Свет

Тројца убиени во напад со нож на фестивал во Германија

Тројца загинати и осум повредени од кои пет потешко – ова е билансот од нападот со нож за време на фестивал во германскиот град Солинген. 

Три лица се убиени, а осум повредени по напад со нож на фестивал во германскиот град Солинген. Причините за нападот се уште не се познати, но според информациите на тамошната полиција, сторителот ги избодел своите жртви целно во вратот. Според нив, тој го искористил метежот кој потоа се создал за брзо да побегне. Германските власти, велат дека немаат информации за какво лице станува збор, и одбија да ги коментираат информациите дека напаѓачот говорел арапски. Но, го повикаа локалното население да помогне за негова идентификација и пронаоѓање.

„Мислам дека тоа е нашиот огромен проблем. Се уште немаме многу информации за сторителот. Сведоците кои биле во непосредна близина на настанот биле во шок. Во моментов професионално се грижиме за нив и секако ги интервјуираме за да добиеме повеќе прецизни информации.“

По нападот, властите ги откажаа сите настани во градот кои беа организирани по повод 650 години од неговото основање. Министерот за внатрешни работи на Северна Рајна Вестфалија, Херберт Реул го посети местото на настанот и изјави дека се работи за брутален напад чија цел била да има што е можно повеќе жртви. Но, одби да шпекулира за мотивот на сторителот.

„Моите мисли се со роднините на жртвите и роднините на повредените. Се што можеме да направиме сега е да се молиме тие кои се тешко повредени да бидат добро. Од никаде некој случајно ги прободува луѓето, не можете да кажете ништо за личноста или мотивот. Зошто, не знаеме, ниту за личноста, ниту за мотивот.“

Дел од сведоците на нападот пак, велат дека во градот се создала огромна паника и побараа заштита од федералната влада. Според нив, до сега во Солинген немало такви или слични напади врз обични граѓани.

„Наеднаш имаше некаква паника, се слушна некаков звук и тогаш почнаа луѓето да трчаат наоколу и тогаш видов луѓе како лежат на земја. / Не се чувствувам сигурен, федералната влада треба да се праша, ако федералната влада не реагира тогаш треба законите да се променат. / Јас сум 73 години, роден во Солинген и не знам за ништо вакво. Сме се удирале едни со други по глава, но со нож или со оружје не знам за такво нешто, а тоа станува се позачестено деновиве и е дури нормално. “

Голем број германски и странски политичари изразија ужаснатост од нападот. Германскиот канцелар Олаф Шолц напиша дека сторителот мора набрзо да биде фатен и казнет со сета сила на законот. Министерката за внатрешни работи Ненси Фезер пак, порача дека е во постојан контакт со службите и очекува брзо пронаоѓање на сторителот.

Свет

Ужас во Швајцарија: Ја задавил сопругата и телото ѝ го сомлел во блендер, вели дека се бранел

Судот во Швајцарија оваа недела одби да го ослободи од притвор Томас (41), кој ја убил сопругата Кристина Јоксимовиќ (38), а потоа со миксер ѝ ги исецкал деловите од телото.

Федералниот суд во Лозана вчера ја отфрли неговата жалба, наведувајќи дека има „конкретни индиции за ментална болест“.

Во март, обвинетиот му признал на државниот обвинител дека ја убил сопругата и мајка на неговите две деца - наводно затоа што пред тоа го нападнала со нож. Тој претходно тврдеше дека Кристина ја нашол мртва и во паника ја распарчил. Но судско-медицинскиот извештај укажува дека не се работело за самоодбрана, пишува швајцарски Блик.

Експертите утврдиле дека Кристина, која своевремено влегла во финалето на изборот за Мис на Швајцарија, била задавена на 13 февруари. Според Sky News, остатоците од нејзиното тело биле пронајдени во куќа во Бининген, во близина на Базел.

Обдукцијата покажала дека по убиството жртвата била распарчена во пералната со пила, нож и ножици. Убиецот потоа исецкал некои делови од телото со блендер и потоа ги растворил во хемикалии.

Во наодите на истрагата се наведува дека Томас по убиството на сопругата покажал недостаток на емпатија и социопатско однесување и се обидел да го прикрие злосторството. Забележано е и дека пред убиството ја задавил сопругата, како што стои во пресудата. Инаку, Кристина ја освоила титулата Мис на северозападна Швајцарија и била финалистка на Мис на Швајцарија во 2008 година.

Во февруари, пријателите на двојката рекоа дека немало индикации за лош брак: „Тие изгледаа како совршено семејство“. Но, други рекле дека парот бил во криза со месеци. Наводно, пред убиството, полицијата интервенирала при расправија поради насилство.

Свет

Страшна несреќа во Мичиген среде бел ден- возачот заврши на покрив, возилото смачкано (ВИДЕО)

Несреќата се случила во градот Сагинау, во американската сојузна држава Мичиген, откако 28-годишен возач изгубил контрола и со камионетот удрил во куќа на раскрсница.

Возилото се запалило, но тоа не е најбизарниот детал. Неименуваниот возач, очигледно замаен, завршил на покрив од семејна куќа.

На социјалните мрежи кружи видео од инцидентот, а јасно е дека возачот лежи неподвижен на покривот. Недолго потоа се освестил, пренесува ABC 12 News.

На местото на настанот пристигнала и противпожарната единица која го изгаснала пожарот, а донесена е и скала за безбедно да го симне човекот од покривот.

Тој е пренесен во болница во критична, но стабилна состојба. Трите лица кои биле во куќата не се повредени.

Полицијата не соопштува детали, вклучително и како се случила несреќата, бидејќи истрагата е во тек.

Свет

На Шведска ќе ѝ требаат најмалку 25 години за го реши проблемот на малолетните криминални банди

Шведска, која до пред десетина години важеше за идилична скандинавска земја, сега е на врвот на листата на членки на ЕУ според стапката на криминал извршен со огнено оружје.

Меѓународните банди сега регрутираат деца, пишува Politico.

На Шведска ќе ѝ требаат најмалку десет години за да го реши проблемот со криминалот на малолетничките банди, изјави министерот за правда.

„Проблемите се секако многу сериозни и ќе биде потребно време за успешно да се смени тој тренд, не само што се однесува до децата“, рече Гунар Стромер, министер за правда.

Шведска е потресена од бран на насилство од банди во последниве години, со стапки на криминал со оружје меѓу највисоките во Европската унија. Според официјалните податоци, во 2022 година во Шведска биле убиени 62 лица, а во 2023 година бројот на жртви бил 54.

„За да се осигураме дека децата што растат во Шведска не запаѓаат во криминал, потребна е најмалку една деценија. Тоа е многу реален поглед на временската перспектива“, рече Стромер.

Криминалот на бандите и миграцијата станаа жешки прашања во Шведска, што ја доведе крајната десница до изборен успех. Најголем дел од злосторствата се извршени од меѓународно поврзани банди кои регрутираат деца во своите редови.

Минатиот септември, откако една 25-годишна жена беше убиена во напад на банди, премиерот Улф Кристерсон во ретко телевизиско обраќање вети дека ќе ги „лови бандите“. Претходно оваа година, шведскиот парламент ја овласти полицијата да воспостави таканаречени безбедносни зони, дозволувајќи им да пребарува одредени области без налог или само со причина.

Стромер рече дека владата исто така ги заострува казните за младите престапници.

„Постои постојан ризик од спирала на ново насилство што клокоти под површината“, предупреди тој.

притисни ентер