Дваесет и осумгодишникот беше уапсен во саботата во Бернау, во близина на Берлин, а од израелската амбасада потврдија дека имало план за напад на нивната дипломатска мисија.

Германските власти го пронашле осомничениот преку конкретна дојава од странски разузнавачки служби. Се уште не е јасно дали во планираниот напад на израелската амбасада требало да се употреби оружје или експлозив. Имало индиции дека по нападот, осомничениот планирал да избега кај роднина во Санкт Аугустин, а потоа да побегне во странство.

При израелските напади врз Појасот Газа повредени се 158 лица.

Од почетокот на израелската воена офанзива на 7 октомври минатата година вкупно загинаа 42.603 луѓе, а 99.795 се повредени.

Премиерот на Израел, Бенјамин Нетанјаху пред неколку дена најави дека борбите ќе продолжат сè додека не бидат ослободени сите заложници од страна на Хамас.

-Не можеме да направиме хуманитарни залихи во потребниот обем за Газа преку само неколку несигурни и тешко достапни контролни пунктови, напиша Канцеларијата на Обединетите нации за координација на хуманитарни прашања (УНХКО) на „Х“.

Израелските одбранбени сили (ИДФ) пред две недели започнаа нова офанзива против Хамас во северниот дел на Појасот Газа. Оттогаш, хуманитарните организации предупредуваат дека населението е изложено на екстремен глад и катастрофални услови и го повикаа Израел да ги отвори контролните пунктови под негова контрола во областа.

Во меѓувреме, мировната мисија на Обединетите нации во Либан (УНИФИЛ) денеска предупреди дека пристапот до свежата вода во Либан е погоден од непријателствата. Детскиот фонд на Обединетите нации (УНИЦЕФ) исто така предупреди за опасноста од епидемии на колера како резултат на недостатокот на чиста вода за пиење во т.н. „сина линија“ меѓу Израел и Либан, која ја надгледува УНИФИЛ.

Според Детскиот фонд, најмалку 28 извори на вода се оштетени, при што се погодени околу 360.000 луѓе, главно во јужниот дел на земјата.