Уапсен е осомничениот кој со нож избоде американски професори во Кина (ВИДЕО)

Осомничениот е уапсен за прободувањето со нож на четворица американски професори на размена во кинескиот град Џилин, соопшти денеска полицијата.

Властите го идентификувале осомничениот како Куи, 55-годишен маж од областа Лонгтан во градот. Полицијата соопшти дека тој „се судрил со странец додека шетал“ во паркот Беишан, популарна зелена површина во центарот на градот Џилин.

Осомничениот потоа наводно го избодел професорот, како и еден кинески турист кој зачекорил напред и се обидел да го спречи за време на инцидентот, се вели во соопштението на полицијата, според Си-Ен-Ен.

Полицијата соопшти дека повикот го примиле околу 11:49 часот по локално време, по што испратиле полиција на лице место и повредените ги пренеле на лекување во болница.

„Во моментов на сите повредени им е укажана соодветна лекарска помош и нивните животи не се во животна опасност“, соопштија претходно од полицијата и додадоа дека случајот се истражува.

Професорите од колеџот Корнел во Ајова се повредени во „сериозен инцидент“додека учествувале во партнерска програма со Универзитетот Беихуа во североисточниот кинески град Џилин, соопшти колеџот.

Кинеското Министерство за надворешни работи денеска потврди дека „четворица странски наставници на Универзитетот Беихуа биле нападнати“ за време на посетата на паркот Беишан во Џилин, додавајќи дека тие веднаш биле пренесени во болница и не претрпеле повреди опасни по живот.

Американскиот Стејт департмент соопшти дека е запознаен со извештаите за инцидентот во Кина и дека ја следи ситуацијата.

Ребров: Многу важна победа за тимот и за државата

Селекторот на Украина, Серхи Ребров, беше исклучително задоволен од духот што го покажаа неговите играчи за победа од 2:1 против Словачка.

-Многу сум среќен за играчите. Реагиравме многу добро откако примивме гол. На полувремето променивме некои работи во однос на високиот пресинг. Играчите кои дојдоа од клупата ни помогнаа да ја подобриме нашата игра. Најважно е дека го покажавме нашиот дух. Мора да се фокусираме на следниот натпревар, но тоа беше многу важна победа за тимот и за земјата. Не викав на полувремето, само требаше да реагираме. Знаевме дека не притискаме доволно високо и ова беше нашата единствена шанса. Така им кажав на играчите“, изјави Ребров.

Ребров зборуваше и за својата одлука да стартува со Анатолиј Трубин на голот.

-Мило ми е што имаме добра конкуренција меѓу голманите. Мислам дека Трубин заслужи шанса по настапот против Германија. Беше многу мирен и можеше да започне пред овој натпревар, истакна тој. /МИА

Аргентинскиот претседател Милeи ја почна својата европска турнеја

Аргентинскиот претседател Хавиер Милеи попладнево пристигна во Мадрид, започнувајќи ја својата турнеја низ Европа, во која ќе биде вклучена и Германија, јави ДПА.

Тој беше игнориран од шпанската левичарска влада и од кралот Фелипе Шести, со кого нема предвидена средба.

На предизборен митинг за европските избори, организиран од шпанската партија „Вокс“ во мај, Милеи го нападна шпанскиот премиер Педро Санчез и ја нарече неговата сопруга Бегоња Гомез „корумпирана“.

Шпанскиот министер за надворешни работи Хозе Мануел Албарес, пак, го обвини Милеи дека ја напаѓа шпанската демократија, шпанските институции и Шпанија како целина. Милеи го отфрли барањето за јавно извинување и оттогаш продолжува со вербалните напади.

Во рамките на посетата, аргентинскиот лидер има планирана средба со премиерката на регионот Мадрид, Изабел Дијаз Ајусо, која е претставник на конзервативната Народна партија.

Милеи се очекува утре да биде во Хамбург, а в недела во Берлин ќе се сретне со германскиот канцелар Олаф Шолц. Последната станица од европската турнеја на аргентинскиот претседател е Чешка./МИА

Едномесечен притвор за косовски Србин осомничен за напад врз припадници на КФОР во мај 2023-та

Судот проценува дека, доколку биде на слобода, постои опасност од бегство на обвинетиот, со оглед на тоа дека работи во Србија и може да биде недостапен за органите на правдата во Косово.

Косовски суд му одреди едномесечен притвор на косовски Србин осомничен дека сторил четири кривични дела, меѓу кои и напад врз припадници на Мировната мисија на НАТО во Косово - КФОР на протестите во Звечан во северно Косово во мај 2023 година, јави дописникот на МИА од Приштина.

Според Основниот суд во Приштина, обвинетиот со иницијали Л.Д. е осомничен за кривичните дела „здружување за противуставна дејност“, „загрозуваање на лица под меѓународна заштита“, „учество во толпа што врши кривично дело и хулиганство“ и „напад врз службено лице“.

Судот проценува дека, доколку биде на слобода, постои опасност од бегство на обвинетиот, со оглед на тоа дека работи во Србија и може да биде недостапен за органите на правдата во Косово.

- Постои основано сомнение дека на 29.05.2023 година во временскиот интервал од 06:00 часот до вечерните часови, во периметарот во кој се наоѓа објектот на општина Звечани, пријавениот Л.Д активно учествал во групата или толпата лица, која имала за цел да изврши тешки кривични дела, на тој начин што преку употреба на насилство се обидела да го спречи воспоставувањето на уставниот поредок на Република Косово во северните општини на земјата, се вели во соопштението.

Според судот, и покрај наредбите на војниците од мировната мисија на КФОР за мирно растурање на толпата и одбивањето да влезат во објектот на општината, групата во која учествувал Л.Д. „почнала да врши неконтролирано насилство, користејќи цврсти алатки, импровизирани експлозивни направи и огнено оружје, од кои се повредени најмалку 30 припадници на мировните сили на КФОР, од кои тројца од проектилите од огнено оружје“.

- Предизвикана е и значителна материјална штета на возилата на КФОР, полицијата на Косово и на автомобили на новинари кои известуваа за настаните од тој ден, кои вклучуваат целосно палење на неколку возила или физичка штета во голема мера, предизвикувајќи висок степен на опасност по животите и телата на многу луѓе и имот, се вели во образложението на Судот за определување на мерката притвор.

Според српските медиуми, станува збор за маж, роден 1979, кој завчера бил запрен на пунктот Бистрица, првенствено со цел да се провери поради евентуален шверц на стока.

По проверка на лицето и документите, полицијата објави дека утврдила дека се работи за лице кое се бара во врска со настаните од мај минатата година пред општинската зграда во Звечан, кога дојде до конфликт меѓу група Срби и припадници на КФОР.

За апсењето на Л.Д. се огласи и Канцеларијата за Косово при Владата на Србија, која тврди дека станува збор за цариник кој, велат, една година слободно се движи и дека „неговото апсење во овој момент е исклучиво политичко дејствие на Приштина со цел да предизвика нови тензии“. /МИА

притисни ентер