Необична приказна одекна неодамна во светските медиуми, бидејќи во домот на Тони Каваларо (64) во Хамбург, јужно од Бафало, е пронајден алигатор стар најмалку 34 години.
Џиновскиот рептил по име Алберт го дели домот со својот сопственик повеќе од три децении, а Каваларо тврди дека не е опасен за околината.
Тој имал дозвола да чува алигатори, но таа истекла во 2021 година, соопштија властите. Но, дури и да била обновена, сопственикот дозволил други луѓе да го галат алигаторот, да влезат во базенот со него, што се квалификува како прекршување на кодот.
Сопственикот тврди дека Алберт е роден и израснат во заробеништво и дека „никогаш не покажувал знаци на агресија“ кон луѓето или другите животни, пренесува Yahoo.News.
„Тој е големо бебе“, рече Каваларо, кој во меѓувреме ангажирал адвокат.
Неговите напори да го донесе миленичето дома биле поддржани од соседите, како и од корисниците на социјалните мрежи. Повеќе од 120.000 луѓе потпишале онлајн петиција, а обожавателите печатат маици со натпис „Слобода за Алберт“.
Каваларо вели дека го купил алигаторот во Охајо кога имал два месеци. Со текот на времето, тој потрошил 120.000 долари за да го прилагоди просторот во својот дом, кој вклучува подно греење, внатрешно езерце со водопад и тропски растенија.
„Сега е тешко да се биде во тој простор. Толку е празно“, рекол сопственикот, покажувајќи ги перниците и играчките на Алберт.
Каваларо признава дека децата и неговите познаници биле „блиску до алигаторот“, го галеле, си играле во вода.
„Алберт секогаш доаѓаше до работ на базенот за да ја поздрави мојата 84-годишна мајка. Таа се грижеше за него ако јас не бев наоколу. Таа седеше со него во собата и му читаше“, тврди сопственикот.
Тој ги оспорува тврдењата на властите дека Алберт има „многубројни здравствени проблеми“, вклучувајќи слепило на двете очи и компликации на 'рбетот.
За алигаторот моментално се грижат ветеринари, но надлежните не го информирале Каваларо каде се чува. Наведено е само дека тој поминува време со лиценциран негувател „додека не бил пренесен на трајна нега“.