Според грчките медиуми, наставничката ги заклучила децата на возраст од 2,5 и 3 години во мал, темен плакар во училницата, објави Катимерини.
Наставничката (40) признала дека тоа го направила за да ги „смири“ децата.
Овој шокантен случај бил откриен сосема случајно, при играњето на татко со ќерка, која одела во таа градинка.
Имено, девојчето за време на играта ја земала својата кукла, се расправала со неа и сакала како казна да ја остави во складиштето и да го изгаси светлото.
Изненаден, таткото ја прашал ќерка си каде слушнала за ова, а потоа добил шокантен одговор.
„Така ни прави госпоѓата во градинка“, му рекла ќерката.
Мајката на девојчето тогаш во една емисија изјавила дека наставничката не негирала дека вака се однесува со децата и рекла дека ги остава неколку минути во оставата, во чајната кујна.
"Моето дете во последните неколку месеци се плаши од темнина и бара да го вклучиме светлото. Понекогаш се буди среде сон и вели дека не сака да оди во градинка", вели мајката.
Се огласила и градоначалничката која рече дека не ги одобруваат ваквите постапки и дека воспитувачката е сменета од функцијата во градинката.
Одделението е затворено, а малите деца, од кои повеќето се на 3 годишна возраст, привремено биле распоредени во други одделенија од градинката.