Сепак, неофицијално Тачи и понатаму ќе ги поддржувал политиките на лидерот на ДУИ Али Ахмети во рамки на Собранието. Официјална потврда од него се уште нема, а од Собранието одговорија дека досега нема доставено ниту допис до спикерот Гаши дека во иднина ќе делува како самостоен пратеник. Од Европскиот фронт тврдат- пратеничката група е функционална и во полн состав со 18 пратеници.
-Европскиот фронт го има истиот број пратеници како и претходно, за друго треба да се обратите до господинот Ахмети и до господинот Тачи. И во другите активности отстутвувал некој од претседателите на ЕФ, со ова сакам да кажам дека и верувам тоа е нормално секој ден, со своите обврски, протоколарни средби, може да отсуствува на некоја од средбите и никогаш тоа не било тема,- Блерим Беџети - Координатор на ПГ на Европски фронт.
Од владејачката коалиција Вреди оценуваат дека со овој потег на Тачи се докажала нивната теза- дека немаат заедничка идеологија, туку единствена цел им било да стигнат до власт. Вицепремиерот Изет Меџити вели дека досега немал комуникација со лидерот на ДПА за да премине во нивниот табор.
-Јас лично немам такви преговори. Како што и најавив пред некој месец, не се споија идеолошки или за повисоки цели, туку како да опстојат на политичката сцена. Сега бидејќи не се во влада, нема политичка кауза за фронтот,- Изет Меџити – вицепремиер.
На иста линија за амбициите на ДУИ и коалицијата е и премиерот Мицкоски. Синоќа во Само Интервју тој изјави дека за да стигнат до целта се обидуваат да создадат раздор во власта преку националистички теми.
-Се сеќавате на онаа шарада кога се претворија во зелена партија, кога џогираа на Водно во зелени дресчиња, за денеска после неколку години кога сме во опозиција вратиме повторно теми затоа што нема таму друг терен за играње. Нема реформи, нема политики, економија, образование, нема ништо. Ова е теренот на којшто тие се јаки, и таму го чекаат вистинскиот партнер – ВМРО-ДПМНЕ, со нас сакаат да имаме фрикција затоа што мислат дека така ќе мобилизираат луѓе- Христијан Мицкоски – претседател на Влада (Само Интервју 03.10).
Според најавите од ДУИ, мобилизацијата на опозиционерите ќе почне наскоро со средби во партиските ограноци, а очекуваат да резултира со протести кон средината на ноември.