Здравје

АХВ: Потврден нов случај на птичји грип

Потврден нов случај на птичји грип, на сила и решение за заштитни мерки за болеста син јазик

Со лабораториски наод од Националниот институт за храна и ветеринарство при Факултетот за ветеринарна медицина – Скопје (ФВМ) од 28.10.2024 година, Агенцијата за храна и ветеринарство (АХВ), потврдила нов случај на болеста високо патогена авијарна инфлуенца H5N1 (птичји грип) кај една угината дива птица – гуска во резиденцијалниот комплекс Свети Јован во скопско Злокуќани.

Како што соопштија денеска од АХВ, направено е лабораториско тестирање на две живи птици (лебеди) кај кои не е утврдено присуство на вирусот. Денеска се преземаат мерки за заловување на другите птици во комплексот, кај кои ќе се врши лабораториско тестирање за утврдување на присуство на болеста.

- АХВ донесе решение за прогласување на болеста и нареди спроведување на заштитни и контролни мерки, со цел спречување на ширење и сузбивање на оваа зооноза - убивање и нештетно отстранување на затекнати диви птици на локацијата, освен птиците кои се чуваат во затворен простор и од кои се земаат мостри за лабораториско тестирање за утврдување на присуство на птичји грип, наредено е спроведување на дезинфекција на одгледувалиштето, забрането е движење на живина и други птици во и од одгледувалиштето без одобрение на официјален ветеринар, се наведува во соопштението.

Покрај овие мерки наредено е и затворање на живината/птиците во нивните одгледувалишта, земање на мостри од угинати птици за утврдување на присуство на вирусот, забрана за одржување на саеми, изложби, пазари и други собири на живина или птици од наведеното епизотиолошко подрачје.

Задолжително е пријавувањето на промени во здравствената состојба и зголемена смртност на живината и дивите птици, до надлежен официјален ветеринар, како и примена на биосигурносни мерки при спроведување на сите активности на одгледувалиштето.

Се појаснува дека болеста најчесто се шири преку птиците преселници кои се сметаат за нејзин резервоар. Се работи за зооноза од која првенствено заболуваат птиците, но и луѓето и затоа АХВ апелира на внимателност и преземање на заштитни мерки за категориите на лица кои се изложени на ризик (близок контакт со заразени птици или во високо контаминирана средина).

АХВ донела решение и за воведување заштитни мерки во однос на болеста син јазик кај говеда овци и кози, на целата територија на земјава, по лабораториска потврда на присуство на болеста во две одгледувалишта во Демир Капија. Таму од 190 животни, угинати се 7, а десеттина се со клиничка слика карактеристична за оваа болест и зголемена телесна температура.

- Станува збор за болеста која задолжително се пријавува. Луѓето не заболуваат. Болеста Син јазик е неконтагиозно вирусно заболување кај домашните и дивите преживари. Претежно се јавува кај овците, но, заболуваат и говедата, козите, биволи, кај антилопите, елените, срните и камилите. Се пренесува преку инсекти (комарци) од видот Culicoides. Болеста не се пренесува од животно на животно. Векторите се заразуваат со вирусот по цицање крв од инфицирано животно, соопштија од Агенцијата за храна и ветеринарство.

Македонија

Спасовски до Мицкоски: Направивте брутална партизација со бројни примери за непотизам

Пратеникот од СДСМ, Оливер Спасовски на денешната собраниска седница за пратенички прашања, потенцираше дека Мицкоски и ВМРО ДПМНЕ, направија целосен демант на ветувањата во изборната кампања .

Пратеникот од СДСМ, Оливер Спасовски на денешната собраниска седница за пратенички прашања, потенцираше дека Мицкоски и ВМРО ДПМНЕ, направија целосен демант на ветувањата во изборната кампања кои се однесуваат на формирање на професионална департизирана администрација.

„Во време на изборната кампања имаше ветување дека ќе се формира мала професионална администрација во којашто департизацијата ќе биде основа, дека нема да имаме непотизам, дека само стручни и компетентни кадри ќе бидат поставени на позиции. Само во овие 100 дена направивте целосен демант со постапките за коишто можеби знаете како одлуки а можеби и не знаете“, рече Спасовски.

При тоа, Спасовски во прашањето до Мицкоски, посочи дека во првите 100 дена од Владата на ВМРО ДПМНЕ, јавноста е сведок на повеќе примери на непотизам.

„Сестрата на министерот за култура Љутков, вработена во Музејот во Велес во овој период, братот на помошникот на министерот за внатрешни работи во Центарот за обука се вработил во Центарот како предавач од неодамна. Во Македонски Брод има една цела листа за 100 дена, може да кажеме 100 дена или 100 дена вработувања од семејството“, рече Оливер.

Говорејќи за стручноста и компетентноста на дел од избраните кадри на ВМРО ДПМНЕ, Спасовски го посочи за пример изборот на директорката на Комисијата за верски заедници, Оливера Трајковска.

„Започнала студии на Теолошкиот факултет во Скопје во 1997 година, дипломира 2023 година, значи после 26 години кај колега со кој заедно почнале да студираат.Дали ова се критериумите? И ако се тргне од претпоставката, тој што најдобро знае за теологијата, нема конкуренција личност што толку време студирала. И втората работа е во однос на стекнувањето на дипломата, бројот на годините колку што треба за директор и учеството односно работењето во државната администрација. Дали овие принципи коишто ги заговаравте претходно на стручност, на компетентност, на немање на непотизам, исто така ќе побарате ревносно да се расчистат во јавноста, и тие коишто искористиле одредени позиции на моќ за да успеат во намерите на своите блиски да ги вдомат, дали ќе преземат одговорност и ќе има разрешување, бидејќи тоа беа барањата коишто претходно како опозиција ги баравте“, порача Спасовски.

Свет

Бројот на жртвите во Шпанија достигна 140, град е спасен од брана стара 2.000 години (ВИДЕО)

Шпанската државна новинска агенција ЕФЕ објави дека бројот на загинати во поплавите сега се искачи на 140.

Оваа нова бројка претставува значително зголемување од последната официјална бројка пријавена утринава, која беше 95 смртни случаи (во меѓувреме имаше неофицијално ажурирање според кое најмалку 104 починале).

Властите предупредија дека бројот на загинати ќе расте - велејќи дека многу луѓе се уште се водат како исчезнати и свесни дека десетици тела допрва треба да се извлечат од заглавените автомобили.

Шпанската полиција соопшти дека вкупно 39 лица биле уапсени во текот на ноќта „како дел од специјалната акција за спречување криминал, лансирана околу комерцијалните области“ најтешко погодени од поплавите.

„Пронајдени се голем број украдени предмети“, рекоа тие, објавувајќи слики од продавницата која очигледно била цел на ограбувачите и бројни предмети запленети од полициски службеници.

Едно од најинтересните видеа поврзано со смртоносните поплави во Шпанија доаѓа од општина во регионот Арагон.

Како што пишува новинарот на Политика, Ајтор Хернандез-Моралес, известувајќи од Иберија, браната во општината Алмонасид де ла Куба издржала силен наплив на вода.

Изградбата била нарачана пред околу 2000 години од римскиот император Август. Се наоѓа на реката Агуасвивас и е висока 34 метри, што ја прави највисоката од сите зачувани римски брани во светот.

Македонија

МОН изготви нов предлог Закон за учебници во основното и средното образование

Министерството за образование и наука изготви нов предлог Закон за учебници во основното и средното образование, со кој ќе биде заменет актуелниот закон од 2008 година. 

Министерката за образование Весна Јаневска информира дека законот треба да обезбеди изработка на учебници со поквалитетна содржина, намалување на веројатноста за појава на грешки какви што имаше досега и да ја поедностави постапката за набавка, со цел учебниците да бидат навремено испорачани во училиштата. Новиот предлог закон за учебници е веќе поставен на владиниот ЕНЕР-систем (Електронски национален регистер на прописи), а во него се интегрирани сугестиите на издавачките куќи во Македонија.

-Новината е што овој пат им се дава можност на издавачките куќи да учествуваат со веќе подготвени учебници кои потоа во процедура на избор, одобрување од Бирото и рецензија од Националната комисија би биле избрани и обврската за печатење се префрла на издавачките куќи кои со договор ќе бидат обврзани да ги достават учебниците до 1 септември,- Весна Јаневска- министерка за образование.

Од Министерството ги повикаат и граѓаните во следните 20 дена колку што треба да стојат нацрт-законските решенија и прописи на овој систем, со цел да дадат свој придонес во усвојувањето на најдобрата верзија што ќе биде проследена во собраниска процедура.

Прашана во врска со тврдењата на општинските власти во Тетово дека во тамошните училишта недостигаат 20 000 учебници, а дел од оние кои се доставени се оштетени, поради што децата мора да се служат со фотокопии, Јаневска одговори дека станува збор за едно големо недоразбирање, бидејќи Министерството за образование не може да знае колку учебници им требаат на училиштата доколку тие тоа не го пријават.

притисни ентер