Шефицата на бугарската дипломатија Екатерина Захариева без конкретен одговор дали Бугарија ќе го блокира евроинтегративниот процес на Македонија. Захариева во уште едно од низата гостувања на бугарските телевизии, избегна директно да одговори на серијата прашања посветени на таа тема, но кажа дека за нив од клучно значење е спроведувањето на договорот за добрососедство и продолжување со работа на комисијата за историски прашања.Вината за отежнатите односи на релација Софија –Скопје пак ја препиша на предизборието во Македонија.
,,Друго ве прашав, ќе им го попречиме ли патот кон ЕУ?Видете, нашиот парламент усвои една многу јасна декларација, исполнување на договорот. Во сите декларации на ЕУ, вклучително и последната на лидерите од Загреб. Што велите, ќе им го попречите ли патот кон ЕУ ако продолжат?Тоа е многу, жалам не сакам да ве навредам, но за ова прашање има стапки кои треба да се изодат и тоа го има во декларацијата. Подобро да ме навредите,но да одговорите. Треба да продолжи работата на експертската комисија, таа е експертска и на тоа настојувам многу пати, ако мислиме дека од денеска за утре, никогаш немавме толку...не сме толку наивни да мислиме дека ќе заврши со работа по две седници,никогаш не сум имала надеж дека тоа ќе се случи.
Захариева додаде и дека Бугарија не го оспорува правото на само определување на Македонците, но тоа според неа, не смее да се прави врз историски лаги и антибугарска реторика.
,,Тоа самоопределување, таа нација која тие ја изградија од 1944 година, не треба да биде врз лаги и антибугарска кампања, туку врз вистината. Основата на нашиот договор е историјата, заедничката историја. Никој не им го оспорува правото да имаат држава и да се самоопределуваат.
На изјавите кои изминатиот период доаѓаат од официјална Софија, од македонското МНР, во до сега веројатно најостра реакција, за Канал 5 велат дека обидот за отворање на дебата за идентитетот и јазикот од бугарска страна е навредливо и не е во духот на договорот за добрососедство.
,,Обидот за отворање на дебата за прашање што е затворено и за нас и за светот -македонскиот јазик - е навредливо, не е во духот и словото на договорот за пријателство, ниту на меѓународно право пошироко, не води кон пријателство и не е на линија на европските вредности. оваа позиција беше и ќе продолжи да биде комуницирана до соседна Бугарија и до сите наши меѓународни партнери, преку дипломатски канали на различни нивоа.
Од МНР исто така истакнуваат дека во 21 век во Европа, правото на самоопределување и само изјаснување не може да биде спорно, а процесот кој е започнат со Бугарија преку прифаќањето на сегашноста и на минатото, мора да се темели токму на ова право.