На средбата беа дискутирани неколку важни точки, поврзани со подигнување на студентскиот стандард, преку процесот на дигитализација во високото образование, информираат попладнево од УСС - УКИМ.

- Се фокусиравме на следново: дигитализирање на статистички обрасци што ги пополнуваат студентите, во соработка со Државниот завод за статистика и Министерството за дигитална трансформација, со цел побрза и поефикасна размена на податоци меѓу институциите; електронско аплицирање за ЈСП - студентската картичка, како и електронско аплицирање за здравствено осигурување за студентите, со што ќе се елиминира потребата од физичка апликација и непотребни административни процедури; воведување исклучиво електронски упис на студентите на факултет што ќе ја олесни процедурата за новите генерации; иницијатива за дигитализација на книгите за запишани и дипломирани студенти, обезбедувајќи трајна заштита и лесен пристап до овие документи, се наведува во соопштението.

Со овие иницијативи, како што се додава, се цели да се поедностави и модернизира секојдневната редица од студенти и работата на образовните институции. Се додава дека ова ќе ги намали времето и ресурсите потрошени на бирократски процеси и ќе придонесе кон зголемена транспарентност и ефикасност.

Затекнатата состојба во Министерството за односи меѓу заедниците, клучните прашања, приоритети, како и идни планови и евентуалната соработка со ОБСЕ, со акцент на помалите етнички заедници во земјава, биле темите на кои разговарале на денешната средба Стоилковиќ и Вал.

Како што информираат од Кабинетот на министерот за односи меѓу заедниците, Стоилковиќ ја истакнал важноста од комуникацијата со меѓународните заедници од причина што, како што рече, за помалите етнички заедници не постојат подобри адреси.

Стоилковиќ го запознал амбасадорот Вал со што се соочувал во изминатите 100 дена од формирањето на новата Влада и стапувањето на функцијата, но посочил и што е направено во овие 100 дена.

-Од злоупотреби на функцијата до злоупотреби во функционирањето за што постојат докази, но она на што сум горд е дека кога ќе се воспостави ред сѐ се може, нагласил Стоилковиќ и истакнал дека е задоволен што веќе е поднесена иницијативата за промена на законот за јазиците на помалите етнички заедници, како и дека е направен стратешки план со кој во следната година ќе им се посвети внимание на помалите етнички заедници.

-Нашата соработка со Министерството за односи меѓу заедниците во минатото беше ограничена, но сега сум фокусиран на иднината и мислам дека постојат реални можности за нејзино продлабочување. Треба да ги засукаме ракавите и да се фокусираме на работата со сите етнички заедници, порачал амбасадорот Вал и уште еднаш нагласи дека кон ОБСЕ треба да се гледа како на партнер.

Како што посочуваат од Министерството за односи меѓу заедниците, заклучокот на двајцата соговорници кои меѓу другото зборувале и за политичките и економските прилики во земјава и важноста на брзите пруги кои, како што истакнале, се своевиден мировен проект, беше и дека промената на перцепцијата и заштитата на етничките заедници кои, за жал, се чувствуваат заборавени и можеби не ја чувствуваат државата како своја треба да е заеднички приоритет на Министерството за односи меѓу заедниците и ОБСЕ. Амбасадорот Вал нагласил дека нашата земја секогаш може да смета на помош и поддршка од ОБСЕ.

На крајот од средбата, како што се наведува во соопштението, Стоилковиќ ја истакнал важноста на состанокот по кој се испраќа важна порака до помалите етнички заедници, кои треба да го добијат местото што го заслужуваат и во земјата во која живеат да се чувствуваат како рамноправни граѓани.

На 149. Собрание на Интерпарламентарната унија (ИПУ), што се одржува од 13 до 17 октмври 2024 година во Женева, Швајцарска Конфредерација, учествува Делегацијата на Собранието на Република Македонија во ИПУ во состав: Африм Гаши, претседател на Собранието на Република Македонија и шеф на Делегацијата и пратениците Дафина Стојаноска, Фатмир Битиќи, Арбана Пашоли, Халил Снопче, Бобан Карапејовски и Борислав Крмов, членови на Делегацијата, како и генералната секретарка Марина Димовска.

Денеска седници одржаа Управниот совет и две постојани комисии на Интерпарламентарната унија. На седницата на Управниот совет учествуваа пратениците Дафина Стојаноска, Арбана Пашоли и Бобан Карапејовски.

Комисијата за демократија и човекови права дискутираше по извештајот и предлог резолуцијата на тема: „Влијанието на вештачката интелигенција врз демократијата, човековите права и владеењето на правото“. Во дебатата учествуваше пратеникот Халил Снопче. Тој нагласи дека вештачката интелигенција ќе продолжи да игра сè поцентрална улога во процесите на креирање политики, користејќи напредна анализа на податоци за донесување информирани одлуки за сложени прашања, како што се климатските промени, здравствената заштита и економската нееднаквост. Според Снопче, мора да се воспостават јасни регулаторни рамки за управување со употребата на вештачката интелигенција во политичките процеси, како и да се стави фокус на развивање робусни програми за дигитална писменост, не само за граѓаните, туку и за политичките лидери и институции.

Тој оцени дека носителите на одлуки треба да бидат информирани за технологијата и способни да ги разберат нејзините пошироки општествени импликации. Образованието треба да биде најсилен сојузник во обезбедувањето активно и одговорно учество на сегашните и идните генерации во политичкиот пејзаж, каде што вештачката интелигенција е составен дел.

Пратеникот Фатмир Битиќи учествуваше во работата на Комисијата за мир и меѓународна безбедност, која одржа панел дискусија на тема: „Улогата на парламентарците во спречувањето на конфликти околу природните ресурси“. Тој нагласи дека еден од најголемите предизвици со кои се соочуваат пратениците е обезбедувањето правична и одржлива дистрибуција на природните ресурси. Нивната улога не е само спречување конфликти околу ресурсите, туку и создавање системски можности за правична дистрибуција и пристап до нив. Ова вклучува развој на законодавство и механизми кои обезбедуваат секој граѓанин да има фер пристап до вода, земја и други витални ресурси.

Според Битиќи, еден од најважните чекори што треба да се преземе е унапредување на демократските процеси, бидејќи демократијата е вредносен систем кој вклучува инклузивност, транспарентност и отчетност. Доколку се прифатат овие вредности и се применат во управувањето со ресурсите, можат да се избегнат конфликтите и разликите да станат извор на сила, наместо поделба. Тој, исто така, оцени дека решавањето на климатските предизвици треба да се интегрира во стратегиите за спречување конфликти и да се охрабри трансформација кон зелени технологии и одржливо користење на ресурсите.

Се очекува претседателот на Собранието на Република Македонија, Африм Гаши, да има свое обраќање на генералната дебата на тема: “Искористување на науката, технологијата и иновациите за помирна и оддржлива иднина.“

*Интерпарламентарната унија е светска организација на парламентите. Основана е пред повеќе 130 години како прва мултилатерална политичка организација во светот, со цел за поттикнување на соработката и дијалогот меѓу нациите. Во организацијата денес членуваат 180 национални парламенти и 15 меѓународни парламентарни собранија. ИПУ ја промовира демократијата и им помага на парламентите да станат посилни, порепрезентативни, поиновативни и родово и младиски балансирани. Собранијата на ИПУ се одржуваат двапати годишно, обезбедувајќи на тој начин парламентарна димензија на глобалното управување.

Собрание на Македонија