Свет

Германија ги опремува владините авиони А350 со системи за заштита од ракети

Германското воено воздухопловство започна процес на опремување на своите авиони Ербас А350 со најнови системи за самоодбрана, кои ќе обезбедат заштита од ракети со термички насочување.

Овој проект, одобрен од Комисијата за одбрана и буџет на германскиот парламент, е дел од пошироката стратегија за зголемување на безбедноста на високите владини функционери за време на летовите.

За реализација на проектот е одговорна компанијата Луфтханза Техник, која официјално го потпиша договорот со Федералната канцеларија за опрема на Бундесверот (BAAINBw) на 19 декември. Три авиони Ербас А350 на германското Министерство за одбрана ќе бидат опремени со системот DIRCM (Directed InfraRed Counter Measures), кој ефикасно заштитува од ракети лансирани од рамо (познат како MANPADS).

DIRCM работи со емитување ласерски зраци или кодирани сигнали кои го попречуваат водењето на проектилите и ги оттргнуваат од курсот. Летачкиот екипаж не мора да интервенира, што го прави овој систем особено сигурен во итни ситуации.

Мајкл фон Путкамер, потпретседател на специјални авиони во Lufthansa Technik, рече:

„Со оглед на растечката глобална нестабилност и регионалните конфликти, употребата на системот MANPADS претставува конкретна закана. Овој проект е клучен за заштита на германското раководство“.

Она што го прави овој проект уникатен е фактот што е прва модификација на авионот Ербас А350 со ваков тип на систем во светот. Lufthansa Technik ќе го интегрира DIRCM постепено, за време на редовното одржување на секој авион, за да ја одржува флотата во функција.

Трите авиони Ербас А350, кои се дел од германската владина флота, беа испорачани на Бундесверот помеѓу ноември 2022 година и јуни 2024 година и се користат за транспорт на државни службеници и специјални мисии.

Свет

Бунт во затвор во Мозамбик: 33 мртви и масовно бегство на над 1.500 затвореници

 Во бунт во затвор во главниот град на Мозамбик, Мапуто, загинаа 33 лица, а 15 се повредени, додека повеќе од 1.500 затвореници успеале да побегнат, изјави командантот на полицијата Бернардо Рафаел.

Од оние кои побегнале, 150 повторно се уапсени.

Мозамбик се соочува со ескалација на немири поврзани со оспоруваните избори во октомври, кои ја продолжија власта на долго владејачката партија Фрелимо. Опозицијата тврди дека изборите биле наместени.

Иако Рафаел ги обвини антивладините протести за бунтот, министерката за правда Хелена Кида изјави дека нередите започнале внатре во затворот и не се поврзани со протестите кои се одвиваат надвор.

Македонија

Утрово најстудено во Крушево, најмногу снег на Шапка

 Утрово е најстудено во Крушево, -3 степени, а најмногу врнежи изминатите 24 часа се регистрирани во Тетово, осум литри на метар квадратен. Најмногу снег, пак, има на Попова Шапка, 68 сантиметри, информира УХМР.

До 08:30 часот се измерени 0 степени во Битола и Берово, 1 во Крива Паланка, Охрид и Прилеп, 2 во Тетово, Дебар и Претор, 3 во Скопје-Петровец и Штип, 4 во Куманово и Демир Капија, како и 6 во Струмица и Гевгелија.

Според УХМР, наврнале 7 литри на метар квадратен во Демир Капија, 6 во Скопје-Петровец и Битола, 4 во Крива Паланка, Прилеп, Дебар и Крушево, 3 во Претор и 1 литар на единица површина во Берово.

Во Маврови Анови висината на снежната покривка е 60 сантиметри, во Крушево 25, во Тетово 7 и во Гостивар 4.

Времето денеска ќе биде променливо облачно и студено со повремен локален дожд и снег. Ќе дува умерен до засилен ветер од северен правец, наместа со брзина над 60 km/h. Максималната температура ќе достигне од 2 до 8 степени. Во Скопје облачно и студено со повремени врнежи од дожд, а во повисоките делови од котлината со повремен снег. Ќе дува умерен, во делови од котлината повремено засилен ветер од северен правец. Максималната температура ќе достигне до 6 степени.

Свет

Јапонската национална авиокомпанија е погодена од кибер напад

 Националниот јапонски авиопревозник,Џапан ерлајнс, соопшти за кибер напад што може да влијае на домашните и на меѓународните летови.

„Денеска во 07:24 (локално време) мрежната опрема што ги поврзува нашите внатрешни и надворешни системи беше подложена на кибер напад што предизвика проблеми. Се очекува тоа да влијае врз внатрешните и меѓународните летови“.

Авиокомпанијата додаде дека ја суспендирала продажбата на билети за денешни летови.

Другиот голем јапонски авиопревозник, Ол Нипон ервејз (All Nippon Airways) соопшти дека неговите системи не покажале знаци на напади.

Претходно оваа недела, Американ Ерлајнс ги суспендираше сите летови на околу еден час поради технички дефект поврзан со неговиот мрежен хардвер.

притисни ентер