вчера е конкретизирано дека таков простор постои и ќе се интензивира следната недела откако ќе завршат изборите во Бугарија.- Орхан Муртезани – Министер за европски прашања

Од опозицската СДСМ обвинија дека владата не успеала за време на посетата на шефицата на ЕК да ја презентира стратегијата за деблока на македонските евроинтеграции. Ја повикаа владата на одговорно однесување и да не се толкуваат туку да се спроведуваат пораките на Фон дер Лајен за уставните измени и коридорот 8.

Комисијата за помилување добила над 100 предлози од претходниот министер за правда Лога за помилување, и од одбрале десет врз основа на критериумите што ги имале, открива членот на комисијата, професорот Гордан Кајалџиев, во гостувањето во поткастот „На кавга со Иван “ што премиерно ќе биде објавен вечерва на Јутјуб и на Канал 5..

Министерството за правда не помилува, може да даде само препорака за намалување на казна од 1 до 6 месеци, а потоа таа препорака оди кај комисијата на претседателката на државата, појаснува министерот за правда Игор Филков, прашан какво мислење испратиле до комисијата за помилување, по жестоките реакции во јавноста околу последната одлука за помилување осуденици, меѓу кои има и водачи на криминални групи.

Филков вели нивниот член во оваа комисија немал право на глас. Не одговори конкретно дали одлуката ја смета за скандалозна и дали некој треба да понесе одговорност, но е цени дека треба да се направат одредени промени во Комисијата без да прецизира какви.

-Ние имаме еден член таму и да бидеме на чисто тој нема право на глас, не гласа. Институтот помилување е една многу важна работа во државата. Не смееме да дозволиме да биде предмет на политички игри и препукувања. Нас тоа ни се случува. Еднаш веќе осудени лица да ги пратиме на ресоцијализација. Не можеме повторно да ги судиме во јавноста. Не можам јас да побарам поништување на одлуката, има таму членот 11 којшто е многу јасен и кажува кој – што може да прави. Она што јас како министер за правда сметам е дека можеби е време да има одредено освежување во Комисијата, изјави Филков.

Од СДСМ и денеска побараа одговори од ВМРО-ДПМНЕ и претседателката Сиљановска Давкова кој ги нарачал, како штовелат, скандалозните помилувања на нарко босови. Ја повикаа претседателката да не се крие зад Комисијата за помилувања и јавно да соопшти како ја донела одлуката за помилувањата на осуденици од криминални групи.

-Несериозни се изјавите дека не знаеле кого помилуваат, тоа е навреда за граѓаните и потценување на нивната интелигенција. Сиљановска-Давкова има обврска да излезе пред граѓаните и да ги презентира сите информации, документи и мислења, на Комисијата, на Министерството за правда, на сите кои и биле презентирани и да одговори на клучното прашање: Зошто токму овие лица, опасни криминалци беа изборот да се помилуваат?, изјави портпаролката Кузеска.

Откако вчера доцна попладнето Сиљановска Давкова свика итен состанок со членовите на Комисијата за помилување, од Вила Водно и денеска нема информација од исходот на средбата и дали нешто било одлучено.

Инаку, на последната листа помилувани од претседателката беа 10 осуденици меѓу кои и водачот на скопскиот клан Барон, Акиф Равмановски познат како Акиф Јусуфи кој издржуваше казна за поседување нелегално оружје. Тој вчера на излегување од затворот Идризово веднаш беше вратен зад решети поради сомнежи за вмешаност во друго кривично дело, односно пукањето од пред десетина дена во скопски Чаир во кое едно лице, припадник на кланот Грчец, беше тешко рането.